கேரளாவின் பிரபலமான சபரிமலை ஸ்ரீ அய்யப்பன் கோவிலின் துவாரபாலகர் சிலைகளில் அணிவிக்கப்பட்ட தங்கக் கவசங்களில் 4.54 கிலோ தங்கம் மாயமான விவகாரம் பெரும் சர்ச்சையை ஏற்படுத்தியுள்ளது.

இந்நிலையில், செப்பனிடும் பணியை ஏற்ற தொழிலதிபர் உன்னிகிருஷ்ணன் போத்தி, "மிச்சமான தங்கத்தை உதவி தேவைப்படும் ஒரு பெண்ணின் திருமணத்திற்கு பயன்படுத்தலாமா" என்று திருவிதாங்கூர் தேவசம் போர்ட்டுக்கு (TDB) அனுப்பிய 2019-ஆம் ஆண்டு கடிதம் வெளியாகி, அதிர்ச்சியை ஏற்படுத்தியுள்ளது.

 இது போர்டு அதிகாரிகளுக்கும் போத்திக்கும் இடையே முறைகேடான தொடர்பு இருக்கிறதோ என்ற சந்தேகத்தை எழுப்பியுள்ளது. கேரள உயர் நீதிமன்றம் இந்தக் கடிதத்தைப் பார்த்து, "கோவில் சொத்துகளின் புனிதத்தை கெடுக்கும் செயல்" என்று கடுமையாக விமர்சித்து, சிறப்பு புலனாய்வு குழுவை அமைத்து விரிவான விசாரணைக்கு உத்தரவிட்டுள்ளது. 

இதையும் படிங்க: கரூர் துயரத்திற்கு நீதி கிடைக்காது... சிறப்பு புலனாய்வு குழு விசாரணையை எதிர்த்து மேல்முறையீடு...!

தங்கக் கவசம் செப்பனிடும் பணி மற்றும் மாயமான தங்கம்
கேரளாவில் மார்க்சிஸ்ட் கம்யூனிஸ்ட் கட்சி தலைமையிலான இடது ஜனநாயக முன்னணி (LDF) ஆட்சியின் கீழ், சபரிமலை கோவிலின் கருவறை வாயிலில் உள்ள இரு துவாரபாலகர் சிலைகளுக்கான தங்கக் கவசங்கள் 2019-ஆம் ஆண்டு கழற்றப்பட்டு, செப்பனிடுவதற்காக சென்னைக்கு அனுப்பப்பட்டன. 

 இந்தப் பணியின் செலவை பெங்களூரு சேர்ந்த தொழிலதிபர் உன்னிகிருஷ்ணன் போத்தி ஏற்றுக்கொண்டார். அவர், சென்னையில் உள்ள 'ஸ்மார்ட் கிரியேஷன்ஸ்' என்ற தனது நிறுவனத்தில் இந்த வேலையைச் செய்தார். போர்டு அதிகாரிகள் கவசங்களை ஒப்படைத்தபோது, அதன் எடை 42.8 கிலோ ஆக இருந்தது. செப்பனிடப்பட்ட பின், 38.258 கிலோவாக குறைந்திருந்தது. அதாவது, 4.541 கிலோ தங்கம் மாயமாகியிருந்தது. 

 இந்த விவரம் பக்தர்களிடையே பெரும் அதிர்ச்சியை ஏற்படுத்தியது. போத்தி, சபரிமலை கோவிலில் புரோகிதராகப் பணியாற்றியவரும், பக்தர்களிடமிருந்து நன்கொடைகளை சேகரித்தவருமாகத் தெரிகிறார். 

