கேரளாவின் இடுக்கி மாவட்டம், மூணாறு அருகே நடந்த திரைப்படப் ஷூட்டிங்கின்போது ஏற்பட்ட ஜீப் விபத்தில் மலையாளத் திரையுலகின் பிரபல நடிகர் ஜோஜூ ஜார்ஜ் உள்ளிட்ட நான்கு பேர் காயமடைந்துள்ளனர். இந்த சம்பவம் நேற்று மாலை தலையாறு அருகே நிகழ்ந்தது. லேசான காயங்கள் தான் என்று மருத்துவமனை வட்டாரங்கள் தெரிவித்துள்ளன. இது மலையாளத் திரையுலகில் பெரும் அதிர்ச்சியை ஏற்படுத்தியுள்ளது.

இயக்குநர் ஷாஜி கைலாஷ் இயக்கத்தில் உருவாகும் ‘வரவு’ என்ற படத்தின் ஷூட்டிங் தளத்தில் இந்த விபத்து ஏற்பட்டது. ஜோஜூ ஜார்ஜ் ஜீப்பில் சென்று கொண்டிருக்கும் காட்சி படமாக்கப்பட்ட போது வாகனம் திடீரென பள்ளத்தில் கவர்ந்ததால் விபத்து ஏற்பட்டுள்ளது. இதில் ஜோஜூவுடன் இருந்த நடிகர் தீபக் பரம்போல், ஒரு ஸ்டண்ட்மேன் மற்றும் மற்றொரு நடிகர் காயமடைந்தனர். விபத்துக்குப் பின், அனைவரும் உடனடியாக மூணாறில் உள்ள மருத்துவமனைக்கு கொண்டு செல்லப்பட்டனர். அங்கு அவர்களுக்கு சிகிச்சை அளிக்கப்பட்டது. 

இதையும் படிங்க: #BREAKING: நடிகர் ரோபோ சங்கர் காலமானார்.. அதிர்ச்சியில் சினிமாத் துறையினர்..!!

ஜோஜூ ஜார்ஜ், ‘ஜோசப்’ படத்தில் நடித்ததன் மூலம் தேசிய அளவில் புகழ் பெற்றவர். அவர் தற்போது ‘வலது வாசதே கள்ளன்’, ‘ஆஷா’ போன்ற பல்வேறு படங்களில் நடித்து வருகிறார். மேலும் இவர் தமிழில் ஜகமே தந்திரம், சூர்யாவுடன் ரெட்ரோ, கமல்ஹாசன் உடன் தக்லைஃப் ஆகிய திரைப்படங்களில் நடித்து கவனம் பெற்றார். நடிகராக மட்டுமில்லாமல் தயாரிப்பாளராகவும் 7 திரைப்படங்களை தயாரித்துள்ளார்.  இயக்குனராக 'பனி' என்ற படத்தை இயக்கி அதிலும் வெற்றி கண்டார்.

இந்த சம்பவம், திரைப்பட ஷூட்டிங் தளங்களில் பாதுகாப்பு நடவடிக்கைகளின் முக்கியத்துவத்தை மீண்டும் நினைவூட்டுகிறது. கடந்த ஆண்டுகளில் கேரளாவில் பல திரைப்பட விபத்துகள் ஏற்பட்டுள்ளன, இதனால் துறையில் பாதுகாப்பு வழிகாட்டுதல்கள் வலுப்படுத்தப்பட்டன. ‘வரவு’ படத்தின் தயாரிப்பு குழு, விபத்து குறித்து உத்தியோகபூர்வ அறிக்கை வெளியிடவில்லை, ஆனால் படப்பிடிப்பு தொடரும் என்று தெரிகிறது.

இடுக்கி காவல்துறையினர் விபத்து குறித்து விசாரணை நடத்தி வருகின்றனர். மூணாறின் சுற்றுச்சூழல் மற்றும் சாலை நிலை காரணமாக இத்தகைய விபத்துகள் ஏற்படுவதாக உள்ளூர் மக்கள் கூறுகின்றனர். நடிகர் ஜோஜூவின் ரசிகர்கள் சமூக வலைதளங்களில் அவர் விரைவாக குணமடைய வாழ்த்து தெரிவித்து வருகின்றனர். இந்த விபத்து, திரையுலக ஊழியர்களின் பாதுகாப்பை உறுதி செய்யும் அவசியத்தை வலியுறுத்துகிறது.

சில மாதங்களுக்கு முன்பு தக்லைஃப் படப்பிடிப்பின் போது நடந்த விபத்தில், நடிகர் ஜோஜு ஜார்ஜ்க்கு காலில் எலும்பு முறிவு ஏற்பட்டது என்பது குறிப்பிடத்தக்கது.
 

இதையும் படிங்க: அடடே.. தயாரிப்பாளராக அவதாரம் எடுக்கும் பிரபல மலையாள நடிகர்..! லோகோ சும்மா அள்ளுதே..!!