தமிழ் சினிமாவின் அடையாளங்களில் ஒருவராகவும், கிராமத்து வாழ்க்கையின் மண்வாசனையை வெள்ளித்திரையில் உயிர்ப்பித்த படைப்பாளராகவும் போற்றப்பட்ட இயக்குநர் பாரதிராஜா இன்று காலமானார். உடல்நலக்குறைவு காரணமாக கடந்த சில நாட்களாக சென்னையில் உள்ள அவரது இல்லத்தில் மருத்துவர்கள் கண்காணிப்பில் சிகிச்சை பெற்று வந்த நிலையில், இன்று உயிரிழந்ததாக தகவல் வெளியாகியுள்ளது. அவருக்கு வயது 84.

இந்த செய்தி வெளியாகியவுடன் தமிழ் திரையுலகம் முழுவதும் அதிர்ச்சியும் சோகமும் நிலவுகிறது. நடிகர்கள், இயக்குநர்கள், தயாரிப்பாளர்கள், அரசியல் தலைவர்கள், இலக்கிய ஆளுமைகள் மற்றும் ரசிகர்கள் சமூக வலைதளங்கள் மூலம் தங்களது இரங்கலையும் அஞ்சலியையும் செலுத்தி வருகின்றனர். பல தலைமுறைகளாக தமிழ் சினிமாவின் வளர்ச்சியில் முக்கிய பங்காற்றிய கலைஞரை இழந்த துயரத்தில் திரையுலகம் மூழ்கியுள்ளது.

பாரதிராஜாவின் மறைவு தொடர்பான தகவல் வெளியான சில நிமிடங்களிலேயே சமூக வலைதளங்களில் இரங்கல் பதிவுகள் குவியத் தொடங்கின. அந்த வகையில் நடிகையும், தமிழ்நாடு பா.ஜ.க. துணைத் தலைவருமான குஷ்பு வெளியிட்டுள்ள இரங்கல் பதிவு ரசிகர்களிடையே பெரும் கவனத்தை ஈர்த்துள்ளது. தனது எக்ஸ் தளத்தில் அவர் பகிர்ந்துள்ள பதிவு, பாரதிராஜாவுடனான தனிப்பட்ட நினைவுகளையும், அவர்மீதான மரியாதையையும் வெளிப்படுத்தும் வகையில் அமைந்துள்ளது.

இதையும் படிங்க: முடிந்தது ஒரு சகாப்தம்..!! இனி "என் இனிய தமிழ் மக்களே" குரலை கேட்க முடியாது.. உலகைவிட்டு மறைந்த பாரதிராஜாவின் வரலாறு தெரியுமா..!

குஷ்பு தனது பதிவில், “நம் அனைவராலும் மிகவும் நேசிக்கப்பட்ட, போற்றப்பட்ட மற்றும் மதிக்கப்பட்ட இயக்குநரும், புகழ்பெற்றவருமான பாரதிராஜா நம்முடன் இல்லை என்பதை அறிந்து பேரதிர்ச்சி அடைந்தேன். அவரது மறைவு தமிழ் சினிமாவில் ஒரு பெரும் சோகமாக அமைந்துள்ளது. அவரது படங்கள் திரைப்பட உருவாக்கத்திற்கு ஒரு அளவுகோலாகத் திகழ்ந்துள்ளன; இனியும் அவ்வாறே இருக்கும். ஒவ்வொரு சினிமா ரசிகருக்கும் அவர் ஒரு மாபெரும் பாரம்பரியத்தை விட்டுச் செல்கிறார்” என்று குறிப்பிட்டுள்ளார்.

மேலும், தனது மனதை நெகிழச் செய்த ஒரு தனிப்பட்ட நினைவையும் அவர் பகிர்ந்துள்ளார். “எப்போதும் என்னிடம், ‘உங்களை இரண்டு பின்னல் சிகை அலங்காரத்தில் வைத்து ஒரு படம் செய்வோம்’ என்று கூறுவார். ஆனால் அந்த ஆசை நிறைவேறாத கனவாகவே இருந்து விடும். உங்களை நினைத்து மிகவும் வருந்துவேன். உங்கள் ஆன்மா சாந்தியடையட்டும். ஓம் சாந்தி” என அவர் உருக்கமாக பதிவிட்டுள்ளார்.

குஷ்புவின் இந்த பதிவு சமூக வலைதளங்களில் பரவலாக பகிரப்பட்டு வருகிறது. பல ரசிகர்கள், “ஒரு தலைமுறையின் கனவுகளை உருவாக்கிய கலைஞருக்கான உண்மையான அஞ்சலி இது” என்று கருத்து தெரிவித்து வருகின்றனர். சிலர், பாரதிராஜா உருவாக்கிய பெண்கள் கதாபாத்திரங்கள் மற்றும் கிராமத்து சூழலை நினைவுகூர்ந்து தங்களது அஞ்சலியை செலுத்தி வருகின்றனர்.

