தயாரிப்பாளரும், அறிமுக இயக்குநருமான ஆகாஷ் பாஸ்கரன் இயக்கத்தில், நடிகர் அதர்வா நடிப்பில் உருவாகியுள்ள திரைப்படம் ‘இதயம் முரளி’. பெரும் எதிர்பார்ப்புகளுக்கு மத்தியில் இன்று திரையரங்குகளில் வெளியாகியுள்ள இந்தப் படம், காதல், நினைவுகள், இளமைக்கால உணர்வுகள் மற்றும் வாழ்க்கையின் முக்கியமான முடிவுகள் ஆகியவற்றை மையமாகக் கொண்டு உருவாக்கப்பட்டுள்ளது. காதலை வெளிப்படுத்த முடியாமல் தவிக்கும் ஒருவரின் பயணத்தை சொல்ல முயற்சிக்கும் இப்படம், சில இடங்களில் மனதைத் தொடும் தருணங்களை கொடுத்தாலும், முழுமையான திருப்தியை வழங்குவதில் சற்று தடுமாறுகிறது.
படத்தின் தொடக்கமே அதர்வாவின் திருமண ஏற்பாடுகளுடன் ஆரம்பமாகிறது. வீட்டில் திருமண வேலைகள் பரபரப்பாக நடைபெற்று வருகின்றன. அதர்வாவின் தாய் மாமன் கதாபாத்திரத்தில் நடித்துள்ள நட்டி நட்ராஜ், திருமண ஏற்பாடுகளை முன்னின்று கவனித்து வருகிறார். திருமணம் மறுநாள் நடைபெற உள்ள நிலையில், மாப்பிள்ளையான அதர்வா வெளிநாட்டில் இருப்பது குடும்பத்தினருக்கு சற்று பதற்றத்தை ஏற்படுத்துகிறது.
இதையடுத்து, வெளிநாட்டில் இருந்து தனது நண்பர்களுடன் அதர்வா சென்னைக்கு புறப்படுகிறார். விமானப் பயணத்தின் போது பகத் பாசிலை சந்திக்கும் அவர், தனது வாழ்க்கையில் நடந்த காதல் சம்பவங்களை அவரிடம் பகிரத் தொடங்குகிறார். இதன் மூலம் படம் பின்னோக்கி சென்று, அதர்வாவின் இளமைக்கால காதல் கதையை ரசிகர்களுக்கு அறிமுகப்படுத்துகிறது.
இதையும் படிங்க: சுதா கொங்கரா மனுவால் வந்த சிக்கல்.. 'இதயம் முரளி' படத்திற்கு தடையா..!! சென்னை உயர்நீதிமன்றம் வழங்கிய முக்கிய உத்தரவு..!!
பள்ளி பருவத்தில் ப்ரீத்தி முகுந்தனை பார்க்கும் அதர்வா, முதல் பார்வையிலேயே அவரை காதலிக்கத் தொடங்குகிறார். அந்த வயதுக்கே உரிய தயக்கம், ஈர்ப்பு மற்றும் சொல்ல முடியாத காதல் உணர்வு ஆகியவை படத்தில் காட்சிப்படுத்தப்படுகின்றன. ப்ரீத்தி செல்லும் டியூஷன் சென்டர், டென்னிஸ் விளையாடும் இடம் என அவரை பின்தொடரும் அதர்வா, ஒரு கட்டத்தில் தனது காதலை எப்படியாவது வெளிப்படுத்த வேண்டும் என்று முடிவு செய்கிறார்.
அந்த வாய்ப்பு ப்ரீத்தியின் பிறந்தநாள் கொண்டாட்டத்தில் கிடைக்கிறது. தனது காதலை சொல்லும் எண்ணத்துடன் அவரது வீட்டிற்கு செல்லும் அதர்வாவுக்கு அங்கு மிகப்பெரிய அதிர்ச்சி காத்திருக்கிறது. ப்ரீத்தி ஒருவர் அல்ல, இரட்டையர்கள் என்பது தெரிய வருகிறது. இதனால் இதுவரை தான் காதலித்தது யார் என்ற குழப்பத்தில் சிக்குகிறார் அதர்வா. அந்த அதிர்ச்சியால் தனது காதலை வெளிப்படுத்த முடியாமல் போகிறது.
