அரசியல் களத்தில் நேற்று நடைபெற்ற த.வெ.க. (தமிழக வெற்றி கழகம்) மூன்றாம் ஆண்டு தொடக்க விழா, அரசியல் மட்டுமின்றி சமூக மற்றும் மத உணர்வுகள் சார்ந்த சர்ச்சைகளாலும் பரபரப்பை ஏற்படுத்தியுள்ளது. சென்னை அருகே பனையூரில் உள்ள த.வெ.க. அலுவலகத்தில் நடைபெற்ற இந்த விழாவில், கட்சித் தலைவர் நடிகர் விஜய் பங்கேற்று உரையாற்றினார். ஆனால், விழாவின் ஒரு கட்டத்தில் அரங்கேறிய கலை நிகழ்ச்சி தான், தற்போது பல்வேறு தரப்பினரின் கவனத்தையும் எதிர்ப்பையும் ஒருசேர ஈர்த்துள்ளது.

விழாவில் பாடப்பட்ட ஒரு பாடலில், நடிகர் விஜயை முருகக் கடவுளாக உருவகப்படுத்தி வரிகள் அமைக்கப்பட்டதாக கூறப்படுகிறது. அந்த பாடலின் போது, மேடையில் இருந்த விஜயும் அந்த பாடலுக்கு ஏற்ப ஆடியது, பக்தர்கள் மற்றும் மத உணர்வுள்ள மக்களிடையே கடும் அதிர்ச்சியையும் அதிருப்தியையும் ஏற்படுத்தியுள்ளது. சமூக வலைதளங்களில் இந்த காட்சிகள் பரவியதைத் தொடர்ந்து, “ஒரு அரசியல் தலைவரை கடவுளுடன் ஒப்பிடுவது எந்த அளவுக்கு சரியானது?” என்ற கேள்வி பலமாக எழுந்துள்ளது. குறிப்பாக, முருக பக்தர்கள் சிலர், இது அவர்களின் நம்பிக்கையை புண்படுத்துவதாகவும், அரசியலில் மதத்தை இழுத்து வருவது தவறான முன்னுதாரணம் எனவும் விமர்சனம் முன்வைத்து வருகின்றனர்.

இதனிடையே, த.வெ.க. விழாவில் விஜய் ஆற்றிய அரசியல் உரை, அவரது ஆதரவாளர்களிடையே உற்சாகத்தை ஏற்படுத்தியுள்ளதுடன், எதிர்க்கட்சிகளிடையே கடும் விமர்சனங்களையும் தூண்டியுள்ளது. தனது உரையில், தமிழக அரசியல் வரலாற்றை எடுத்துக்காட்டி பேசிய விஜய், 1977ஆம் ஆண்டு எம்.ஜி.ஆர். கூறிய ஒரு கருத்தை நினைவுகூர்ந்தார். “அண்ணாதுரை இருந்த இடத்தில் இப்படிப்பட்டவர்கள் அமர்ந்து விட்டார்களே என்று மக்கள் கண்ணீர் வடித்தனர். அந்த கண்ணீரை துடைக்க தான் அ.தி.மு.க. தொடங்கப்பட்டது” என்று எம்.ஜி.ஆர். கூறியதாக அவர் நினைவூட்டினார். அதேபோல், இன்றைய அரசியல் சூழ்நிலையையும் ஒப்பிட்டு பேசிய விஜய், “இன்று காமராஜர், அண்ணாதுரை, எம்.ஜி.ஆர். இருந்த இடத்தில் இப்படிப்பட்டவர்கள் அமர்ந்து விட்டார்களே என்று மக்கள் மீண்டும் கண்ணீர் வடிக்கின்றனர்.

இதையும் படிங்க: 'With Love' படத்திற்கு certificate கொடுத்த ரஜினி காந்த்..! மகிழ்ச்சியில் துள்ளிக்குதித்த படக்குழு..!

அந்த கண்ணீரை துடைக்கவே த.வெ.க. தொடங்கப்பட்டுள்ளது” என்று கூறினார். இந்த ஒப்பீடு, தன்னை எம்.ஜி.ஆரின் அரசியல் பாதையில் பயணிக்கும் தலைவராக காட்டும் முயற்சி என அரசியல் பார்வையாளர்கள் கருதுகின்றனர். மேலும், தனது அரசியல் அனுபவம் குறித்து எழும் விமர்சனங்களுக்கும் விஜய் பதிலளித்தார். “விஜய்க்கு என்ன அரசியல் அனுபவம் இருக்கிறது? எம்.ஜி.ஆருக்கு அரசியல் அனுபவம் தெரியுமா?” என்று இன்று கேள்வி எழுப்பும் அதே வாய்கள் தான், அன்று எம்.ஜி.ஆரை ‘அரசியல் அரிச்சுவடி தெரியாதவர்’, ‘விளம்பரத்திலேயே வாழும் அட்டக்கத்தி வீரன்’, ‘செய்தியாளர்களை சந்திக்க தெரியாதவர்’, ‘டில்லிக்கு அஞ்சுபவர்’ என்று விமர்சித்ததாக அவர் சுட்டிக்காட்டினார். ஆனால், அந்த விமர்சனங்களை எல்லாம் மீறி, எம்.ஜி.ஆர். அமோக வெற்றி பெற்று ஆட்சியை கைப்பற்றியதை நினைவுபடுத்தினார்.

