தென்னிந்திய திரையிசை உலகின் ஜாம்பவான்களில் ஒருவரான பிரபல பின்னணி பாடகி எஸ். ஜானகியின் ஒரே மகன் முரளி கிருஷ்ணா, உடல்நலக்குறைவால் இன்று காலமானார். இந்த துயரச் செய்தி திரையுலகம் முழுவதும் அதிர்ச்சியை ஏற்படுத்தியுள்ளது. ஹைதராபாத்தில் தனது தாயாருடன் வசித்து வந்த முரளி கிருஷ்ணா, இன்று காலை திடீரென ஏற்பட்ட மாரடைப்பு காரணமாக உயிரிழந்ததாக குடும்ப வட்டாரங்கள் தெரிவித்துள்ளன. 

எஸ். ஜானகி, ஆந்திராவின் குண்டூரைச் சேர்ந்தவர். 1950களில் தனது இசைப் பயணத்தைத் தொடங்கிய இவர், தமிழ், தெலுங்கு, கன்னடம், மலையாளம், இந்தி உள்ளிட்ட மொழிகளில் ஆயிரக்கணக்கான பாடல்களைப் பாடியுள்ளார். இளையராஜா, எஸ்.பி. பாலசுப்பிரமணியம் போன்ற ஜாம்பவான்களுடன் இணைந்து உருவாக்கிய பாடல்கள் இன்றும் ரசிகர்களின் மனதில் நீங்காத இடம் பிடித்துள்ளன.

இதையும் படிங்க: மருமகள் சீரியல் நடிகை கேப்ரியல்லாவின் கலக்கல் ஸ்டைலிஷ் கிளிக்ஸ்..!

4 தேசிய திரைப்பட விருதுகள், 31 மாநில விருதுகள் உள்ளிட்ட பல்வேறு கௌரவங்களைப் பெற்ற இவர், பத்ம பூஷன் விருது பெற்றவரும் ஆவார். எளிமை மற்றும் அமைதியான வாழ்க்கை முறையால் அறியப்படும் ஜானகி, தனது கணவர் ராம பிரசாத்துடன் சென்னையில் குடியேறினார். அவர்களுக்கு ஒரே மகனாக பிறந்தவர் முரளி கிருஷ்ணா.

முரளி கிருஷ்ணா, தனது தாயாரின் புகழ்பெற்ற இசைப் பின்னணியில் வளர்ந்தாலும், திரையுலகின் வெளிச்சத்திலிருந்து விலகி இருந்தார். பரதநாட்டியம் போன்ற கலைகளில் ஆர்வம் கொண்டிருந்த இவர், சென்னையைச் சேர்ந்த நடனக் கலைஞரான உமாவை திருமணம் செய்து கொண்டார். இந்தத் தம்பதியருக்கு இரு மகள்கள் உள்ளனர். இருப்பினும், கருத்து வேறுபாடு காரணமாக விவாகரத்து பெற்றனர். அதன் பிறகு, தனது மகள்களின் நலனை உறுதிப்படுத்திய முரளி, தனது தாயாருடன் வசித்து வந்தார்.

திரைப்படங்கள் மற்றும் தொலைக்காட்சி தொடர்களில் சில சிறு பணிகளில் ஈடுபட்டிருந்தாலும், அவர் அமைதியான வாழ்க்கையை விரும்பினார். திரையுலக பிரமுகர்கள், இசையமைப்பாளர்கள், நடிகர்கள் என பலரும் தங்கள் இரங்கலைத் தெரிவித்து வருகின்றனர். சமூக வலைதளங்களில் ரசிகர்கள், ஜானகியின் பாடல்களை நினைவுகூர்ந்து அஞ்சலி செலுத்தி வருகின்றனர்.

"ஒரு தாய்க்கு மகனை இழப்பது சொல்லமுடியாத வலி" என்று பலரும் குறிப்பிட்டுள்ளனர். குடும்ப வட்டாரங்கள், முரளி கிருஷ்ணாவின் இறுதிச் சடங்குகள் விரைவில் அறிவிக்கப்படும் என்று தெரிவித்துள்ளன. ஜானகியின் நெருங்கிய நண்பர்கள் மற்றும் ரசிகர்கள் அவருக்கு ஆறுதல் கூறி வருகின்றனர். இந்த துயரத்தில் இருந்து ஜானகி மீண்டு வர வேண்டும் என்று திரையுலகம் பிரார்த்தனை செய்கிறது. முரளி கிருஷ்ணாவின் ஆத்மா சாந்தி அடையட்டும்..!!

இதையும் படிங்க: சான்வி மேக்னா - பாரத் கூட்டணியில் புதுப்படம்..! படப்பிடிப்பு வேலைகள் இனிதே ஆரம்பம்..!