தமிழக வாழ்வுரிமைக் கட்சித் தலைவர் வேல்முருகன், மாநிலத்தில் பெண்கள் மற்றும் பெண் குழந்தைகளின் பாதுகாப்பு குறித்து கடும் கவலை தெரிவித்துள்ளார். குடும்பத்திற்காக வேலைக்குச் சென்ற பெண்ணுக்கும், பெற்றோருடன் வீட்டில் உறங்கும் சிறுமிக்கும் கூட பாதுகாப்பு இல்லாத நிலையை சுட்டிக்காட்டி, இதனை நல்லாட்சி என்று சொல்வதா என்று கேள்வி எழுப்பியுள்ளார்.ஈரோடு மாவட்டம் பெருந்துறை அருகே 26 வயது செவிலியர் ஆர். உத்திரா காணாமல் போய் பின்னர் சடலமாக மீட்கப்பட்ட சம்பவத்தையும், விழுப்புரம் மாவட்டம் செஞ்சி அருகே பெற்றோருடன் வீட்டில் உறங்கிக் கொண்டிருந்த ஏழு வயது சிறுமி அதிகாலையில் காணாமல் போன சம்பவத்தையும் அவர் குறிப்பிட்டார்.

இந்த இரண்டு சம்பவங்களும் ஒட்டுமொத்த சமூகத்தின் பாதுகாப்பையே கேள்விக்குள்ளாக்கியுள்ளதாக அவர் கூறினார்.வீட்டுக்குள் பெற்றோருடன் உறங்கிக் கொண்டிருந்த பெண் குழந்தைக்கே பாதுகாப்பு இல்லை என்றால், தமிழகத்தில் குழந்தைகளின் பாதுகாப்பு எங்கே என்று வேல்முருகன் கேட்டார். குடும்பத்தின் வாழ்வாதாரத்திற்காகப் பணிக்குச் சென்ற பெண்ணுக்கே பாதுகாப்பு இல்லை என்றால், உழைக்கும் பெண்களின் பாதுகாப்புக்கு உத்தரவாதம் என்ன என்றும் அவர் கேள்வி எழுப்பினார். ஒரு பெண் வீட்டுக்குள் இருந்தாலும் பாதுகாப்பில்லை, பணிக்காக வெளியே சென்றாலும் பாதுகாப்பில்லை என்ற நிலை உருவானது எப்படி என்று அவர் கேட்டார்.பெண்கள் மற்றும் குழந்தைகளின் பாதுகாப்புக்காக சிங்கப்பெண் சிறப்பு அதிரடிப்படை உருவாக்கப்பட்டிருப்பதாக அரசு தெரிவித்தாலும், பெண்களும் குழந்தைகளும் அச்சமின்றி வாழும் சூழல் இல்லையே ஏன் என்று அவர் கேள்வி எழுப்பினார்.

பெண்களுக்கு பாதுகாப்பு உறுதி செய்யப்படாத நிலையில் சிங்கப்பெண் படை எதற்காக என்றும் அவர் கேட்டார். வெற்றிப் பயணத்தில் வெளியே செல்லும் பெண்கள் பாதுகாப்புடன் வீடு திரும்பி வர உத்தரவாதம் இருக்கிறதா என்றும் அவர் கேள்வி எழுப்பினார்.பெண்களுக்குப் பாதுகாப்பு இல்லை, குழந்தைகளுக்குப் பாதுகாப்பு இல்லை, விலைவாசி உயர்விலிருந்து நிம்மதி இல்லை, போதைப் பொருள் அச்சத்திலிருந்து விடுதலை இல்லை என்று சுட்டிக்காட்டிய வேல்முருகன், இது ஆட்சி நிர்வாகமா அல்லது ரீல்ஸ் காட்சி நிர்வாகமா என்று கேட்டார். இதே நிலை நீடித்தால், பெண்களின் பாதுகாப்புக்காக உருவாக்கப்பட்ட சிங்கப்பெண் படையில் பணியாற்றும் பெண் காவலர்களுக்கே முழுமையான பாதுகாப்பு இருக்குமா என்பதும் கேள்விக்குறியாகிவிடும் என்று அவர் எச்சரித்தார்.காணாமல் போன சிறுமி ஹேமாவதியை விரைந்து பாதுகாப்பாக மீட்டு அவரது பெற்றோரிடம் ஒப்படைக்க வேண்டும் என்று அவர் வலியுறுத்தினார்.

இதையும் படிங்க: "நாகரிகமற்ற நாராச பேச்சு"..! குதூகலிக்கும் மேயர் பிரியா..! கொந்தளித்த அமைச்சர் கீர்த்தனா.!!

உத்திராவின் மரணம் தொடர்பான விசாரணையைத் துரிதப்படுத்தி, அவரது மரணத்திற்கான முழுமையான காரணத்தை வெளிக்கொண்டு வந்து, குற்றத்தில் தொடர்புடையவர்கள் யாராக இருந்தாலும் சட்டத்தின் முன் நிறுத்த வேண்டும் என்றும் அவர் வலியுறுத்தினார்.மேலும், பெண்கள் மற்றும் குழந்தைகளின் பாதுகாப்பை உறுதி செய்யும் வகையில் காவல்துறை கண்காணிப்பை வலுப்படுத்த வேண்டும் என்றும், பெண்கள் பணிபுரியும் இடங்களுக்கும் அவர்கள் பயணிக்கும் வழித்தடங்களுக்கும் உரிய பாதுகாப்பு ஏற்பாடுகளை உறுதி செய்ய வேண்டும் என்றும் அவர் கேட்டுக் கொண்டார். போதைப் பொருள் புழக்கத்தைத் தடுப்பதற்கும் சட்டம் ஒழுங்கைப் பாதுகாப்பதற்கும் கடுமையான மற்றும் தொடர்ச்சியான நடவடிக்கைகள் மேற்கொள்ளப்பட வேண்டும் என தமிழக வாழ்வுரிமைக் கட்சியின் சார்பில் அவர் வலியுறுத்தினார்.

இதையும் படிங்க: காங்கிரசுக்கு நோ? விஜய்க்கு ஓகே? தவெக கூட்டணியில் த.மா.கா. வாசன்! முதல்வரை சந்திக்க நேரம் கேட்டதாக தகவல்!