மத்திய ஈரானின் இஸ்பஹான் மாகாணத்தில் உள்ள டோர்ச்சே (Dorcheh) நகரில் இன்று (பிப்ரவரி 24, 2026) காலை ஒரு இராணுவ ஹெலிகாப்டர் பயங்கர விபத்துக்குள்ளானது. பழங்கள் மற்றும் காய்கறிகள் விற்கும் பரபரப்பான மொத்த சந்தையின் மையப்பகுதியில் இந்த ஹெலிகாப்டர் மோதியதில் குறைந்தது நான்கு பேர் உயிரிழந்தனர். 

ஈரானிய அரசு தொலைக்காட்சி மற்றும் பிற அரசு ஊடகங்கள் தெரிவித்தபடி, இந்த ஹெலிகாப்டர் இராணுவத்தின் பயிற்சி பணியில் ஈடுபட்டிருந்தது. திடீரென ஏற்பட்ட தொழில்நுட்பக் கோளாறு காரணமாக ஹெலிகாப்டர் கட்டுப்பாட்டை இழந்து சந்தைக்குள் விழுந்ததாகக் கூறப்படுகிறது. விபத்தின் போது ஹெலிகாப்டர் தீப்பிடித்து எரிந்தது. உடனடியாக தீயணைப்புப் படையினர் விரைந்து வந்து தீயை அணைத்தனர்.

இறந்தவர்களில் ஹெலிகாப்டரின் விமானி மற்றும் துணை விமானி ஆகிய இருவரும் அடங்குவர். மேலும் சந்தையில் கடை வைத்திருந்த இரண்டு வியாபாரிகள் விபத்தில் சிக்கி உயிரிழந்தனர். விபத்து நடந்த இடத்தில் புகை மண்டலம் மற்றும் குப்பைகள் சிதறிய காட்சிகளை உள்ளடக்கிய வீடியோக்கள் சமூக ஊடகங்களில் வெளியாகி பரபரப்பை ஏற்படுத்தியுள்ளன. இந்த சம்பவம் ஈரானின் தலைநகர் தெஹ்ரானிலிருந்து தெற்கே சுமார் 330 கிலோமீட்டர் தொலைவில் உள்ள டோர்ச்சே நகரில் நிகழ்ந்தது. 

இதையும் படிங்க: அணு ஆயுதக் குறைப்பு விவகாரம்..!! மிரட்டும் டிரம்ப்.. அஞ்சாத ஈரான்..!! மீண்டும் பேச்சுவார்த்தை..!!

இஸ்பஹான் மாகாணம் ஈரானின் முக்கிய அணு சக்தி தளங்களில் ஒன்றை கொண்டிருப்பதால், இப்பகுதி மூலோபாய ரீதியில் முக்கியத்துவம் வாய்ந்தது. கடந்த ஜூன் மாதம் ஈரான்-இஸ்ரேல் இடையே ஏற்பட்ட போர் சூழலில் அமெரிக்கா இஸ்பஹானில் உள்ள அணு தளத்தை தாக்கியதாக ஈரான் குற்றம்சாட்டியிருந்தது குறிப்பிடத்தக்கது. இது ஈரானில் கடந்த ஒரு வாரத்தில் நிகழ்ந்த இரண்டாவது பெரிய விமான விபத்து ஆகும். 

கடந்த வாரம் மேற்கு ஈரானின் ஹமேடான் (Hamadan) மாகாணத்தில் ஒரு பழைய அமெரிக்க தயாரிப்பு F-4 போர் விமானம் பயிற்சியின் போது விபத்துக்குள்ளானது. அந்த விபத்தில் ஒரு விமானி உயிரிழந்தார்; மற்றொருவர் அதிர்ஷடவசமாக உயிர் தப்பினார். அந்த விபத்திற்கும் தொழில்நுட்பக் கோளாறே காரணம் என்று அரசு ஊடகங்கள் தெரிவித்தன. ஈரானின் விமானப் பாதுகாப்பு சாதனை கடந்த பல ஆண்டுகளாகவே கேள்விக்குள்ளாகியுள்ளது. 

1979 இஸ்லாமிய புரட்சிக்கு முன் வாங்கப்பட்ட பழைய விமானங்கள் மற்றும் ஹெலிகாப்டர்களுக்கு உரிய உதிரி பாகங்கள் கிடைப்பதில் அமெரிக்கா உள்ளிட்ட மேற்கத்திய நாடுகளின் தடைகள் காரணமாக சிரமங்கள் ஏற்படுகின்றன. இதனால் அடிக்கடி விபத்துகள் நிகழ்வதாக நிபுணர்கள் கருத்து தெரிவிக்கின்றனர். இந்த ஹெலிகாப்டர் விபத்து குறித்து அதிகாரப்பூர்வ விசாரணை தொடங்கியுள்ளதாக ஈரானிய அதிகாரிகள் அறிவித்துள்ளனர். மக்களிடையே பாதுகாப்பு குறித்த கவலைகள் எழுந்துள்ளன.

இதையும் படிங்க: ஈரானை விட்டு வெளியேறுங்கள்... இந்தியர்களுக்கு வெளியுறவு அமைச்சகம் அவசர எச்சரிக்கை!