தமிழ் சினிமாவை ஸ்டூடியோ சுவர்களிலிருந்து வெளியே கொண்டு வந்து, இயற்கையின் மத்தியில் கதைகளை சொல்லிய இயக்குநராக பாரதிராஜா அறியப்பட்டார். கிராமங்களின் வாழ்க்கை முறைகள், காதல், குடும்ப உறவுகள், சமூக மாற்றங்கள் மற்றும் மனித உணர்வுகளை திரையில் இயல்பாக பதிவு செய்த அவரது படைப்புகள், இன்றளவும் சினிமா மாணவர்களுக்கும் இயக்குநர்களுக்கும் பாடமாகக் கருதப்படுகின்றன.

1977-ஆம் ஆண்டு வெளியான ‘16 வயதினிலே’ திரைப்படத்தின் மூலம் இயக்குநராக அறிமுகமான அவர், தனது முதல் படத்திலேயே தமிழ் சினிமாவில் ஒரு புதிய மொழியை உருவாக்கினார். அதன் பின்னர் ‘கிழக்கே போகும் ரயில்’, ‘அலைகள் ஓய்வதில்லை’, ‘முதல் மரியாதை’, ‘மண்ண்வாசனை’, ‘வேதம் புதிது’, ‘கருத்தம்மா’ உள்ளிட்ட ஏராளமான வெற்றிப் படங்களை இயக்கினார். அவரது திரைப்படங்கள் வெறும் வணிக வெற்றிகளை மட்டுமல்ல, சமூக சிந்தனைகளையும் உருவாக்கியவை என்பதே குறிப்பிடத்தக்கது.

இயக்குநராக மட்டுமின்றி நடிகராகவும் பாரதிராஜா தனக்கென ஒரு அடையாளத்தை உருவாக்கினார். பல திரைப்படங்களில் குணச்சித்திர வேடங்களில் நடித்த அவர், தனது அனுபவமும் இயல்பான நடிப்பும் மூலம் பார்வையாளர்களின் பாராட்டைப் பெற்றார். சமீப ஆண்டுகளிலும் திரைத்துறையில் தொடர்ந்து செயல்பட்டு வந்தது அவரது கலை மீது கொண்டிருந்த அர்ப்பணிப்பை வெளிப்படுத்தியது.

பாரதிராஜாவின் மறைவு தமிழ் திரைப்பட உலகிற்கு ஈடு செய்ய முடியாத இழப்பாகக் கருதப்படுகிறது. பல தலைமுறைகளுக்கு சினிமா என்ற கலை வடிவத்தின் உண்மையான அர்த்தத்தை எடுத்துக்காட்டிய படைப்பாளி அவர். கிராமத்தின் மண்வாசனையை உலக அரங்கில் கொண்டு சென்ற இயக்குநராகவும், மனித உணர்வுகளை மிக இயல்பாக பதிவு செய்த கதைசொல்லியாகவும் அவர் என்றும் நினைவுகூரப்படுவார்.

இன்று அவரது உடல் பொதுமக்கள் அஞ்சலிக்காக வைக்கப்படும் என எதிர்பார்க்கப்படும் நிலையில், ஆயிரக்கணக்கான ரசிகர்கள் இறுதி அஞ்சலி செலுத்த தயாராகி வருகின்றனர். திரையுலகின் பல முன்னணி நட்சத்திரங்களும் அவரது இல்லத்திற்கு சென்று குடும்பத்தினருக்கு ஆறுதல் தெரிவித்து வருகின்றனர்.

காலம் மாறினாலும், தொழில்நுட்பம் வளர்ந்தாலும், தமிழ் சினிமாவில் “பாரதிராஜா பாணி” என்ற சொல்லுக்கு இருக்கும் மதிப்பு ஒருபோதும் குறையாது என்று திரையுலக வட்டாரங்கள் கூறுகின்றன. அவரது உடல் இன்றோ மறைந்திருக்கலாம்; ஆனால் அவர் உருவாக்கிய கதைகளும், திரையில் உயிர்பெற்ற மனிதர்களும், தலைமுறைகளை கடந்தும் வாழ்ந்துகொண்டே இருக்கும். தமிழ் சினிமாவின் வரலாற்றில் அழியாத அத்தியாயமாக பாரதிராஜாவின் பெயர் என்றும் நிலைத்திருக்கும் என்பது ரசிகர்களின் ஒருமித்த கருத்தாக உள்ளது.

இதையும் படிங்க: முடிந்தது ஒரு சகாப்தம்..!! இனி "என் இனிய தமிழ் மக்களே" குரலை கேட்க முடியாது.. உலகைவிட்டு மறைந்த பாரதிராஜாவின் வரலாறு தெரியுமா..!