தமிழகத்தின் தலைநகரான சென்னையில் நாளுக்கு நாள் பெருகி வரும் மக்கள் தொகைக்கு இணையாக, திடக்கழிவு மேலாண்மை என்பது இன்றுவரை ஒரு தீர்க்க முடியாத பெரும் சவாலாகவே நீடித்து வருகிறது. இந்நிலையில், இந்த விவகாரம் தொடர்பாகச் சென்னை மாநகராட்சிக்குத் தென்மண்டல பசுமைத் தீர்ப்பாயம் (NGT) கடுமையான கண்டனங்களையும், அதிரடியான உத்தரவுகளையும் பிறப்பித்துள்ளது.

சென்னையின் குப்பை மேலாண்மை தொடர்பான வழக்கை விசாரித்த தென்மண்டல பசுமைத் தீர்ப்பாயம், "சென்னையில் குப்பை மேலாண்மை என்பது ஏன் இன்னமும் ஒரு பெரும் சவாலாகவே நீடித்து வருகிறது?" என மாநகராட்சி அதிகாரிகளுக்குக் கேள்வி எழுப்பியுள்ளது.

குப்பைகளை அகற்றுவதற்கும், மறுசுழற்சி செய்வதற்கும் நவீன உள்கட்டமைப்பு என்ற பெயரில் கோடிக் கணக்கான ரூபாய் மக்கள் பணம் தொடர்ந்து செலவிடப்பட்டு வரும் நிலையிலும், நிலப்பரப்புகளில் குப்பைகள் மலை போல் தேங்குவது ஏன் என்று தீர்ப்பாயம் அதிருப்தி வெளியிட்டது. மேலும், ஒவ்வொரு முறையும் பிரம்மாண்டமான நிதி ஒதுக்கீடுகளை மட்டுமே நம்பியிருக்காமல், நடைமுறைக்குச் சாத்தியமான மற்றும் எளிமையான திட்டங்களை உருவாக்கிச் செயல்படுத்த வேண்டும் என்று அறிவுறுத்தியுள்ளது.

இதையும் படிங்க: இன்று தொடங்கும் சிங்கப்பெண் சிறப்பு அதிரடிப்படை... செயல்பாடுகள் என்னென்ன..?

இதனைத் தொடர்ந்து, சென்னையில் குப்பைகளை வீட்டிலேயே தரம் பிரிப்பது (Source Segregation), வார்டுகள் வாரியாக மக்கும் குப்பைகளை உரமாக்குவது போன்ற எளிய, குறைந்த செலவிலான திட்டங்களை உருவாக்குவது தொடர்பாக விரிவான அறிக்கை தாக்கல் செய்ய வேண்டும் எனச் சென்னை மாநகராட்சிக்கு பசுமைத் தீர்ப்பாயம் உத்தரவிட்டுள்ளது. பெருநகரங்களில் குப்பை மேலாண்மைக்குத் தேவைப்படுவது பெரிய அளவிலான இயந்திரங்கள் அல்ல, மாறாக முறையான திட்டமிடலும் பொதுமக்களின் பங்களிப்பும்தான் என்பதை உணர்த்தும் வகையில் அமைந்துள்ள இந்த உத்தரவு, மாநகராட்சி வட்டாரத்தில் பெரும் சுறுசுறுப்பை ஏற்படுத்தியுள்ளது.

இதையும் படிங்க: வீட்டை விற்க மறுத்த ஓனர்! அடித்தே கொலை செய்த வாடகை தம்பதி! சிசிடிவி சிக்கிய பின்னணி!