ஜெம் கிரானைட்ஸ் குழுமத்தின் தலைவரும் பிரபல கிரானைட் தொழிலதிபருமான ஆர். வீரமணி மீதான போக்சோ வழக்கில் தொடர்புடைய அனைவரையும் கண்டறிந்து கடுமையான நடவடிக்கை எடுக்க வேண்டும் என தமிழக முதலமைச்சர் விஜய் காவல்துறைக்கு உத்தரவிட்டுள்ளார். விசாரணையை எந்தவித தலையீடும் இன்றி தீவிரப்படுத்த வேண்டும் என்றும் அவர் அறிவுறுத்தியுள்ளதாக தகவல்கள் வெளியாகியுள்ளன. 

கடந்த வாரம் காவல்துறை உயர் அதிகாரிகளை நேரில் அழைத்து விசாரணை முன்னேற்றத்தை ஆய்வு செய்த முதலமைச்சர், மீண்டும் இன்று இந்த உத்தரவை வலியுறுத்தியுள்ளார். பெண் உதவி ஆய்வாளர்கள் உட்பட தனிப்படை அமைக்கப்பட்டு, பாதிக்கப்பட்ட சிறுமிகளை அடையாளம் காணும் பணியும் தீவிரமாக நடைபெற்று வருகிறது.  

இந்த வழக்கு 2025 அக்டோபர் 6ஆம் தேதி தொடங்கியது. சென்னையைச் சேர்ந்த ஒரு தன்னார்வலர், மத்திய குற்றப்பிரிவு பாலியல் தடுப்பு பிரிவு ஆய்வாளரிடம் ரகசிய புகாருடன் ஒரு பென்டிரைவை அளித்தார். அதில் உள்ள வீடியோ ஆதாரங்களின் அடிப்படையில் விசாரணை தொடங்கியது. பின்னர் அந்த வீடியோவில் தோன்றிய நபர் ஜெம் குழுமத் தலைவர் வீரமணி (84) என்பது உறுதியானது.  

இதையும் படிங்க: "வெற்றிப்பயணம் வரலாறு படைக்கட்டும்"..! துப்பாக்கிச் சுடும் போட்டியில் வெள்ளிப்பதக்கம்..! இளவேனிலுக்கு CM விஜய் வாழ்த்து.!!

தேனாம்பேட்டையில் வாடகைக்கு எடுக்கப்பட்ட வீட்டில், அவரது கூட்டாளிகளான சாந்தி மற்றும் அவரது கணவர் மகேந்திர சிம்மன் மூலம் சிறுமிகள் அழைக்கப்பட்டு பாலியல் வன்கொடுமைக்கு உள்ளாக்கப்பட்டதாக குற்றச்சாட்டு எழுந்துள்ளது. மேலும் சில தொழிலதிபர்கள் மற்றும் பிரமுகர்களுக்கும் சிறுமிகள் அனுப்பப்பட்டதாக விசாரணையில் தகவல்கள் கிடைத்துள்ளன.  

கடந்த ஆகஸ்ட் 29ஆம் தேதி வீரமணி, சாந்தி மற்றும் மகேந்திர சிம்மன் ஆகியோர் கைது செய்யப்பட்டனர். அவர்களது வீடுகள் மற்றும் அலுவலகங்களில் சோதனை நடத்தப்பட்டு ஆதாரங்கள் கைப்பற்றப்பட்டன. போக்சோ சட்டத்தின் கீழ் வழக்கு பதிவு செய்யப்பட்டுள்ளது. நீதிமன்றம் முன்பு வழக்கை முடிக்க முயன்ற அறிக்கையை நிராகரித்து மேலதிக விசாரணைக்கு உத்தரவிட்ட பிறகுதான் இந்த கைது நடவடிக்கைகள் தீவிரமடைந்தன.  

தற்போது மேலும் குறைந்தபட்சம் ஒன்பது சிறுமிகள் வாக்குமூலம் அளித்துள்ளனர். அவர்கள் அனைவரும் அப்போது சிறுவயதில் இருந்ததாகக் கூறி வீரமணியை அடையாளம் கண்டுள்ளனர். விசாரணை அனைத்து கோணங்களிலும் நடைபெற்று வருவதால், மேலும் பலர் சிக்கலில் சிக்க வாய்ப்புள்ளதாக காவல்துறை வட்டாரங்கள் தெரிவிக்கின்றன.  

இந்த வழக்கு முன்பு திமுக ஆட்சியில் புகார் வந்தபோதும் முழுமையாக விசாரிக்கப்படவில்லை என்ற குற்றச்சாட்டை தமிழக வெற்றிக் கழகத்தினர் முன்வைத்து வருகின்றனர். தற்போது முதலமைச்சர் விஜய் நேரடியாக தலையிட்டு விசாரணையை முடுக்கிவிட்டதால், அரசியல் மற்றும் தொழில்துறை வட்டாரங்களில் இது பெரும் பரபரப்பை ஏற்படுத்தியுள்ளது. 

காவல்துறை யாருடைய தலையீடும் இன்றி சுதந்திரமாக விசாரிக்க முடியும் என்ற சிக்னல் கொடுக்கப்பட்டுள்ளதால், வழக்கின் அடுத்த கட்ட முன்னேற்றம் எதிர்பார்க்கப்படுகிறது.

இதையும் படிங்க: அச்சிறுப்பாக்கத்தில் CM விஜய் சூறாவளி பிரச்சாரம்..! வந்தாச்சு இடைத் தேர்தல்... எகிறும் எதிர்பார்ப்பு..!!