சென்னை நகரின் முக்கிய நீர்வழித்தடங்களான கூவம் ஆறு, அடையாறு ஆறு மற்றும் பக்கிங்காம் கால்வாய் ஆகியவற்றை மீண்டும் இயற்கை வளம் மிக்க நிலைக்கு மீட்டெடுக்கும் முயற்சியில் தமிழ்நாடு அரசு முக்கியமான அடியெடுத்து வைத்துள்ளது. இந்த ஆறுகளுக்கான விரிவான திட்ட அறிக்கையை தயாரிக்க அதிகாரப்பூர்வமாக டெண்டர் கோரப்பட்டுள்ளது. சென்னை நதிகள் மாற்று நிறுவனம் எனப்படும் சிஆர்டிசிஎல் மூலம் இந்த பணி மேற்கொள்ளப்படவுள்ளது. ஏற்கனவே தயாரிக்கப்பட்ட கருத்துரு திட்டத்தின் அடிப்படையில் முன்னோடி பகுதிகளுக்கான விரிவான திட்ட அறிக்கையை உருவாக்க ஆலோசனை நிறுவனங்களிடம் இருந்து விண்ணப்பங்கள் வரவேற்கப்பட்டுள்ளன.

சென்னையின் இந்த மூன்று முக்கிய நீர்வழிகள் பல ஆண்டுகளாக ஆக்கிரமிப்புகளாலும் கழிவுநீர் கலப்பதாலும் மோசமாக பாதிக்கப்பட்டுள்ளன. ஒரு காலத்தில் நகரின் குடிநீர் ஆதாரமாகவும், போக்குவரத்து வழியாகவும் விளங்கிய இவை இன்று கழிவுநீர் கால்வாய்களாக மாறிவிட்டன. கடந்த காலங்களில் பல்வேறு அரசுகள் நூற்றுக்கணக்கான கோடி ரூபாய் செலவிட்டு சீரமைப்பு பணிகளை மேற்கொண்டாலும், முழுமையான மாற்றம் ஏற்படவில்லை. ஆக்கிரமிப்புகளை அகற்றுவது, குடும்பங்களை மறுகுடியமர்த்துவது போன்ற பணிகள் ஓரளவு நடந்தாலும், நீர் தரத்தை மேம்படுத்துவதிலும் ஆற்றுக்கரையோர மேம்பாட்டிலும் போதிய கவனம் செலுத்தப்படவில்லை என்ற விமர்சனங்கள் இருந்தன.

தற்போதைய முயற்சி இதற்கு மாறுபட்ட அணுகுமுறையை பின்பற்றுகிறது. சிங்கப்பூர் மற்றும் சியோல் போன்ற நகரங்களில் வெற்றிகரமாக செயல்படுத்தப்பட்ட நதி சீரமைப்பு திட்டங்களை முன்மாதிரியாகக் கொண்டு, உலகத் தரத்திலான மாற்றத்தை கொண்டுவர அரசு உறுதிபூண்டுள்ளது. விரிவான திட்ட அறிக்கையில் ஆற்றில் கலக்கும் நூற்றுக்கணக்கான கழிவுநீர் வெளியேற்றங்களை தடுத்து சுத்திகரிப்பு நிலையங்களுக்கு திருப்பும் வழிமுறைகள், ஆற்றின் இருபுறமும் நடைபாதைகள், சைக்கிள் பாதைகள், பசுமை இடங்கள், பார்வை தளங்கள் போன்ற வசதிகள் உருவாக்குதல், படகு போக்குவரத்து சாத்தியக்கூறுகள் ஆய்வு, வெள்ள நீரை சேமிக்கும் முறைகள் மற்றும் சுற்றுச்சூழல் பாதுகாப்பு நடவடிக்கைகள் ஆகியவை இடம்பெறும் என எதிர்பார்க்கப்படுகிறது.இந்த திட்டம் செயல்படுத்தப்படும்போது ஆற்றுக்கரையோரங்களில் வசிக்கும் மீதமுள்ள குடும்பங்களும் மறுவாழ்வு பெறும் வாய்ப்பு உள்ளது.

இதையும் படிங்க: வெளிச்சந்தையில் மின்சாரம் கொள்முதல்: 7,000 மெகாவாட் மின்சாரத்திற்கு 3-வது டெண்டர் கோரியது மின்சார வாரியம்!

இந்த டெண்டர் வெறும் ஆவண தயாரிப்புக்கானது என்றாலும், அது சென்னையின் நீர்வழிகளை மீட்டெடுக்கும் நீண்டகால திட்டத்திற்கு அடித்தளம் அமைக்கும் முக்கிய படியாக பார்க்கப்படுகிறது. பல தசாப்தங்களாக சென்னைவாசிகள் எதிர்பார்த்த இந்த மாற்றம் இப்போது செயல் வடிவம் பெறத் தொடங்கியுள்ளது. ஆறுகளின் இயற்கை நிலையை மீட்டெடுத்து, நகரின் அழகையும் சுற்றுச்சூழலையும் மேம்படுத்தும் இந்த முயற்சி வெற்றிபெறும் என நகர மக்கள் எதிர்பார்க்கின்றனர்.

இதையும் படிங்க: திமுக ஆட்சியில் தொடங்கிய திட்டத்தின் டெண்டர் ரத்து..! தவெக அரசு எடுத்த முக்கிய முடிவு..!