புற்றுநோய் இன்றும் மிகவும் கொடிய நோயாகத் திகழ்கிறது. இந்தியாவில் பெண்களைப் பாதிக்கும் புற்றுநோய்களில் கருப்பை வாய் மற்றும் கர்ப்பப்பை புற்றுநோய்களுக்கு அடுத்தபடியாக சினைப்பை புற்றுநோய் முக்கிய இடத்தை வகிக்கிறது. ஒவ்வொரு ஆண்டும் செப்டம்பர் மாதம் சினைப்பை புற்றுநோய் விழிப்புணர்வு மாதமாக அனுசரிக்கப்படுகிறது. 

இதன் மூலம் பெண்கள் தங்கள் உடல்நல மாற்றங்களைக் கவனித்து, சரியான நேரத்தில் மருத்துவரை அணுகுவதற்கான விழிப்புணர்வு ஏற்படுத்தப்படுகிறது. மருத்துவர் ஒருவர் இதுகுறித்து விரிவாக விளக்குகிறார். “சினைப்பை புற்றுநோயை ஆரம்ப நிலையிலேயே கண்டறிவது பெரும் சவாலாக உள்ளது. ஏனெனில் அதன் ஆரம்ப அறிகுறிகள் பெரும்பாலும் தெளிவாக இல்லாமல், சாதாரண செரிமானப் பிரச்சினைகள் அல்லது மாதவிடாய் தொடர்பான உபாதைகளுடன் ஒத்திருக்கின்றன. 

இந்த நோய் முதன்மையாக சினைப்பையில் உருவாகிறது. ஆனால் சில நேரங்களில் கருமுட்டைக் குழாய் அல்லது அருகிலுள்ள திசுக்களிலிருந்தும் தொடங்கலாம். ஆரம்பக் கட்டத்தில் அறிகுறிகள் மிகக் குறைவாகவோ அல்லது முற்றிலும் இல்லாமலோ இருக்கலாம். எனவே உடலில் ஏற்படும் புதிய, தொடர்ச்சியான மாற்றங்களை கவனமாகக் கவனிப்பது அவசியம்” என்று அவர் தெரிவிக்கிறார்.

முக்கிய ஆரம்ப அறிகுறிகளாக தொடர்ந்து இருக்கும் வயிறு உப்புசம், வயிறு அல்லது இடுப்புப் பகுதியில் வலி அல்லது அழுத்தம், சிறிதளவு உணவு உண்டாலே வயிறு நிறைந்துவிட்டது போன்ற உணர்வு, மலச்சிக்கல், அதிக வாயுத்தொல்லை, அடிக்கடி அல்லது அவசரமாக சிறுநீர் கழிக்க வேண்டிய நிலை ஆகியவை குறிப்பிடப்படுகின்றன. இவை பல சாதாரண உடல்நலப் பிரச்சினைகளாலும் ஏற்படலாம். 

ஆனால் இவை புதிதாகத் தோன்றினாலோ, நீடித்தாலோ அல்லது நாளுக்கு நாள் அதிகரித்தாலோ உடனடியாக மருத்துவரை அணுக வேண்டும். காரணங்கள் ஒரேயொரு காரணியால் மட்டும் ஏற்படுவதில்லை. வயது அதிகரிப்பு, குடும்பத்தில் சினைப்பை அல்லது மார்பகப் புற்றுநோய் வரலாறு, BRCA1 மற்றும் BRCA2 மரபணு மாற்றங்கள், எண்டோமெட்ரியோசிஸ் போன்றவை ஆபத்தை அதிகரிக்கலாம். இருப்பினும் இந்த ஆபத்து காரணிகள் இருப்பதால் நிச்சயமாக நோய் வரும் என்று அர்த்தமில்லை.

சராசரி ஆபத்துள்ள பெண்களுக்கு உயிரிழப்பைக் குறைக்கும் வகையில் நிரூபிக்கப்பட்ட வழக்கமான ஸ்க்ரீனிங் பரிசோதனை தற்போது இல்லை. அறிகுறிகள் அல்லது ஆபத்து நிலை குறித்து சந்தேகம் ஏற்பட்டால் டிரான்ஸ்வஜைனல் அல்ட்ராசவுண்ட் மற்றும் CA-125 இரத்தப் பரிசோதனை பயன்படுத்தப்படலாம். ஆனால் இவை உறுதியான ஸ்க்ரீனிங் முறைகள் அல்ல, நோய் இல்லை என்றும் உறுதியாகக் கூற முடியாது.

சிகிச்சை புற்றுநோயின் வகை மற்றும் நிலையைப் பொறுத்து மாறுபடும். அறுவை சிகிச்சை மற்றும் கீமோதெரபி முதன்மையான முறைகளாகும். சில நோயாளிகளுக்கு மரபணு மற்றும் மூலக்கூறு பண்புகளின் அடிப்படையில் இலக்கு சிகிச்சை உள்ளிட்ட சிறப்பு சிகிச்சைகளும் பரிசீலிக்கப்படலாம். முழுமையாகத் தடுக்கும் உறுதியான வழிமுறை எதுவும் இல்லை. குடும்ப வரலாறு உள்ளவர்கள் மரபணு ஆலோசனை மற்றும் பரிசோதனை செய்துகொள்ளலாம். 

அதிக ஆபத்தில் உள்ளவர்களுக்கு தடுப்பு அறுவை சிகிச்சை குறித்தும் மருத்துவருடன் கலந்தாலோசிக்கலாம். பெண்கள் தங்கள் உடல் மாற்றங்களைக் கவனித்து, வழக்கத்திற்கு மாறான அல்லது தொடர்ச்சியான அறிகுறிகள் தோன்றினால் தாமதிக்காமல் மருத்துவ ஆலோசனை பெற வேண்டும். சரியான நேரத்தில் கண்டறிந்து சிகிச்சை தொடங்குவதே உயிர் காக்கும் முக்கிய வழியாகும். விழிப்புணர்வு மாதத்தில் இந்த தகவல்களைப் பகிர்ந்துகொள்வதன் மூலம் பல உயிர்களைக் காக்க முடியும்.