காலம் நகர்கிறது. பள்ளி பருவ காதல் நிறைவேறாமல் போன நிலையில், தற்போது சென்னைக்கு வரும் அதர்வா, மருத்துவக் கல்லூரியில் படித்து வரும் கயாடு லோஹரை சந்திக்கிறார். அவரைப் பார்த்ததும் மீண்டும் காதல் உணர்வு உருவாகிறது. இருவரும் பழகத் தொடங்குகின்றனர். ஆனால், வழக்கம் போல தனது காதலை வெளிப்படுத்த அதர்வா தயங்குகிறார்.
கல்லூரி முடிந்து கயாடு தனது சொந்த ஊருக்கு செல்லும் நேரத்தில், ரயில் நிலையத்தில் தனது காதலை சொல்ல வேண்டும் என்று அதர்வா முடிவு செய்கிறார். ஆனால், அந்த தருணத்திலும் அவரால் தனது மனதில் இருப்பதை வெளிப்படுத்த முடியாமல் போகிறது. இப்படியாக வாழ்க்கையில் சந்திக்கும் பெண்களிடம் காதலை சொல்ல முடியாமல் தவிக்கும் அதர்வா, இறுதியில் தனது காதலை வெளிப்படுத்தினாரா? அல்லது குடும்பத்தினர் பார்த்து வைத்த பெண்ணை திருமணம் செய்து கொண்டாரா? என்பதே படத்தின் மீதிக்கதை.
அறிமுக இயக்குநர் ஆகாஷ் பாஸ்கரன் தேர்வு செய்துள்ள கதைக்களம் சுவாரஸ்யமானது. காதலை சொல்ல முடியாமல் மனதிற்குள் வைத்துக்கொண்டு தவிக்கும் மனிதர்களின் உணர்வுகளை மையமாகக் கொண்டிருப்பது படத்தின் முக்கிய பலமாக அமைந்துள்ளது. குறிப்பாக, இளமைக்கால காதல் நினைவுகள் மற்றும் வாழ்க்கையில் தவறவிட்ட வாய்ப்புகள் போன்ற அம்சங்களை மையமாக வைத்து கதை நகர்த்திய விதம் கவனிக்க வைக்கிறது.
ஆனால், கதையின் வலிமைக்கு ஏற்ப திரைக்கதை அமைக்கப்படாதது படத்தின் மிகப்பெரிய குறையாக மாறியுள்ளது. தொடக்கத்தில் ஆர்வத்தை ஏற்படுத்தும் காட்சிகள் இருந்தாலும், அதன்பிறகு வரும் பகுதிகளில் வேகம் குறைகிறது. கதாபாத்திரங்களின் உணர்வுகளுடன் பார்வையாளர்கள் முழுமையாக இணைந்து பயணிக்க முடியாத நிலை ஏற்படுகிறது.
குறிப்பாக, அதர்வா தனது காதலை சொல்லப் போகும் தருணங்களில் ரசிகர்களுக்கும் அந்த பதற்றம், எதிர்பார்ப்பு மற்றும் உணர்ச்சி ஏற்பட வேண்டும். ஆனால், அந்த முக்கியமான தருணங்களை வலுவாக உருவாக்குவதில் திரைக்கதை சற்று பின்னடைவை சந்திக்கிறது. காதலின் வலி மற்றும் தவிப்பை இன்னும் அழுத்தமாக காட்சிப்படுத்தியிருக்கலாம் என்ற எண்ணம் ஏற்படுகிறது. எடிட்டிங் பணியிலும் சில இடங்களில் குறைகள் தெரிகின்றன.
