அய்ச்சி-நகோயா: ஜப்பானில் நடைபெற்று வரும் ஆசிய விளையாட்டுப் போட்டியில் இந்திய வீரர், வீராங்கனைகளின் பதக்க வேட்டை தொடர்ந்து வருகிறது. மகளிர் ஹாக்கியில் ஜப்பானை 3-1 என்ற கோல் கணக்கில் வீழ்த்திய இந்திய அணி அரையிறுதிக்கு முன்னேறியுள்ளது. இதேபோல் டேபிள் டென்னிஸ் மற்றும் ஸ்குவாஷ் போட்டிகளிலும் இந்திய வீரர்கள் அரையிறுதிக்கு முன்னேறி பதக்கங்களை உறுதி செய்துள்ளனர்.

மகளிர் ஹாக்கி போட்டியில் ‘குரூப் பி’ பிரிவில் இடம்பெற்றுள்ள இந்திய அணி, ஜப்பானை அதன் சொந்த மண்ணில் எதிர்கொண்டது. தொடக்கம் முதலே தாக்குதல் ஆட்டத்தை வெளிப்படுத்திய இந்திய வீராங்கனைகள், ஜப்பான் அணிக்கு தொடர்ந்து நெருக்கடி கொடுத்தனர்.

முதல் பாதியில் லால்ரெமிசியாமி மற்றும் இஷிகா ஆகியோர் இந்தியாவுக்காக கோல் அடித்தனர். இதனால் முதல் பாதியின் முடிவில் இந்திய அணி 2-0 என்ற முன்னிலையை பெற்றிருந்தது.

இதையும் படிங்க: குறி தப்பாது! ஆசிய விளையாட்டு போட்டியில் இந்தியாவுக்கு 2வது தங்கம்; கமல்ஜீத் - சுருச்சி ஜோடி அபாரம்!

இரண்டாவது பாதியிலும் இந்தியாவின் ஆதிக்கம் தொடர்ந்தது. நவ்நீத் கவுர் மற்றொரு கோலை அடித்து இந்தியாவின் முன்னிலையை 3-0 என உயர்த்தினார்.

இதன்பிறகு ஜப்பான் அணியின் கோபாயாகவா ஷிகோ ஒரு கோல் அடித்து இடைவெளியை குறைத்தார். இருப்பினும், இந்தியாவின் தடுப்பாட்டத்தை ஜப்பானால் உடைக்க முடியவில்லை. இறுதியில் இந்திய அணி 3-1 என்ற கோல் கணக்கில் வெற்றி பெற்றது.

இந்த வெற்றியின் மூலம் இந்திய மகளிர் ஹாக்கி அணி, இதுவரை விளையாடிய நான்கு போட்டிகளிலும் வெற்றி பெற்று அரையிறுதிக்கு தகுதி பெற்றுள்ளது. இதனால் அடுத்த சுற்றில் இந்தியாவின் பதக்க வாய்ப்பு மேலும் அதிகரித்துள்ளது.

இதற்கிடையே டேபிள் டென்னிஸ் கலப்பு இரட்டையர் பிரிவிலும் இந்தியாவுக்கு மகிழ்ச்சியான செய்தி கிடைத்துள்ளது. இந்தியாவின் தியா சிட்டால் மற்றும் மனுஷ் ஷா ஜோடி, ஹாங்காங் அணியின் வாங் சூன் டிங் மற்றும் டூ ஹோய் கெம் ஜோடியை வீழ்த்தி அரையிறுதிக்கு முன்னேறியது. இதன் மூலம் இந்தப் பிரிவில் இந்தியாவுக்கு குறைந்தபட்சம் ஒரு பதக்கம் உறுதி செய்யப்பட்டுள்ளது.

ஸ்குவாஷ் கலப்பு இரட்டையர் பிரிவிலும் இந்தியா பதக்கத்தை உறுதி செய்துள்ளது. பிலிப்பைன்ஸ் ஜோடியை வீழ்த்திய ஜோஷ்னா சின்னப்பா மற்றும் வேலவன் செந்தில் குமார் இணை அரையிறுதிக்கு முன்னேறியுள்ளது.

ஒரே நாளில் ஹாக்கியில் அரையிறுதி முன்னேற்றம், டேபிள் டென்னிஸ் மற்றும் ஸ்குவாஷில் பதக்கம் உறுதி என இந்தியாவுக்கு அடுத்தடுத்து மகிழ்ச்சியான முடிவுகள் கிடைத்துள்ளன. அடுத்த சுற்றுப் போட்டிகளில் இந்திய வீரர், வீராங்கனைகள் பதக்கத்தின் நிறத்தை மாற்றுவார்களா என்ற எதிர்பார்ப்பு ரசிகர்கள் மத்தியில் அதிகரித்துள்ளது.
 

இதையும் படிங்க: AsianGames2026: பளுதூக்குதலில் வெள்ளி வென்ற மீராபாய் சானு..!! வரலாற்று சாதனை..!!