அதிமுகவின் மூத்த பெண் தலைவர்களில் ஒருவராகவும், முன்னாள் அமைச்சராகவும் தமிழக அரசியலில் நீண்டகாலமாக அறியப்படுபவர் பா. வளர்மதி. இளம் வயதிலிருந்தே அரசியலில் ஆர்வம் கொண்ட வளர்மதி, எம்.ஜி.ஆர். காலத்திலிருந்து அதிமுகவில் இணைந்து செயல்பட்டு வந்தார். கட்சியின் பேச்சாளராகவும், பின்னர் மகளிரணி செயலராகவும் பொறுப்பேற்று, பெண்களின் அரசியல் பங்களிப்பை வலுப்படுத்தியவர் என்ற பெயரைப் பெற்றார். அவரது அரசியல் பயணம் 1980களின் தொடக்கத்தில் தொடங்கியது.

1984ஆம் ஆண்டு மயிலாப்பூர் தொகுதியில் இருந்து சட்டமன்ற உறுப்பினராகத் தேர்ந்தெடுக்கப்பட்டார். அதன் பிறகு 2001ஆம் ஆண்டு ஆலந்தூர் தொகுதியிலும், 2011ஆம் ஆண்டு ஆயிரம் விளக்கு தொகுதியிலும் வெற்றி பெற்று, தமிழ்நாடு சட்டமன்றத்தில் தொடர்ச்சியாகப் பங்களித்தார். ஜெயலலிதா தலைமையிலான அதிமுக அரசுகளில் இரு முறை அமைச்சராகப் பொறுப்பேற்றார்.

முதலில் 2001 முதல் 2004 வரை சமூக நலம் மற்றும் ஊட்டச்சத்து உணவுத் திட்டத் துறை அமைச்சராகவும், பின்னர் 2004 முதல் 2006 வரை கிராமப்புறத் தொழில்கள் துறை அமைச்சராகவும் பணியாற்றினார். 2011ஆம் ஆண்டு மீண்டும் சமூக நலத்துறை அமைச்சராகப் பொறுப்பேற்று, 2016 வரை தொடர்ந்தார். இந்தக் காலகட்டத்தில் பெண்கள் மற்றும் குழந்தைகள் நலன், ஊட்டச்சத்து திட்டங்கள், கிராமப்புற வளர்ச்சி போன்ற துறைகளில் குறிப்பிடத்தக்க பணிகளை மேற்கொண்டார். ஜெயலலிதா மறைவுக்குப் பிறகு அதிமுகவில் ஏற்பட்ட உட்கட்சி மாற்றங்களின் போதும் வளர்மதி எடப்பாடி பழனிசாமி தரப்பில் உறுதியாக நின்றார்.

இதையும் படிங்க: பழைய துரோகங்களை மறைக்க திமுகவின் புது மாய வலை..! அதிமுக வளர்மதி விமர்சனம்..!!

கட்சியின் மகளிரணி செயலராகவும், செய்தித் தொடர்பாளராகவும் தொடர்ந்து செயல்பட்டு வந்த இவர், 2021 சட்டமன்றத் தேர்தலில் ஆலந்தூர் தொகுதியில் போட்டியிட்டாலும் வெற்றி பெறவில்லை. இருப்பினும், கட்சியின் அடிப்படை உறுப்பினர்களிடையே நல்ல வரவேற்பைப் பெற்றிருந்தார். 2026 தமிழ்நாடு சட்டமன்றத் தேர்தலுக்கான அதிமுகவின் வேட்பாளர் பட்டியலில் ஆயிரம் விளக்கு தொகுதியில் பா. வளர்மதியை களமிறக்கியது. இந்த நிலையில் தனது தேர்தல் பிரச்சாரத்தை தீவிரமாக வளர்மதி மேற்கொண்டு வருகிறார். இந்த முறை அதிமுக ஆட்சி அமைய இரட்டை இலை சின்னத்தில் வாக்களிக்க வேண்டும் என பிரச்சாரம் செய்து வருகிறார். வள்ளுவர் கோட்டம் பகுதியில் பரப்புரை நடத்திய வளர்மதிக்கு உற்சாக வரவேற்பு கொடுத்தனர். 

இதையும் படிங்க: போலி பெண் விடுதலை... முகத்திரை கிழிஞ்சது..! வெளுத்து வாங்கிய வளர்மதி..!