சில காட்சிகள் நீளமாக இருப்பதால் சற்று சலிப்பு ஏற்படுகிறது. கதையின் வேகத்தை அதிகரிக்கும் வகையில் காட்சிகள் தொகுக்கப்பட்டிருந்தால், படத்தின் தாக்கம் இன்னும் அதிகமாக இருந்திருக்கும். நடிப்பைப் பொறுத்தவரை அதர்வா, ப்ரீத்தி முகுந்தன் மற்றும் கயாடு லோஹர் ஆகியோர் தங்களது கதாபாத்திரங்களுக்கு நியாயம் செய்துள்ளனர். குறிப்பாக, காதலில் ஏற்படும் குழப்பம் மற்றும் தயக்கத்தை வெளிப்படுத்தும் காட்சிகளில் அதர்வா சிறப்பாக நடித்துள்ளார். ப்ரீத்தி முகுந்தனும், கயாடு லோஹரும் தங்களுக்கு கிடைத்த கதாபாத்திரங்களை சிறப்பாக கையாண்டுள்ளனர்.
படத்தின் மிகப்பெரிய ஆறுதலாக அமைவது பகத் பாசிலின் கதாபாத்திரம். குறிப்பாக கிளைமாக்ஸ் பகுதியில் அவரது நடிப்பு படத்திற்கு கூடுதல் பலம் சேர்க்கிறது. அதேபோல் சுதாகர் தனது வழக்கமான நகைச்சுவை பாணியில் ரசிகர்களை கவர்கிறார். ரக்ஷன், தமன், நிஹாரிகா, டிராவிட், ஏஞ்சலின், ஜோனிடா காந்தி உள்ளிட்டோரின் பங்களிப்பும் படத்திற்கு துணையாக அமைந்துள்ளது. சில பிரபலங்களின் சர்ப்ரைஸ் தோற்றங்களும் ரசிகர்களை கவரும் வகையில் அமைந்துள்ளன.
இசையை பொறுத்தவரை தமன் படத்தின் மிகப்பெரிய பலமாக இருக்கிறார். பாடல்கள் மட்டுமின்றி பின்னணி இசையிலும் தனது திறமையை வெளிப்படுத்தியுள்ளார். காதல் காட்சிகளுக்கு தேவையான உணர்வை இசை மூலம் உருவாக்க முயற்சி செய்துள்ளார். படத்தில் பயன்படுத்தப்பட்டுள்ள சில பழைய கிளாசிக் பாடல்களும் கவனம் ஈர்க்கின்றன.
ஒளிப்பதிவு படத்திற்கு மற்றொரு பலம். வெளிநாட்டு காட்சிகளாக இருந்தாலும் சரி, 90-களின் காலகட்டத்தை பிரதிபலிக்கும் காட்சிகளாக இருந்தாலும் சரி, அவை அனைத்தும் வண்ணமயமாகவும் ரசிக்கும்படியும் காட்சிப்படுத்தப்பட்டுள்ளன. தொழில்நுட்ப ரீதியாக சில விஷயங்கள் இன்னும் மேம்படுத்தப்பட்டிருக்கலாம் என்றாலும், ஒட்டுமொத்தமாக காட்சியமைப்பு சிறப்பாக உள்ளது.
மொத்தத்தில், ‘இதயம் முரளி’ நல்ல கதைக்கருவுடன் உருவாக்கப்பட்ட ஒரு காதல் திரைப்படம். அழகான கதாபாத்திரங்கள், சிறந்த நடிப்பு, தமனின் இசை ஆகியவை படத்திற்கு பலம் சேர்க்கின்றன. ஆனால், வலுவான திரைக்கதை மற்றும் உணர்ச்சிகரமான தருணங்கள் இல்லாததால் படம் முழுமையான தாக்கத்தை ஏற்படுத்தத் தவறுகிறது. காதல் உணர்வுகளை மையமாகக் கொண்ட படங்களை விரும்புபவர்களுக்கு ‘இதயம் முரளி’ சில இனிமையான தருணங்களை வழங்கும்; ஆனால், மனதில் நீங்காத காதல் படமாக மாறுவதில் சற்று பின்னடைவை சந்திக்கிறது.
இதையும் படிங்க: சுதா கொங்கரா மனுவால் வந்த சிக்கல்.. 'இதயம் முரளி' படத்திற்கு தடையா..!! சென்னை உயர்நீதிமன்றம் வழங்கிய முக்கிய உத்தரவு..!!