நடிகரும் இயக்குநருமான எஸ்.ஜே. சூர்யா இயக்கி நடித்துவரும் ‘கில்லர்’ திரைப்படத்தின் படப்பிடிப்பின்போது ஏற்பட்ட விபத்தில் ஒரு ஊழியர் உயிரிழந்ததுடன், மேலும் மூவர் காயமடைந்துள்ளனர்.
ஸ்ரீ கோகுலம் மூவீஸ் தயாரிப்பில் உருவாகி வரும் ‘கில்லர்’ திரைப்படத்தின் படப்பிடிப்பு கடந்த சில மாதங்களாக பல்வேறு இடங்களில் நடைபெற்று வருகிறது. தற்போது சென்னை பெரம்பூரில் உள்ள பின்னி மில் ஸ்டுடியோவில் சண்டைக் காட்சிகள் படமாக்கப்பட்டு வந்தன. இதில் ஏராளமான தொழில்நுட்பக் கலைஞர்கள் மற்றும் ஊழியர்கள் பணியாற்றி வந்ததாக கூறப்படுகிறது.
இந்த நிலையில், இன்று அதிகாலை சண்டைக் காட்சி படமாக்கப்பட்டுக் கொண்டிருந்தபோது திடீரென விபத்து ஏற்பட்டது. முதற்கட்ட தகவல்களின்படி, கார்பன் டைஆக்சைடு சிலிண்டர் வெடித்ததே இந்த விபத்திற்குக் காரணமாக இருக்கலாம் என போலீசார் சந்தேகிக்கின்றனர்.
இதையும் படிங்க: 'மஞ்சணத்தி' படம் எழுதியதே இளையராஜாவை நினைத்து தான்..!! அவருடன் இணைந்திருப்பது மறக்கமுடியாத தருணம் - மாரி செல்வராஜ் வாழ்த்து..!
இந்த விபத்தில், மதுரவாயலைச் சேர்ந்த மதன் என்ற ஊழியர் உயிரிழந்தார். சம்பவத்தில் காயமடைந்த தினகரன், சூர்யா மற்றும் சக்திவேல் ஆகியோர் உடனடியாக சென்னை ராஜீவ் காந்தி அரசு மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.
போலீசாரின் முதற்கட்ட விசாரணையில், சிலிண்டர் வெடித்து சிதறியதில் மதன் பலத்த காயமடைந்ததாகவும், அவரது வலது கை மற்றும் வலது கணுக்காலில் கடுமையான காயங்கள் ஏற்பட்டதாகவும் தெரியவந்துள்ளது. அவர் சம்பவ இடத்திலேயே உயிரிழந்ததாக கூறப்படுகிறது.
மேலும், நெற்குன்றத்தைச் சேர்ந்த தினகரனுக்கு வலது கை மணிக்கட்டு மற்றும் இடது காலில் காயம் ஏற்பட்டுள்ளது. மதுரவாயலைச் சேர்ந்த சூர்யாவும், குன்றத்தூரைச் சேர்ந்த சக்திவேலும் காயமடைந்துள்ளனர். குறிப்பாக சக்திவேலுக்கு இடது முழங்காலில் காயம் ஏற்பட்டுள்ளதாக மருத்துவமனை வட்டாரங்கள் தெரிவிக்கின்றன. மூவரும் தற்போது சிகிச்சை பெற்று வருவதுடன், அவர்களின் உடல்நிலை சீராக இருப்பதாக கூறப்படுகிறது. உயிரிழந்த மதனின் உடல் ராஜீவ் காந்தி அரசு மருத்துவமனைக்கு கொண்டு செல்லப்பட்டு, பிரேதப் பரிசோதனைக்காக வைக்கப்பட்டுள்ளது.
இந்த சம்பவம் தொடர்பாக பெரம்பூர் போலீசார் வழக்குப்பதிவு செய்து விசாரணை நடத்தி வருகின்றனர். விபத்து எவ்வாறு ஏற்பட்டது, பாதுகாப்பு விதிமுறைகள் முறையாக பின்பற்றப்பட்டனவா, ஊழியர்களுக்கு தேவையான பாதுகாப்பு உபகரணங்கள் வழங்கப்பட்டிருந்தனவா உள்ளிட்ட பல்வேறு கோணங்களில் விசாரணை மேற்கொள்ளப்படுகிறது.
மேலும், சம்பவ இடத்திற்கு தடயவியல் நிபுணர்களும் சென்று ஆய்வு மேற்கொண்டு வருகின்றனர். வெடித்ததாக கூறப்படும் சிலிண்டரின் பாகங்கள் மற்றும் பிற ஆதாரங்கள் சேகரிக்கப்பட்டு ஆய்வகத்திற்கு அனுப்பப்படவுள்ளன. அதன் முடிவுகள் வந்த பிறகே விபத்திற்கான துல்லியமான காரணம் தெரியவரும் என அதிகாரிகள் தெரிவித்துள்ளனர்.
பின்னி மில் ஸ்டுடியோவின் உட்புற வளாகத்தில் படப்பிடிப்பு நடைபெற்றதால், காவல்துறையிடம் தனிப்பட்ட அனுமதி பெறப்படவில்லை என்றும், இதுபோன்ற உட்புற படப்பிடிப்புகளுக்கு பொதுவாக காவல்துறை அனுமதி தேவைப்படுவதில்லை என்றும் போலீசார் தெரிவித்துள்ளனர்.
அதேநேரத்தில், பாதுகாப்பு குறைபாடுகள் ஏதேனும் இருந்தது கண்டறியப்பட்டால், சம்பந்தப்பட்டவர்கள் மீது சட்டரீதியான நடவடிக்கை எடுக்கப்படும் என்றும் போலீசார் எச்சரித்துள்ளனர்.
இந்த விபத்து தொடர்பாக இதுவரை திரைப்பட தயாரிப்பு நிறுவனம் அல்லது படக்குழு சார்பில் அதிகாரப்பூர்வ அறிக்கை எதுவும் வெளியிடப்படவில்லை. காயமடைந்தவர்கள் மற்றும் உயிரிழந்தவரின் குடும்பத்தினருக்கு தேவையான உதவிகள் வழங்கப்படலாம் என எதிர்பார்க்கப்படுகிறது.
இசையமைப்பாளர் ஏ.ஆர். ரஹ்மான் இந்த திரைப்படத்திற்கு இசையமைத்து வருவதாகவும், எஸ்.ஜே. சூர்யா இயக்கி கதாநாயகனாக நடித்துவரும் இந்த படத்தின் படப்பிடிப்பின்போது எதிர்பாராத விதமாக இந்த விபத்து நிகழ்ந்ததாகவும் கூறப்படுகிறது.
விபத்து நடந்த நேரத்தில் அங்கு பணியாற்றியவர்கள் யார், எஸ்.ஜே. சூர்யா எந்தக் காட்சியில் ஈடுபட்டிருந்தார், பாதுகாப்பு நடைமுறைகள் பின்பற்றப்பட்டனவா உள்ளிட்ட அனைத்து அம்சங்களும் தற்போது விசாரணைக்கு உட்படுத்தப்பட்டுள்ளன. விசாரணை அறிக்கை கிடைத்த பிறகே விபத்திற்கான முழு காரணமும், பொறுப்புக்கூற வேண்டியவர்கள் யார் என்பதும் தெளிவாகும் என போலீசார் தெரிவித்துள்ளனர்.
இதையும் படிங்க: ‘சிங்கப்பெண்ணே’ ஆனந்தியா இது..!! சிவப்பு புடவையில் நடிகை மனீஷாவின் கலக்கல் போட்டோஸ் வைரல்..!