தஞ்சாவூர் ரயில் நிலையத்தில் உள்ள இரண்டாவது நுழைவு வாயில் புதிதாக அமைக்கப்பட்டுள்ளது. அந்த நுழைவு வாயிலில் தஞ்சை பெரிய கோவில் கோபுரம் இடம்பெறும் வகையில் வடிவமைக்கப்பட்டுள்ளது. அந்த கோபுரத்தின் நடுப்பகுதியில் இந்தி எழுத்துக்கள் இடம்பெற்ற பெயர் பலகை நேற்று மாலை வைக்கப்பட்டது.

இந்த தகவல் தெரியவந்ததும், தமிழ் அமைப்புகள் சார்பில் கடும் எதிர்ப்பு தெரிவிக்கப்பட்டது. தொடர்ந்து, இன்று காலை திமுக மாவட்டச் செயலாளர் துரை. சந்திரசேகரன், தஞ்சாவூர் எம்பி முரசொலி உள்ளிட்டோர் அங்கு திரண்டு, இந்த பெயர் பலகைக்கு எதிராக ஆர்ப்பாட்டம் நடத்தப் போவதாக தெரிவித்தனர்.

இதையடுத்து, ரயில்வே நிர்வாகம் திருச்சி ரயில்வே அதிகாரிகளை தொடர்புகொண்டு, அவர்களின் அறிவுறுத்தலின்படி அவசரமாக அந்த இந்தி பெயர் பலகையை அகற்றியது. மேலும், அந்த இடத்தில் தமிழ் பெயர் பலகை வைக்க நடவடிக்கை எடுக்கப்பட்டு வருவதாக தெரிவிக்கப்பட்டுள்ளது.

இதையும் படிங்க: தமிழகத்திலேயே முதல் முறை... கோவை, கரூர் அரசு மருத்துவமனைகளில் வெடித்தது புது பிரச்சனை... தவெக அரசுக்கு பேரிடி...!

பொதுவாக மத்திய அரசு அலுவலகங்கள், சாலைப் பணிகள், ரயில்வே, தபால் நிலையங்கள் உள்ளிட்ட இடங்களில் தமிழ், ஆங்கிலம், இந்தி ஆகிய மொழிகளில் பெயர் பலகைகள் வைக்கப்படுவது வழக்கம். ஆனால், இங்கு இந்தி எழுத்துக்கள் அதிகளவில் பெரிதாக இடம்பெற்று, அதற்கு முக்கியத்துவம் அளிக்கப்பட்டதாகவும், இதனைத்தான் தாங்கள் எதிர்ப்பதாகவும் திமுக தரப்பில் தெரிவிக்கப்பட்டுள்ளது.

இதையடுத்து, திமுக சார்பில் அறிவிக்கப்பட்ட போராட்டத்திற்கு முன்பாகவே ரயில்வே நிர்வாகம் இந்தி பெயர் பலகையை அகற்றியுள்ளது.

இதுதொடர்பாக திமுக நிர்வாகி ஒருவர் கூறுகையில், “திராவிட முன்னேற்றக் கழகத்தின் தஞ்சை மாவட்டக் கழகத்தின் சார்பில் மாபெரும் கண்டன ஆர்ப்பாட்டத்தை நடத்த வேண்டும் என்று கேட்டுக்கொள்ளப்பட்டது. அதன் அடிப்படையில் இன்று காலை 10 மணிக்கு கழகத் தோழர்களுக்கு தகவல் தெரிவிக்கப்பட்டு, அனைவரும் திரளுமாறு அறிவுறுத்தப்பட்டது. ஆனால், அதற்கு முன்பாகவே ரயில்வே நிர்வாகம் இந்தி எழுத்துக்கள் இடம்பெற்றிருந்த பெயர் பலகையை அப்புறப்படுத்தியுள்ளது” என்றார்.

மேலும், “மத்திய அரசின் சாலைப் பணிகள், ரயில்வே, தபால் நிலையங்கள் உள்ளிட்ட இடங்களில் இந்தி எழுத்துக்களை மீண்டும் பொறிக்கும் பணிகள் ஆங்காங்கே மேற்கொள்ளப்பட்டு வருகின்றன. அந்த அடிப்படையில் தஞ்சாவூர் ரயில் நிலையத்தில் வைக்கப்பட்டிருந்த இந்தி பெயர் பலகையும் தற்போது அகற்றப்பட்டுள்ளது” என்றும் அவர் தெரிவித்தார்.

தொடர்ந்து, “எந்த இடத்தில், எந்த வடிவத்தில் இந்தி திணிப்பு நடைபெற்றாலும், திராவிட முன்னேற்றக் கழகத்தின் உயிர்நாடிக் கொள்கையான இந்தி எதிர்ப்புக் கொள்கையின் அடிப்படையில் அதை நிச்சயமாக எதிர்ப்போம்” என்றும் அவர் தெரிவித்தார்.

இதையும் படிங்க: நிர்வாகப் பிழையா.? புதிய நடைமுறையா.? ஹிந்தியில் பெயர் பலகை... வேல்முருகன் ஆவேசம்..!