சென்னை: மேகதாது அணை விவகாரத்தில் தமிழக முதல்வர் விஜய்க்கு நெருக்கடி ஏற்படுத்த வேண்டாம் என, தமிழக வெற்றிக் கழகம் (த.வெ.க.) சார்பில் காங்கிரஸ் மேலிடத்துக்கு வேண்டுகோள் விடுக்கப்பட்டுள்ளது. இது கூட்டணி அரசியலில் புதிய பரபரப்பை ஏற்படுத்தியுள்ளது.

கர்நாடகாவில் புதிதாக முதல்வராகப் பொறுப்பேற்றுள்ள காங்கிரஸ் மூத்த தலைவர் சிவகுமார், மேகதாது அணை கட்டப்படும் என்பதில் உறுதியாக உள்ளார். காவிரி ஆற்றின் குறுக்கே அணை கட்டியே தீருவோம் என அவர் சமீபத்தில் பல முறை வலியுறுத்திப் பேசி வருகிறார். இதனால் தமிழக டெல்டா மாவட்ட விவசாயிகளிடையே பெரும் அச்சம் நிலவுகிறது.

த.வெ.க.வுடன் கூட்டணி வைத்து ஆட்சியில் இருப்பதால், முதல்வர் விஜய் இதுவரை இந்த விவகாரத்தில் அமைதி காத்து வருகிறார். ஆனால், கர்நாடக முதல்வர் சிவகுமார், “காங்கிரஸ் ஆதரவுடன் த.வெ.க. ஆட்சி நடத்துவதால் அணை கட்டுவதைத் தடுக்க முடியாது” என்பது போன்ற கருத்துகளைத் தெரிவித்து வருவது, முதல்வர் விஜய்க்கு அரசியல் நெருக்கடியை ஏற்படுத்துவதாக த.வெ.க. மூத்த நிர்வாகிகள் கருதுகின்றனர்.

இதையும் படிங்க: மேகதாது விவகாரம்! கர்நாடக துணை முதல்வர் பிடிவாதம்!! முதலமைச்சர் விஜய் எடுக்கப்போகும் முடிவு என்ன?!

ஏற்கனவே விவசாயக் கடன் தள்ளுபடி உள்ளிட்ட விவகாரங்களில் டெல்டா விவசாயிகள் த.வெ.க. அரசின் மீது அதிருப்தியில் உள்ள நிலையில், மேகதாது விவகாரம் மேலும் சிக்கலை அதிகரிக்கும் என அவர்கள் அஞ்சுகின்றனர்.

இதனால், த.வெ.க. மூத்த நிர்வாகி ஒருவர் காங்கிரஸ் மேலிடத்தை நேரில் சந்தித்து, “மேகதாது அணை விவகாரம் தொடர்பான அரசியலை கர்நாடகாவுக்குள் வைத்துக் கொள்ளுங்கள். என்ன வேண்டுமானாலும் பேசிக் கொள்ளுங்கள். ஆனால், தமிழக முதல்வர் விஜய்க்கு நெருக்கடி ஏற்படுத்தும் வகையில் பேச்சுகளைத் தவிர்க்க வேண்டும்” என வலியுறுத்தியுள்ளார்.

காங்கிரஸ் மேலிடம் இந்த வேண்டுகோளை ஏற்று, கர்நாடக முதல்வர் சிவகுமாருக்கு உரிய அறிவுரை வழங்கியுள்ளதாகவும் தகவல்கள் வெளியாகியுள்ளன.

காவிரி மேட்டூர் அணை நிரம்பும் காலத்தில் கூட தண்ணீர் பிரச்னை நிலவும் நிலையில், மேகதாது அணை கட்டப்பட்டால் தமிழக விவசாயத்துக்கு பெரும் பாதிப்பு ஏற்படும் என விவசாய அமைப்புகள் எச்சரித்து வருகின்றன. இந்தச் சூழலில், கூட்டணி கட்சிகளிடையே ஏற்பட்டுள்ள இந்த உரையாடல், வரும் நாட்களில் தமிழக-கர்நாடக உறவு மற்றும் உள்நாட்டு அரசியலில் முக்கிய தாக்கத்தை ஏற்படுத்தும் என எதிர்பார்க்கப்படுகிறது.

இதையும் படிங்க: ஓட்டுக்கு ரூ.2 ஆயிரம் ... தவெக வேட்பாளரின் பேச்சால் சர்ச்சை..!! வைரலாகும் வீடியோ..!