சற்று முன் வெடித்த பெரும் வன்முறையின் நாக்பூர் நகரமே பற்றி எரிகிறது. சுமார் 250 கிலோமீட்டர் தொலைவில் உள்ள குல்தாபாத்தில் அமைந்துள்ள முகலாய பேரரசர் ஔரங்கசீப்பின் கல்லறையை அகற்றக் கோரி பஜ்ரங்தள் அமைப்பினர் நடத்திய போராட்டத்தைத் தொடர்ந்து வன்முறை மோதல்கள் வெடித்தன. ஆர்ப்பாட்டத்தின் போது ஒரு 'புனித நூல்' எரிக்கப்பட்டதாக வதந்திகள் பரவியதால், மஹால் பகுதியில் இஸ்லாமியர்கள் மோதலில் ஈடுபட்டனர். 

கல் வீச்சு சம்பவங்கள் குடியிருப்பாளர்களிடையே பீதியை ஏற்படுத்தின. பதற்றம் விரைவாக அதிகரித்ததாகவும், நிலைமை கட்டுப்பாட்டை மீறியதால், குற்றவாளிகள் சொத்துக்களுக்கு சேதம் விளைவித்ததாகவும், வாகனங்களுக்கு தீ வைத்ததாகவும் நேரில் கண்டவர்கள் தெரிவித்தனர். சம்பவ இடத்திலிருந்து வெளியான வீடியோக்களில் எரியும் வாகனங்கள் மற்றும் சிதறிய குப்பைகள் காட்டப்பட்டன.

வன்முறையைக் கட்டுப்படுத்தவும், நிலைமையைக் கட்டுக்குள் கொண்டுவரவும் போலீசார் சம்பவ இடத்திற்கு விரைந்தனர். மேலும் அமைதியின்மையைத் தடுக்க கூடுதல் பணியாளர்கள் நிறுத்தப்பட்டுள்ளனர்.

மோதலுக்கான காரணம் குறித்து அதிகாரிகள் விசாரித்து, சம்பந்தப்பட்டவர்களை அடையாளம் கண்டு வருகின்றனர். இதற்கிடையில், அமைதியைப் பேணவும், சட்டப்படி ஒத்துழைக்கவும் உள்ளூர்வாசிகள் வலியுறுத்தப்பட்டுள்ளனர்.

சிட்னிஸ் பூங்கா, மஹாலில் போராட்டக்காரர்களை அடக்க முற்பட்டனர். அப்போது போலீஸார் மீது கல் வீசி தாக்கியதில்  நான்கு பேர் காயமடைந்தனர். இதில் துணை காவல் ஆணையர் அர்ச்சித் சந்தக் உட்பட காலில் காயம் ஏற்பட்டது. கோட்வாலி முதல் கணேஷ்பேத் வரை வன்முறை பரவியது. கலவரக்காரர்கள் பல வாகனங்களை எரித்தனர். இரண்டு, நான்கு சக்கர வாகனங்கள் தீக்கிரையாக்கப்பட்டதாக உறுதிப்படுத்தப்பட்டுள்ளது. 

நாக்பூரில் உள்ள மஹால் பகுதியில் நடந்த மோதல்களின் போது இரண்டு ஜேசிபிகள் மற்றும் பல வாகனங்கள் தீக்கிரையாக்கப்பட்டதாக தீயணைப்பு படை அதிகாரி ஒருவர் தெரிவித்தார். "இரண்டு ஜேசிபிகள் மற்றும் இன்னும் சில வாகனங்களும் பாதிக்கப்பட்டன. ஒரு தீயணைப்பு வீரர் காயமடைந்ததாக'' அந்த அதிகாரி கூறினார். மேலும் சிட்னிஸ் பூங்கா முதல் சுக்ரவாரி தலாவ் வரை உள்ள வீடுகள் மீது கற்களை வீசினர். நாக்பூர் காவல் ஆணையர் டாக்டர் ரவீந்தர் சிங்கால் இப்போது நிலைமை இப்போது 'அமைதியாக' இருப்பதாக உறுதிப்படுத்தினார். போலீஸ் பாதுகாப்பு அதிகரிக்கப்பட்டு விசாரணை நடந்து வருகிறது.

மகாராஷ்டிரா முதல்வர் தேவேந்திர ஃபட்னாவிஸ், உள்துறை அமைச்சராக, வீடியோ மூலம் அமைதியைக் காக்க வேண்டுகோள் விடுத்தார். "நாக்பூர் மக்கள் அமைதியைக் காக்க வேண்டும். வதந்திகளை நம்ப வேண்டாம் என்றும் நான் கேட்டுக்கொள்கிறேன். நிர்வாகம் தேவையான அனைத்து நடவடிக்கைகளையும் எடுத்து வருகிறது" என்று கூறினார். 

