ஐபிஎல் 2026 கிரிக்கெட் திருவிழாவின் 7-வது லீக் ஆட்டத்தில், நடப்பு சாம்பியன் சென்னை சூப்பர் கிங்ஸ் (CSK) அணி, பஞ்சாப் கிங்ஸ் (PBKS) அணியை நாளை (ஏப்ரல் 3, வெள்ளிக்கிழமை) எதிர்கொள்கிறது. சென்னை சேப்பாக்கம் மைதானத்தில் இரவு 7:30 மணிக்கு இந்தப் போட்டி தொடங்கவுள்ளது.
சிஎஸ்கே அணியின் நட்சத்திர வீரர் எம்.எஸ். தோனி, இடது காலின் கெண்டைக்கால் தசைப்பிடிப்பு (Calf Strain) காரணமாகத் தொடரின் முதல் இரண்டு வாரப் போட்டிகளில் விளையாட மாட்டார் எனத் தெரிவிக்கப்பட்டுள்ளது. தற்போது அவர் தீவிரப் பயிற்சியில் ஈடுபட முடியாவிட்டாலும், வலைப்பயிற்சியின் போது இளம் வீரர்களுக்குத் தேவையான ஆலோசனைகளை வழங்கி வருகிறார். அவர் மீண்டும் களத்திற்குத் திரும்புவது குறித்து 13 நாட்களுக்குப் பிறகுதான் உறுதியாகத் தெரியும் என அணி நிர்வாகம் தரப்பில் கூறப்படுகிறது.
ராஜஸ்தான் ராயல்ஸ் அணிக்கு எதிரான முதல் போட்டியில் ஏற்பட்ட தோல்வி குறித்துச் செய்தியாளர்களிடம் பேசிய கேப்டன் ருதுராஜ் கெய்க்வாட்: முதல் போட்டியில் நாங்கள் தோல்வியடைந்திருந்தாலும் சோர்வடையவில்லை; அணி வீரர்கள் அனைவரும் பாசிட்டிவ் மனநிலையில் தான் உள்ளனர். அப்போட்டியில் டாஸ் வென்று முதலில் பேட்டிங் செய்யவே விரும்பினோம். ஆனால், ஆடுகளம் வேகப்பந்து வீச்சாளர்களுக்குச் சாதகமாக இருந்ததால் எதிர்பார்த்த ரன்களைக் குவிக்க முடியவில்லை. தவறுகளில் இருந்து பாடம் கற்றுக் கொண்டுள்ளோம். நாளை சொந்த மண்ணில் (சேப்பாக்கம்) ரசிகர்களின் ஆதரவுடன் நிச்சயம் வெற்றியைப் பெறுவோம்" என நம்பிக்கை தெரிவித்தார்.
இதையும் படிங்க: ஐபிஎல் 2026: 300-வது போட்டியில் மும்பை இந்தியன்ஸ் வெற்றி! கொல்கத்தாவை வீழ்த்தி ரோகித் சர்மா சாதனை!
தோனி இல்லாததால், சிஎஸ்கே அணியின் விக்கெட் கீப்பிங் பொறுப்பை சஞ்சு சாம்சன் கவனிப்பார் என எதிர்பார்க்கப்படுகிறது. மறுபுறம், ஸ்ரேயஸ் ஐயர் தலைமையிலான பஞ்சாப் கிங்ஸ் அணி, தனது முதல் வெற்றியைப் பதிவு செய்யத் தீவிரமாக உள்ளது.
இதையும் படிங்க: ஐபிஎல் 2026: RCB vs SRH - சின்னசாமி மைதானத்தில் பந்துவீச்சை தேர்வு செய்த பெங்களூரு!