“அன்று பழுத்த அனுபவசாலிகள் என்று சொல்லப்பட்டவர்களுக்கே, கோட்டை நாற்காலி பகல் கனவாகி விட்டது” என விஜய் கூறியபோது, மேடையில் இருந்த தொண்டர்கள் உற்சாக கோஷங்களை எழுப்பினர். மேலும், “தங்களை எதிர்த்து யார் நின்றாலும், அவர்களை சிறுமைப்படுத்துவது தான் சிலரின் வேலை. அரசின் அராஜகங்களை, ஊழல்களை சுட்டிக்காட்டினால், 50 ஆண்டுகள் பழைய தகர டப்பாவை உருட்ட ஆரம்பித்து விடுவார்கள்” எனவும் அவர் கடுமையாக விமர்சித்தார்.

தற்போதைய அரசியல் கூட்டணிகள் குறித்தும் விஜய் பேசினார். “ஒருபக்கம் தி.மு.க. தலைமையில் சில கட்சிகள், மறுபக்கம் பா.ஜ. தலைமையில் சில கட்சிகள் இருக்கின்றன. ஆனால், எத்தனை சக்திகள் வந்தாலும், தீய சக்தியை வீழ்த்த துாய சக்தி நம்மால் மட்டுமே முடியும்” என்று கூறி, த.வெ.க. தனித்த அரசியல் பாதையில் பயணிப்பதை மீண்டும் வலியுறுத்தினார்.

முதல்வர் ஸ்டாலின் குறித்து பேசிய விஜய், “என் கட்சியினரும் அமைச்சர்களும் செய்யும் அடாவடியை பார்க்கும்போது, எனக்கு தூக்கமே இல்லை என்று முதல்வர் சில ஆண்டுகளுக்கு முன் வருத்தப்பட்டார். அவர் எப்போதாவது அசதியாக தூங்கும்போது எழுப்பி, ‘யாருக்கு ஓட்டு போடுவீர்கள்?’ என்று கேட்டால், அவரை அறியாமலேயே ‘விசில்’ என்று உண்மையை சொல்லிவிடுவார்” என நகைச்சுவை கலந்து விமர்சித்தார். இந்த கருத்து, விழாவில் இருந்த தொண்டர்களிடையே பெரும் கைதட்டலை பெற்றது.

மேலும், சமீப கால கருத்துக்கணிப்புகள் குறித்தும் விஜய் பேசினார். “பலர் உண்மையைச் சொல்கின்றனர். ஆனால், சிலர் நம் மீது உள்ள வெறுப்பால் கடுப்பு கணிப்புகளை வெளியிடுகின்றனர்” என்று கூறிய அவர், “பழைய இன்ஜின், ஓட்டை இன்ஜின் என எத்தனை இன்ஜின்கள் வந்தாலும், த.வெ.க. தான் டாப் இன்ஜின்” என்று கூறி, தேர்தலில் மக்கள் ஊதும் ‘விசில்’ சத்தத்தால் தீய சக்திகளும் ஊழல் சக்திகளும் தெறித்து ஓடும் என நம்பிக்கை தெரிவித்தார்.

ஆனால், இந்த அரசியல் உரையை விட, விஜயை முருகக் கடவுளாக உருவகப்படுத்திய பாடல் விவகாரம் தான் தற்போது அதிகமாக பேசப்பட்டு வருகிறது. அரசியல் தலைவர்களின் மீதான புகழ்ச்சியும், மதச் சின்னங்களுடன் அவர்களை இணைப்பதும், தமிழக அரசியலில் புதிய சர்ச்சைகளுக்கு வழிவகுக்கும் என அரசியல் விமர்சகர்கள் எச்சரிக்கின்றனர். ஒரு பக்கம், விஜய் ரசிகர்கள் இதை ஒரு கலை வெளிப்பாடு என ஆதரிக்க, மறுபக்கம், பக்தர்கள் மற்றும் சமூக ஆர்வலர்கள் இது ஆபத்தான போக்கு என கண்டனம் தெரிவித்து வருகின்றனர்.

மொத்தத்தில், த.வெ.க. மூன்றாம் ஆண்டு விழா, விஜயின் அரசியல் நோக்கத்தை வெளிப்படுத்திய மேடையாக அமைந்தாலும், அதே நேரத்தில் மத உணர்வுகள் தொடர்பான சர்ச்சையால் புதிய விவாதங்களையும் கிளப்பியுள்ளது. இந்த விவகாரம், வரும் நாட்களில் தமிழக அரசியல் சூழலில் எவ்வாறு தாக்கத்தை ஏற்படுத்தும் என்பது கவனிக்கத்தக்கதாக உள்ளது.

இதையும் படிங்க: சாதாரண அழகில் இருந்து பேரழகியாக மாறிய நடிகை ரகுல் ப்ரீத் சிங்..!