ஜப்பானில் நடைபெற்று வரும் 2026 ஆசிய விளையாட்டுப் போட்டியில் இந்தியாவுக்கு ஸ்குவாஷ் விளையாட்டில் மற்றொரு பதக்கம் கிடைத்துள்ளது. கலப்பு இரட்டையர் பிரிவில் தமிழகத்தைச் சேர்ந்த ஜோஷ்னா சின்னப்பா மற்றும் வேலவன் செந்தில்குமார் ஜோடி வெண்கலப் பதக்கம் வென்று அசத்தியுள்ளது. இந்த வெற்றிக்கு தமிழகம் முழுவதும் பாராட்டுகள் குவிந்து வரும் நிலையில், முதல்-அமைச்சர் விஜய் இருவருக்கும் வாழ்த்து தெரிவித்துள்ளார்.
ஆசிய விளையாட்டின் ஸ்குவாஷ் கலப்பு இரட்டையர் காலிறுதியில் இந்திய ஜோடி, பிலிப்பைன்ஸ் வீரர்களான டேவிட் பெலினோ மற்றும் ஜெமிகா அரிபாடோவை எதிர்கொண்டது. இந்த ஆட்டத்தில் 11-3, 11-5 என்ற நேர் கேம்களில் வெற்றி பெற்ற ஜோஷ்னா-வேலவன் இணை அரையிறுதிக்கு முன்னேறியது. இதன் மூலம் இந்தியாவுக்கு குறைந்தபட்சம் வெண்கலப் பதக்கம் உறுதியானது.
ஜோஷ்னா சின்னப்பாவுக்கு இந்த ஆசிய விளையாட்டுப் பதக்கம் மிகவும் முக்கியத்துவம் வாய்ந்ததாக பார்க்கப்படுகிறது. 40 வயதான அவர் தொடர்ந்து 7-வது முறையாக ஆசிய விளையாட்டில் பங்கேற்று வருகிறார். இதன் மூலம் ஆசிய விளையாட்டு போட்டிகளில் அவர் பெற்ற பதக்கங்களின் எண்ணிக்கை 6 ஆக உயர்ந்துள்ளது. 2002-ம் ஆண்டு புசான் ஆசிய விளையாட்டில் அறிமுகமான அவர், நீண்ட காலமாக இந்திய ஸ்குவாஷ் அணியின் முக்கிய வீராங்கனையாக இருந்து வருகிறார்.
இதையும் படிங்க: ஈரானை வீழ்த்தி தங்கம்! ஆசிய விளையாட்டில் இந்திய மகளிர் கபடி அணி அபாரம்! கடைசி வரை பரபரப்பு!
மறுபுறம், 28 வயதான வேலவன் செந்தில்குமாருக்கு இது முதல் ஆசிய விளையாட்டுப் போட்டியாகும். முதல் பங்கேற்பிலேயே பதக்கம் வென்றிருப்பது அவரது சர்வதேச விளையாட்டு பயணத்தில் முக்கியமான மைல்கல்லாக அமைந்துள்ளது. இருவரும் தமிழ்நாட்டைச் சேர்ந்தவர்கள் என்பதால், இந்த வெற்றி தமிழக விளையாட்டு ரசிகர்களிடையே கூடுதல் கவனத்தை பெற்றுள்ளது.
இந்த நிலையில், ஜோஷ்னா சின்னப்பா மற்றும் வேலவன் செந்தில்குமாருக்கு முதல்-அமைச்சர் விஜய் வாழ்த்து தெரிவித்துள்ளார். இந்தியாவுக்கும் தமிழ்நாட்டுக்கும் பெருமை சேர்த்த இருவரின் சாதனையை பாராட்டிய அவர், தமிழக அரசின் சார்பில் இருவருக்கும் தலா ரூ.30 லட்சம் ஊக்கத்தொகை வழங்கப்படும் என அறிவித்துள்ளார். இதன்படி இருவருக்கும் சேர்த்து ரூ.60 லட்சம் வழங்கப்பட உள்ளது.
இளம் தலைமுறை விளையாட்டு வீரர்களுக்கு இவர்களின் வெற்றி புதிய நம்பிக்கையை ஏற்படுத்தும் என்றும், திறமையான வீரர்களுக்கு தமிழக அரசு தொடர்ந்து ஆதரவளிக்கும் என்றும் விஜய் தெரிவித்துள்ளார்.
இதையும் படிங்க: ஈரானை வீழ்த்தி தங்கம்! ஆசிய விளையாட்டில் இந்திய மகளிர் கபடி அணி அபாரம்! கடைசி வரை பரபரப்பு!