தமிழக அரசியலில் புதிய மாற்றத்தின் அடையாளமாக பார்க்கப்படும் விஜய் (Vijay) தலைமையிலான தமிழக வெற்றிக் கழக அரசின் அமைச்சரவை விரிவாக்கம், சமூக நீதி மற்றும் பிரதிநிதித்துவ அரசியலை மையப்படுத்தியதாக மாறியுள்ளது. இன்று காலை பதவியேற்ற 23 புதிய அமைச்சர்களில் 7 பேர் பட்டியலினத்தைச் சேர்ந்தவர்கள் என்பதும், பெண்களுக்கு அதிக இடம் வழங்கப்பட்டிருப்பதும் அரசியல் வட்டாரங்களில் பரவலாக பேசப்படுகிறது.

ஏற்கனவே பதவியேற்ற முதல் கட்ட அமைச்சரவையில் ஒருவர் பட்டியலினத்தைச் சேர்ந்த நிலையில், தற்போது மேலும் 7 பேர் சேர்க்கப்பட்டதால், தமிழ்நாடு அமைச்சரவையில் மொத்தம் 8 பட்டியலின அமைச்சர்கள் இடம்பெற்றுள்ளனர். இதில் 6 பேர் தமிழக வெற்றிக் கழகத்தைச் சேர்ந்தவர்களாகவும், ஒருவர் கூட்டணி கட்சியான காங்கிரஸைச் சேர்ந்தவராகவும் உள்ளார்.

அமைச்சர் ராஜ்மோகன், அவினாசி தொகுதியின் கமலி, ராசிபுரம் தொகுதியின் லோகேஷ், ஓட்டப்பிடாரம் தொகுதியின் மதன் ராஜா, அரக்கோணத்தின் காந்திராஜ் மற்றும் ஸ்ரீபெரும்புதூரின் தென்னரசு ஆகியோர் அமைச்சரவையில் இடம்பெற்றுள்ளனர்.

இதையும் படிங்க: 59 ஆண்டுகளுக்கு பிறகு அமைச்சரவையில் இடம் பெறும் காங்.,!! என்னென்ன துறைகள் ஒதுக்குவார் விஜய்?!

அதே நேரத்தில், பெண் பிரதிநிதித்துவத்திலும் இந்த அமைச்சரவை கவனம் ஈர்த்துள்ளது. இன்று பதவியேற்ற 23 அமைச்சர்களில் 3 பேர் பெண்கள். ஏற்கனவே தொழிற்துறை அமைச்சராக உள்ள கீர்த்தனாவுடன் சேர்த்து, மொத்தம் 4 பெண்கள் தமிழ்நாடு அமைச்சரவையில் இடம்பிடித்துள்ளனர். பெண்களுக்கு நிர்வாக அதிகாரத்தில் அதிக பங்கு வழங்கும் அரசியல் மாற்றமாக இது பார்க்கப்படுகிறது.

மேலும், அறந்தாங்கி தொகுதி எம்.எல்.ஏ முகமது பர்வேஸ் அமைச்சராக பதவியேற்றதன் மூலம் முஸ்லிம் சமூகத்திற்கும் அமைச்சரவையில் பிரதிநிதித்துவம் வழங்கப்பட்டுள்ளது. விரைவில் இந்திய யூனியன் முஸ்லிம் லீக் சார்பிலும் அமைச்சர்கள் பதவியேற்கலாம் என்ற தகவல் வெளியாகியுள்ளது.

இதனுடன், காங்கிரஸ் கட்சியைச் சேர்ந்த ராஜேஷ்குமார் மற்றும் விஸ்வநாதன் ஆகியோர் 59 ஆண்டுகளுக்கு பிறகு தமிழ்நாடு அமைச்சரவையில் இடம்பெறுவது முக்கிய அரசியல் சம்பவமாக மாறியுள்ளது. கல்வி, சுகாதாரம், விவசாயம், தொழில் மற்றும் உள்கட்டமைப்பு போன்ற முக்கிய துறைகளுக்கான புதிய அமைச்சர்கள் விரைவில் தங்கள் பொறுப்புகளை ஏற்க உள்ளனர். விஜய் தலைமையிலான இந்த கூட்டணி அமைச்சரவை, தமிழக அரசியலில் புதிய சமூக சமநிலையை உருவாக்கும் முயற்சியாக பார்க்கப்படுகிறது.

இதையும் படிங்க: கொங்கு மண்டலத்தை குறி வைக்கும் விஜய்!! தவெக அமைச்சரவையில் 8 பேருக்கு பதவி! அதிரடி திட்டம்!