பெங்களூரு எம். சின்னசாமி மைதானத்தில் ஐபிஎல் மற்றும் சர்வதேச கிரிக்கெட் போட்டிகளை மீண்டும் நடத்த கர்நாடக அரசு அமைச்சரவை ஒப்புதல் அளித்துள்ளது. இந்த முடிவு கடந்த பிப்ரவரி 12-ஆம் தேதி எடுக்கப்பட்டது. 

கடந்த ஆண்டு (2025) ஐபிஎல் தொடரில் ராயல் சேலஞ்சர்ஸ் பெங்களூரு (ஆர்சிபி) அணி முதல் முறையாக சாம்பியன் பட்டத்தை வென்றது. இதனை கொண்டாடும் வகையில் ஜூன் மாதம் சின்னசாமி மைதானத்தின் வெளியே வெற்றி விழா ஏற்பாடு செய்யப்பட்டது. ஆனால், அப்போது ஏற்பட்ட கூட்ட நெரிசல் மற்றும் தள்ளுமுள்ளில் 11 பேர் உயிரிழந்தனர். பலர் காயமடைந்தனர். இந்த சோக சம்பவத்தைத் தொடர்ந்து, மைதானத்தில் எந்த கிரிக்கெட் போட்டிகளும் நடத்த தடை விதிக்கப்பட்டது.

இந்நிலையில், சம்பவம் குறித்து விசாரணை நடத்திய நீதிபதி ஜான் மைக்கேல் டி'குன்ஹா தலைமையிலான ஆணையத்தின் அறிக்கையை அரசு ஏற்றுக்கொண்டது. அறிக்கையில் முன்வைக்கப்பட்ட பாதுகாப்பு பரிந்துரைகளை அடிப்படையாகக் கொண்டு, கட்டுப்பாடுகளுடன் மைதானத்தை மீண்டும் திறக்க முடிவு செய்யப்பட்டுள்ளது.

இதையும் படிங்க: WPL 2026: பெங்களூரு அணி மீண்டும் சாம்பியன்! Ee Saala Cup Namdu.. மந்தனா அதிரடி!

முக்கிய நிபந்தனைகளாக, மைதானத்தின் முழு கொள்ளளவையும் (சுமார் 40,000க்கும் மேல்) பயன்படுத்தாமல், அதிகபட்சமாக 30,000 முதல் 35,000 பார்வையாளர்களை மட்டுமே அனுமதிக்க வேண்டும் என அரசு உத்தரவிட்டுள்ளது. மேலும், நுழைவு வாயில்களை அகலப்படுத்துதல், கூட்டத்தை திறம்பட ஒழுங்குபடுத்த AI அடிப்படையிலான கண்காணிப்பு கேமராக்கள் மற்றும் பிற நவீன பாதுகாப்பு ஏற்பாடுகளை செயல்படுத்த கர்நாடகா மாநில கிரிக்கெட் சங்கத்திற்கு (கேஎஸ்சிஏ) அறிவுறுத்தப்பட்டுள்ளது.

இந்த அனுமதியால், தற்போதைய சாம்பியனான ஆர்சிபி அணி தனது சொந்த மைதானமான சின்னசாமியில் ஐபிஎல் 2026 தொடரின் தொடக்கப் போட்டியை நடத்த வாய்ப்பு கிடைத்துள்ளது. மேலும், குவாலிஃபையர்-2 மற்றும் இறுதிப் போட்டியும் இங்கேயே நடைபெறும் என எதிர்பார்க்கப்படுகிறது. கடைசியாக 2016-இல் பெங்களூருவில் ஐபிஎல் இறுதிப் போட்டி நடைபெற்றது. அப்போது சன்ரைசர்ஸ் ஹைதராபாத் அணி ஆர்சிபியை வீழ்த்தி கோப்பையை வென்றது.

இந்த முடிவு பெங்களூரு கிரிக்கெட் ரசிகர்களிடையே பெரும் உற்சாகத்தை ஏற்படுத்தியுள்ளது. பாதுகாப்பு நடவடிக்கைகளை முழுமையாக பின்பற்றினால், சின்னசாமி மைதானம் மீண்டும் அதன் பழைய புகழைப் பெறும் என நம்பிக்கை எழுந்துள்ளது. கிரிக்கெட் ஆர்வலர்கள் இப்போது ஐபிஎல் 2026-ஐ ஆவலுடன் எதிர்நோக்குகின்றனர்.

இதையும் படிங்க: கம்பீரை பங்கம் செய்த ரசிகர்கள்..!! டக்குனு திரும்பி ஒரு லுக் விட்ட விராட் கோலி..!! என்ன நடந்துச்சு..??