தமிழக வாழ்வுரிமைக் கட்சித் தலைவர் தி.வேல்முருகன், வேலை தேடும் இளைஞர்களுக்கு கூடுதல் சுமையாக மாறும் வேலைவாய்ப்பு சேவைகளுக்கான ஜிஎஸ்டி வரியை ஒன்றிய அரசு மறுபரிசீலனை செய்ய வேண்டும் என வலியுறுத்தியுள்ளார்.ஒரு இளைஞன் வேலை தேடுவது ஆடம்பரத்திற்காக அல்ல; தன் குடும்பத்தின் எதிர்பார்ப்பை நிறைவேற்றுவதற்காகவும், கல்விக் கடனை அடைப்பதற்காகவும், தனது வாழ்க்கையைத் தானே கட்டியெழுப்புவதற்காகவும்தான் என அவர் சுட்டிக்காட்டினார். அத்தகைய முயற்சியில் வேலை தேடுபவர்களையும் வழங்குபவர்களையும் இணைக்கும் ஆட்சேர்ப்பு, பணியாளர் தேடல், வேலைவாய்ப்பு பரிந்துரை, தொழிலாளர் வழங்கல் உள்ளிட்ட சேவைகளுக்கு விதிக்கப்படும் ஜிஎஸ்டி குறித்து மத்திய அரசு மறுபரிசீலனை செய்ய வேண்டிய அவசியம் ஏற்பட்டுள்ளதாக அவர் தெரிவித்தார்.

ஜிஎஸ்டி விதிகளில் பணியாளர்களைத் தேடுதல், வேலைவாய்ப்புக்குப் பரிந்துரை செய்தல், தொழிலாளர்களை வழங்குதல் உள்ளிட்ட சேவைகள் தனிப்பட்ட பிரிவுகளாக இடம்பெற்றுள்ளன. நிரந்தரப் பணியமர்த்தல், ஒப்பந்த அடிப்படையிலான பணியாளர் வழங்கல், தற்காலிகப் பணியாளர் வழங்கல் போன்றவை இதில் அடங்கும். மேலும், ஜிஎஸ்டி வரி விகித அட்டவணையில் 9985-ஆம் வகைப்பாட்டின் கீழ் வரும் பொதுவான ஆதரவுச் சேவைகளுக்கு 18 சதவீத ஜிஎஸ்டி விதிக்கப்படுவதாக அவர் குறிப்பிட்டார்.

வேலை தேடுபவர்களையும் வழங்குபவர்களையும் இணைக்கும் ஆட்சேர்ப்பு மற்றும் பணியாளர் வழங்கல் சேவைகளுக்கு வரி விதிக்கப்படும் நிலையில், அந்தச் செலவு வேலைவாய்ப்பு சந்தையில் ஏற்படுத்தக்கூடிய தாக்கத்தை மத்திய அரசு ஆய்வு செய்ய வேண்டாமா என அவர் கேள்வி எழுப்பினார். வேலைவாய்ப்பை உருவாக்குவது நாட்டின் பொருளாதார வளர்ச்சியின் அடிப்படை என்றால், வேலை தேடும் இளைஞரையும் வழங்கும் நிறுவனத்தையும் இணைக்கும் அமைப்புகளும் தடையின்றி செயல்பட வேண்டும் என அவர் வலியுறுத்தினார்.வேலை கிடைக்காமல் தவிக்கும் இளைஞனுக்கு புதிய வாய்ப்புகளை உருவாக்க வேண்டிய நேரத்தில், அந்த வாய்ப்பைத் தேடும் பாதையிலும் செலவு அதிகரித்தால் அது எந்த வகையான வளர்ச்சி என அவர் கேட்டார். இளைஞர்களுக்கு வெறும் கல்விச் சான்றிதழ்கள் மட்டும் போதாது; வேலை வேண்டும், நிலையான வருமானம் வேண்டும், பாதுகாப்பான எதிர்காலம் வேண்டும் என அவர் வலியுறுத்தினார்.

இதையும் படிங்க: மீனாட்சியம்மன் கோவில் குடமுழுக்கில் தமிழுக்கு இடமில்லையா.? கையேந்தனுமா..? வேல்முருகன் ஆவேசம்..!!

அந்த எதிர்காலத்தை நோக்கிச் செல்லும் பாதையில் தேவையற்ற செலவுகள் தடையாக மாறாத வகையில், வேலைவாய்ப்பு சார்ந்த சேவைகளுக்கான ஜிஎஸ்டி வரிக் கட்டமைப்பை மறுபரிசீலனை செய்ய வேண்டும் என அவர் கோரினார். வேலை தேடும் தலைமுறையின் சுமையை அதிகரிப்பதைவிட, வேலைவாய்ப்பை உருவாக்கும் பொருளாதாரத்தை வலுப்படுத்துவதில்தான் ஒன்றிய அரசின் கவனம் இருக்க வேண்டும் என அவர் சுட்டிக்காட்டினார்.இளைஞர்களின் கைகளில் வேலைவாய்ப்பு விண்ணப்பங்களுக்குப் பதிலாக பணிநியமன ஆணைகள் இருக்க வேண்டும் என வலியுறுத்திய அவர், அதற்கேற்ற வகையில் ஆட்சேர்ப்பு மற்றும் பணியாளர் வழங்கல் சேவைகளுக்கான ஜிஎஸ்டி வரி விகிதத்தை மறுபரிசீலனை செய்து, வேலைவாய்ப்பு உருவாக்கத்திற்கு ஏற்ற வரிச்சூழலை ஒன்றிய அரசு ஏற்படுத்த வேண்டும் என தமிழக வாழ்வுரிமைக் கட்சி சார்பில் வலியுறுத்தினார்.

இதையும் படிங்க: மாணவன் தமிழ்செல்வன் மரணம்... அத்துமீறும் காவல் துறை..! வேல் முருகன் எதிர்ப்பு..!!