மக்களவை எதிர்க்கட்சித் தலைவர் ராகுல் காந்தி தனது சமூக வலைத்தளப் பக்கத்தில் தேர்தல் ஆணையம் மற்றும் தலைமைத் தேர்தல் ஆணையர் (CEC) மீது முன்வைத்த குற்றச்சாட்டுகள் முற்றிலும் உண்மைக்குப் புறம்பானவை மற்றும் பொதுமக்களிடையே தவறான புரிதலை (Misleading) ஏற்படுத்துபவை என, அவரது பெயரை நேரடியாகக் குறிப்பிடாமல் இந்தியத் தேர்தல் ஆணையம் (ECI) திட்டவட்டமான விளக்கம் அளித்துள்ளது.

மேலும், பீகார் உள்ளிட்ட மாநிலங்களில் வாக்காளர் பட்டியல் தீவிர திருத்தப் பணிகளுக்காக (SIR) கடந்த 2025 ஜூன் 24 அன்று பிறப்பிக்கப்பட்ட உத்தரவு முழு ஆணையத்தின் ஒருமனதான ஒப்புதலோடு வெளியிடப்பட்டது என்றும், இந்த உத்தரவை நாட்டின் உச்ச நீதிமன்றமே முறைப்படி உறுதி செய்துள்ளது என்றும் தேர்தல் ஆணையம் திட்டவட்டமாகத் தெரிவித்துள்ளது.  

முன்னதாக, புதிய வாக்காளர்களைச் சேர்ப்பதற்கான 'படிவம் 6' (Form 6) நடைமுறைகளில் தலைமைத் தேர்தல் ஆணையர் சட்டவிரோதமாகவும் தன்னிச்சையாகவும் திருத்தங்களை மேற்கொண்டதாக எதிர்க்கட்சித் தலைவர் ராகுல் காந்தி பகிரங்கமாகக் குற்றம்சாட்டி சமூக வலைத்தளத்தில் பதிவிட்டிருந்தார். 

இதையும் படிங்க: எஸ்ஐஆர் தொடர்பான எதிர்க்கட்சிகளின் குற்றச்சாட்டுகள் பொய்: பாஜக தேசிய தலைவர் ஜே.பி.நட்டா சாடல்!

தேர்தல் ஆணையத்தின் உள் விவகாரங்கள் மற்றும் தொழில்நுட்ப தளம் (ECINET) சார்ந்த செயல்பாடுகளில் ஆணையர்களுக்குள் கருத்து வேறுபாடுகள் இருப்பதாக வெளியான ஊடகத் தகவல்களைத் தொடர்ந்து இந்த விவகாரம் விஸ்வரூபம் எடுத்தது.   இந்நிலையில், இன்று தேர்தல் ஆணையம் வெளியிட்டுள்ள உண்மைச் சரிபார்ப்பு விளக்கத்தில், "சமூக வலைத்தளங்களில் பரப்பப்படும் தகவல்கள் அடிப்படையற்றவை.

பீகாரில் சிறப்புத் தீவிர திருத்தப் பணிகளை (Special Intensive Revision - SIR) மேற்கொள்வதற்காக 2025 ஜூன் 24-ல் வெளியிடப்பட்ட விரிவான ஆணை, தேர்தல் ஆணையத்தின் அனைத்து உறுப்பினர்களாலும் ஒருமனதாக (Unanimously) விவாதிக்கப்பட்டுப் பிறப்பிக்கப்பட்டதாகும். 

இது எவ்விதத்திலும் தனிநபரால் தன்னிச்சையாக எடுக்கப்பட்ட முடிவு அல்ல. மேலும், இந்த உத்தரவின் சட்டப்பூர்வ தன்மை மற்றும் படிவம் 6-ல் இணைக்கப்பட்ட அறிவிப்புகளின் நம்பகத்தன்மையை உச்ச நீதிமன்றமும் தனது தீர்ப்பில் ஏற்றுக்கொண்டு உறுதிப்படுத்தியுள்ளது" என்று தெளிவுபடுத்தியுள்ளது.

நாடு தழுவிய அளவில் வாக்காளர் பட்டியலைச் சீரமைக்கும் நோக்கில் மேற்கொள்ளப்படும் எஸ்ஐஆர் பணிகள் சட்டத்தின் வழிகாட்டுதல்களுக்கு உட்பட்டே நடைபெறுவதாகவும், தேர்தல் ஆணையத்தின் சட்டப்பூர்வ செயல்பாடுகள் குறித்துத் தவறான கருத்துகளைப் பரப்பி பொதுமக்களிடையே சந்தேகங்களை விதைக்கக் கூடாது என்றும் தேர்தல் ஆணைய வட்டாரங்கள் குறிப்பிட்டுள்ளன. 

எதிர்க்கட்சித் தலைவரின் குற்றச்சாட்டுகளுக்குத் தேர்தல் ஆணையம் நேரடியாக உண்மைச் சரிபார்ப்பு விளக்கம் அளித்துள்ளது தேசிய அரசியலில் பெரும் விவாதத்தை ஏற்படுத்தியுள்ளது.

இதையும் படிங்க: சிபிஎஸ்இ 6-ம் வகுப்பு மாணவர்களுக்கு மும்மொழிக் கொள்கையிலிருந்து விலக்கு: உச்ச நீதிமன்றம் அதிரடி!