தமிழ்நாடு கால்பந்து சங்கத்தின் (Tamil Nadu Football Association - TNFA) தேர்தல் குறித்து, சென்னை உயர்நீதிமன்றம் முக்கிய உத்தரவு ஒன்றைப் பிறப்பித்துள்ளது. கடந்த மே மாதத்தில் நடத்தப்பட்ட TNFA தேர்தல் ரத்து செய்யப்பட்டு, மறுதேர்தல் நடத்துவதற்காக அங்கீகரிக்கப்பட்ட உறுப்பினர்களின் இறுதி பட்டியலை வரும் ஜூலை 21ம் தேதிக்குள் தயாரிக்குமாறு நீதிமன்றம் உத்தரவிட்டுள்ளது.
2023-ல், மதுரை உயர் நீதிமன்றம் TNFA-வின் நிர்வாகத்தை மேற்பார்வையிட ஓய்வு பெற்ற நீதிபதி ஏ.கே.ராஜன் தலைமையில் ஒரு நிர்வாகக் குழுவை அமைத்தது. இந்தக் குழு, புதிய நிர்வாகக் குழு தேர்ந்தெடுக்கப்படும் வரை சங்கத்தின் செயல்பாடுகளை நிர்வகிக்கவும், தேர்தல்களை நடத்தவும் பொறுப்பு வழங்கப்பட்டது. TNFA-வின் நிர்வாகத்தில் நீண்டகால பிரச்சினைகள், தேர்தல் நடத்தப்படாதது மற்றும் உறுப்பினர்களின் தகுதி தொடர்பான சர்ச்சைகள் காரணமாக இந்த நடவடிக்கை எடுக்கப்பட்டது. மேலும், 2025 மே 31ம் தேதி தேர்தல் நடத்தப்பட வேண்டும் என்று அகில இந்திய கால்பந்து சம்மேளன (AIFF) தலைவர் கல்யாண் சவுபே குறிப்பிட்டிருந்தார், ஆனால் நிலுவையில் உள்ள 22 வழக்குகள் காரணமாக தேர்தல் செயல்முறை தாமதமானது.
இதையும் படிங்க: இந்தியா - இங்கிலாந்து 3வது டெஸ்ட் போட்டி... இந்திய அணியில் 2 மாற்றங்கள்; காரணம் இதுதான்!!
இதனையடுத்து தமிழ்நாடு கால்பந்து சங்கத்தின் நிர்வாகிகள் தேர்தல் கடந்த மே மாதம் 31ம் தேதி நேரு விளையாட்டரங்கில் நடைபெற்றது. கடந்த 2018-ம் ஆண்டு நடைபெற்ற தேர்தல் செல்லாது என நீதிமன்றம் அறிவித்ததை தொடர்ந்து மறு தேர்தல் நடைபெற்றது. சென்னை உயர் நீதிமன்றத்தின் முன்னாள் பதிவாளர் பாலசுப்பிரமணியன் இந்தத் தேர்தலுக்கு பொறுப்பாளராக இருந்தார். அதில் 22 உறுப்பினர்களுடன் சென்னை, திருநெல்வேலி, கோவை மற்றும் திருச்சியை சேர்ந்த 4 பேர் புதிய உறுப்பினர்களாக சேர்க்கப்பட்டனர்.
இந்நிலையில், “தேர்தல் நடைபெறுவதற்கு முன் முறைகேடாக 4 உறுப்பினர்கள் சேர்க்கப்பட்டுள்ளனர். புதிதாக உறிப்பினர்கள் சேர்க்கப்பட்டது, ஏற்கனவே நீதிமன்றம் பிறப்பித்த உத்தரவுக்கு எதிரானது” என பல்வேறு மாவட்ட கால்பந்தாட்ட சங்கம் சார்பில் மனு தாக்கல் செய்யப்பட்டது. அந்த வழக்கை விசாரித்த நீதிபதிகள் அனிதா சுமந்த், என்.செந்தில்குமார் அமர்வு, ஏற்கனவே நீதிமன்றம் பிறப்பித்த உத்தரவுக்கு எதிராக தேர்தலுக்கு முன் புதிய உறுப்பினர்கள் சேர்க்கப்பட்டிருப்பதை ஏற்க முடியாது. தேர்தல் எப்படி நடத்தப்பட வேண்டும்? என்ற விதிகளுக்கு எதிராக தேர்தல் நடைபெற்றிருக்கிறது என்று கூறினர்.
எனவே தமிழ்நாடு கால்பந்தாட்ட சங்கத்துக்கு கடந்த மே மாதம் நடத்தப்பட்ட தேர்தலை சென்னை உயர்நீதிமன்றம் ரத்து செய்து உத்தரவிட்டுள்ளது. மறுதேர்தல் நடத்தும் வகையில் அங்கீகரிக்கப்பட்ட உறுப்பினர்களின் இறுதி பட்டியலை ஜூலை 21-க்குள் தயாரிக்க உத்தரவிட்டுள்ள உயர்நீதிமன்றம், தேர்தல் நடைமுறைகளை ஆகஸ்ட் 31-க்குள் முடித்து இணையத்தில் பதிவேற்றம் செய்ய ஆணையிட்டு விசாரணையை செப். 1ஆம் தேதிக்கு ஒத்திவைத்தது.
TNFA-வின் தேர்தல் செயல்முறை நீதிமன்றக் கண்காணிப்பில் உள்ளது, மேலும் மறுதேர்தல் விரைவில் நடத்தப்படும் என்று எதிர்பார்க்கப்படுகிறது. இந்த தேர்தல் ரத்து மற்றும் மறுதேர்தல் உத்தரவு, கால்பந்து வீரர்களுக்கு சம வாய்ப்புகளை உறுதி செய்யவும், நிர்வாகத்தில் வெளிப்படைத்தன்மையை மேம்படுத்தவும் முயற்சியாகக் கருதப்படுகிறது.