சர்க்காரியா கமிஷன் மற்றும் மிசா காலக் கைது நடவடிக்கைகள் போன்ற பல தசாப்தங்களுக்கு முந்தைய பழைய வரலாறுகளைப் பேசி ஆளுங்கட்சியும் எதிர்க்கட்சிகளும் சட்டமன்றத்தின் பொன்னான நேரத்தை வீணடித்து வருவதாகவும், நடப்பு சட்டப்பேரவைக் கூட்டத்தொடரானது மக்களுக்கு எவ்விதப் பயனும் இல்லாத உபயோகமற்ற அவையாக நடைபெற்று முடிந்துள்ளதாகவும் தேசிய முற்போக்கு திராவிட கழகத்தின் (தேமுதிக) பொதுச்செயலாளரும் சட்டமன்ற உறுப்பினருமான பிரேமலதா விஜயகாந்த் மிகக் காட்டமாகச் சாடியுள்ளார்.

தமிழ்நாடு சட்டப்பேரவையின் பட்ஜெட் கூட்டத்தொடர் இறுதிக்கட்டத்தை எட்டியுள்ள நிலையில், சட்டமன்ற வளாகத்தில் செய்தியாளர்களைச் சந்தித்த பிரேமலதா விஜயகாந்த், அவையில் நடைபெற்ற விவாதங்கள் மற்றும் ஆளுங்கட்சியின் அணுகுமுறை குறித்துத் தனது கடுமையான அதிருப்தியைப் பதிவு செய்தார். மக்கள் நலன் சார்ந்த அடிப்படைப் பிரச்சினைகளை விவாதிக்காமல் அரசியல் பழிவாங்கல்களே அவையில் முன்னிறுத்தப்பட்டதாக அவர் குற்றம் சாட்டினார்.

செய்தியாளர்களிடம் பேசிய அவர், "மக்களின் வரிப்பணத்தில் நடைபெறும் சட்டமன்றத்தில் அவர்களின் அன்றாட வாழ்வாதாரப் பிரச்சினைகள், விலைவாசி உயர்வு, பாசன நீர் விவகாரங்கள் குறித்து ஆக்கப்பூர்வமாக விவாதிப்பதற்குப் பதிலாக, பல ஆண்டுகளுக்கு முந்தைய சர்க்காரியா கமிஷன் குறித்தும், மிசா காலகட்டத்தில் கைது செய்யப்பட்டது குறித்தும் விவாதித்து அவை நேரத்தை விரயம் செய்கிறார்கள். கடந்த காலப் பழைய வரலாறுகளைப் பேசி காலத்தை வீணடிப்பதை விடுத்து மக்களுக்கு என்ன நன்மை செய்தீர்கள் என்று பேச வேண்டும். ஒட்டுமொத்தத்தில் இந்த சட்டசபைக் கூட்டத்தொடரானது தமிழ்நாட்டு மக்களுக்கு எவ்விதப் பிரயோஜனமும் இல்லாத, உபயோகமற்ற ஒரு சட்டசபையாகவே நடந்திருக்கிறது" என்று தெரிவித்தார்.

இதையும் படிங்க: சட்டசபையில் திமுகவினர் அமளி, தர்ணா... சிரித்தபடியே வேடிக்கை பார்த்த எடப்பாடி பழனிசாமி..!!

மேலும் முதலமைச்சரின் பதிலுரை குறித்துக் கடுமையான குற்றச்சாட்டை முன்வைத்த அவர், "நீதிமன்றத்தின் விசாரணையில் அல்லது நிலுவையில் உள்ள வழக்குகள் மற்றும் விவகாரங்கள் குறித்து சட்டமன்றப் பேரவைக்குள் விவாதிக்கவோ பேசவோ கூடாது என்பதுதான் அவையின் அடிப்படை விதியும் மரபும் ஆகும். ஆனால், அந்த சட்டப்பேரவை நெறிமுறைகளை முற்றிலுமாகப் புறந்தள்ளிவிட்டு, நீதிமன்றத்தில் நிலுவையில் உள்ள பல விவகாரங்கள் குறித்து முதலமைச்சர் விஜய் சட்டசபையிலேயே வெளிப்படையாகப் பேசியுள்ளார். சட்டமன்ற மாண்புகளைக் காக்கத் தவறிய இந்த செயல்பாடுகள் கண்டிக்கத்தக்கது" என்று திட்டவட்டமாகத் தெரிவித்தார்.

இதையும் படிங்க: எதிர்க்கட்சி வரிசையில் காங். எம்.எல்.ஏ தாரகை கத்பர்ட்... சட்டசபையில் நடந்தது என்ன?