தமிழக சட்டமன்றத் தேர்தல் களத்தில் அ.தி.மு.க வுக்கு பெரும் அதிர்ச்சி! ஏற்கனவே எடப்பாடி பழனிசாமி தேர்வு செய்திருந்த 19 வேட்பாளர்கள் திடீரென போட்டியிட மறுத்து விலகியுள்ளனர். தேர்தல் செலவுகளை தாங்க முடியாத நிலை ஏற்பட்டதால் இந்த முடிவை எடுத்துள்ளதாக கட்சி வட்டாரங்கள் தெரிவிக்கின்றன.
அ.தி.மு.க. – தே.ஜ.கூட்டணியில் போட்டியிடும் வேட்பாளர்களை பழனிசாமி ஏற்கனவே தேர்வு செய்து முடித்திருந்தார். மார்ச் 18-ம் தேதி முதற்கட்ட பட்டியலில் 5 அல்லது 6 பேர் அடங்கிய பட்டியல் வெளியாகும் என எதிர்பார்க்கப்பட்டது. அதைத் தொடர்ந்து தொகுதி பங்கீட்டை சுமுகமாக முடித்து இரண்டாம் கட்ட பட்டியலை வெளியிட திட்டமிட்டிருந்தார்.
ஆனால் விருதுநகர், மதுரை, கடலூர், திருப்பூர், திருச்சி, திருவண்ணாமலை, சென்னை உள்ளிட்ட மாவட்டங்களில் தேர்வு செய்யப்பட்ட 19 வேட்பாளர்கள் திடீரென பழனிசாமியிடம் “நாங்கள் போட்டியிட மாட்டோம்” என்று தெரிவித்துள்ளனர். இதனால் கட்சியினரிடையே பெரும் பதற்றம் ஏற்பட்டுள்ளது.
இதையும் படிங்க: அதிமுக அலுவலகத்தில் பரிசு பொருட்கள் விநியோகம்! வாக்காளர்களை கவர களமிறங்கிய ரத்தத்தின் ரத்தங்கள்!
இதுகுறித்து அ.தி.மு.க. நிர்வாகிகள் சிலர் கூறியதாவது: “விஜய் தலைமையிலான தமிழக வெற்றிக்கழகம் கூட்டணிக்கு வரவில்லை என்றால், தேர்தல் களம் நான்கு முனை போட்டியாக மாறும். இதில் வெற்றி பெற அதிக செலவு செய்ய வேண்டிய சூழல் உருவாகியுள்ளது. ஆனால் தேர்தல் செலவுகளில் ஒரு பகுதியை கட்சித் தலைமை ஏற்க மறுத்துவிட்டது. மொத்த செலவும் வேட்பாளர்கள் தலையில் விழுந்துவிட்டது. இதற்கு பயந்துதான் 19 பேரும் போட்டியிலிருந்து விலகியுள்ளனர்.”
இதனால் பழனிசாமி இப்போது மாற்று வேட்பாளர்களை அவசரமாக தேர்வு செய்யும் நெருக்கடியில் உள்ளார். முதற்கட்ட பட்டியல் வெளியீடு தாமதமாகும் அபாயம் ஏற்பட்டுள்ளது. வேட்பாளர்கள் விலகிய 19 தொகுதிகளில் பல முக்கிய தொகுதிகள் என்பதால், அ.தி.மு.க.வுக்கு இது பெரும் பின்னடைவாக அமைந்துள்ளது.
தேர்தல் நெருங்கும் நிலையில், கட்சி செலவு மேலாண்மை, வேட்பாளர் தேர்வு ஆகியவை தொடர்பான உள் பிரச்சினைகள் வெளியே தெரிய ஆரம்பித்துள்ளன. இந்த சம்பவம் அ.தி.மு.க.வின் தேர்தல் தயாரிப்புகளை பெரிதும் பாதிக்கும் என்று அரசியல் வட்டாரங்கள் கருதுகின்றன.
இதையும் படிங்க: இபிஎஸ் பேச்சை கண்டுகொள்ளாத மா.செ-க்கள்!! அதிமுகவில் நிலவும் அதிருப்தி! சுணங்கும் தேர்தல் பணி!