இதையும் படிங்க: பெண்களுக்கு ஆபாச வீடியோ அனுப்பிய மதபோதகர்! லாடம் கட்டிய போலீஸ்..!

டிசிபி சந்தக் இதுகுறித்து, '' இந்த சம்பவம் சில தவறான புரிதலால் நடந்தது. நிலைமை இப்போது கட்டுக்குள் உள்ளது. எங்கள் படை இங்கே பலமாக உள்ளது. எல்லோரும் வெளியே செல்ல வேண்டாம் என்று நான் கேட்டுக்கொள்கிறேன். மேலும், கற்களை வீசுபவர்கள் கற்களை வீசுவதை நிறுத்த வேண்டும். கல் வீச்சு நடந்தது, அதனால் நாங்கள் பலப்பிரயோகம் செய்து கண்ணீர் புகை குண்டுகளையும் பயன்படுத்தினோம். சில வாகனங்கள் தீப்பிடித்து எரிந்தன. நாங்கள் தீயணைப்பு படையினரை அழைத்து தீயை அணைத்தோம்.

கல் வீச்சின் போது சில போலீசார் காயமடைந்தனர். எனக்கும் காலில் லேசான காயம் ஏற்பட்டது. ஆனால், அனைவரும் அமைதியைக் காக்குமாறு கேட்டுக்கொள்கிறோம். மக்கள் வதந்திகளுக்கு கவனம் செலுத்தக்கூடாது. சிவாஜி சவுக் அருகே சில கட்டுமானப் பணிகள் நடந்து கொண்டிருந்தன. எனவே, கற்கள் அதிக அளவில் வைக்கப்பட்டிருந்தன. அவற்றை இந்த மக்கள் கல் எறிவதற்குப் பயன்படுத்தினர். இந்த சம்பவம் மஹால் பகுதியில் நடந்தது. குற்றவாளிகள் மீது சட்ட நடவடிக்கை எடுக்கப்படும்'' என உறுதியளித்தார்.

இதற்கிடையில், நாக்பூர் எம்.பி.யும், மத்திய அமைச்சருமான நிதின் கட்கரி தனது எக்ஸ்தளப்பதிவில்,  மக்கள் அமைதியைக் காக்குமாறு வேண்டுகோள் விடுத்தார். ''“நாக்பூர் அமைதி மற்றும் நல்லிணக்கத்திற்கு நாடு முழுவதும் பிரபலமான நகரம். இந்த நகரத்தில் சாதி, மதம் அல்லது இனத்தின் அடிப்படையில் எந்த தகராறும் சண்டையும் இல்லை. அதே நேரத்தில், நாக்பூர் மக்கள் அமைதியாக இருக்கவும், நிலைமையைக் கையாள்வதில் மாவட்ட காவல் நிர்வாகத்துடன் ஒத்துழைக்கவும் " என்று வலியுறுத்தியுள்ளார். 

விஷ்வ இந்து பரிஷத், பஜ்ரங் தளத்தின் ஆரம்ப போராட்டம் இந்த வன்முறைக்குப் பிறகு தீவிரமடைந்துள்ளது. "லப்பைக் லப்பைக்" என்ற முழக்கங்கள், இந்து சொத்துக்கள் மீதான தாக்குதல்கள் என்று சமூக வலைதளங்களில் கருத்துகள் பகிரப்பட்டு வருகின்றன. ஆனால், காவல்துறை இந்த தகவல்களை உறுதிப்படுத்தவில்லை. 

காங்கிரஸின் அதுல் லோந்தே பாட்டீல், சிவசேனாவின் ஆனந்த் துபே உள்ளிட்ட எதிர்கட்சியினர் இந்த  வன்முறைக்கு 'சட்டம் -ஒழுங்கு தோல்வி' என்று கண்டனம் தெரிவித்துள்ளனர். அதேவேளை எதிர்க்கட்சிகள் அமைதியின்மையைத் தூண்டியதாக பாஜக குற்றம்சாட்டியுள்ளது. ஊரடங்கு 144 கட்டுப்பாடுகள் அமலில் உள்ள நிலையில், நாக்பூர் தொடர்ந்து  பதற்றத்தில் உள்ளது. வரலாற்று ரீதியாக இணக்கமான இந்த நகரத்தில் இயல்புநிலையை மீட்டெடுக்க அதிகாரிகள் உறுதியளித்துள்ளனர்.

இதையும் படிங்க: அமலாக்கத் துறை அறிக்கையால் ஆடிபோன திமுக.. தூக்கி எறியப்படும் திமுக ஆட்சி.. எல்.முருகன் ஆவேசம்!!