தொழிலதிபரின் அதிர்ச்சிக் கடிதம்
செப்பனிடும் பணி முடிந்து, ஆகஸ்ட் 11, 2019 அன்று கவசங்கள் சிலைகளுக்கு அணிவிக்கப்பட்ட பின், டிசம்பர் 9 அன்று போத்தி போர்ட்டுக்கு இ-மெயில் அனுப்பினார். அந்தக் கடிதத்தில், "கருவறை கதவு மற்றும் துவாரபாலகர் சிலைகளுக்கு தங்கம் முலாம் பூசும் பணிகள் முடிந்த பின், என்னிடம் சில தங்கம் மிச்சமாக உள்ளது.

உதவி தேவைப்படும் ஒரு பெண்ணின் திருமணத்திற்கு, போர்ட்டின் ஒத்துழைப்புடன் அதைப் பயன்படுத்தலாமா? உங்கள் மேலான கருத்துகளைத் தெரிவிக்கவும்" என்று கோரியிருந்தார். 

 இந்தக் கடிதம் கேரள உயர் நீதிமன்றத்தில் சமர்ப்பிக்கப்பட்டுள்ளது. போர்டு செயலர் டிசம்பர் 17 அன்று இதற்கான தெளிவுபடுத்தல் கோரியிருந்தார். இந்தக் கடிதம் வெளியானதும், போர்டு அதிகாரிகளுக்கும் போத்திக்கும் இடையே முறைகேடு இருக்கலாம் என்ற சந்தேகம் எழுந்தது. 

நீதிமன்ற உத்தரவு மற்றும் அரசியல் சர்ச்சை 

நேற்று முன்தினம் (அக்டோபர் 6), கேரள உயர் நீதிமன்றம் இந்த விவகாரத்தில் சிறப்பு புலனாய்வு குழுவை (SIT) அமைத்து, ஒரு மாதத்திற்குள் விசாரணை முடிக்க உத்தரவிட்டது. நீதிமன்றம், "இந்தக் கடிதம் எச்சரிக்கை மணி போல ஒலிக்கிறது. கோவில் சொத்துகளின் புனிதத்தை கெடுத்து, பக்தர்களின் நம்பிக்கைக்கு துரோகம் செய்யப்பட்டுள்ளது" என்று கண்டித்தது. 

 போர்டு விஜிலன்ஸ் விங், போத்தியை ஏற்கனவே விசாரித்துள்ளது. 2019-இல் கவசங்கள் 4 மாதங்கள் தாமதமாக ஒப்படைக்கப்பட்டது, தங்கப் பீடங்கள் போத்தியின் உறவினரிடம் இருந்து மீட்கப்பட்டது உள்ளிட்டவை விசாரணையில் உள்ளன. 

சமீபத்தில், கவசங்கள் மீண்டும் கழற்றப்பட்டபோது, நீதிமன்ற அனுமதியின்றி செய்யப்பட்டதாக புகார் எழுந்தது. இது 1999-இல் விஜய் மல்ல்யா நன்கொடையாக அளித்த தங்கத்துடன் தொடர்புடையது.  எதிர்க்கட்சிகள் CBI விசாரணை கோரியுள்ளன. LDF அரசு, போர்ட்டைப் பொறுத்து விளக்கம் அளித்து வருகிறது.  இந்த விவகாரம், சபரிமலை பக்தர்களிடையே கோபத்தைத் தூண்டியுள்ளது.

இந்த சர்ச்சை, கோவில் நிர்வாகத்தில் முறைகேடுகள் நடக்கிறதா என்ற கேள்வியை எழுப்பியுள்ளது. போர்டு அதிகாரிகள் மற்றும் போத்தியின் செயல்பாடுகள் விரிவாக விசாரிக்கப்படும் என எதிர்பார்க்கப்படுகிறது. பக்தர்கள், தங்கள் நன்கொடைகளின் பாதுகாப்பை உறுதி செய்ய வேண்டும் என்று கோருகின்றனர்.

இதையும் படிங்க: உண்ணாவிரத போராட்டம் வாபஸ்! தீர்வு கிடைத்தது! தருமபுரம் ஆதினம் கோபம் தணிந்தது!