திருச்செந்தூர் சுப்பிரமணிய சுவாமி கோவிலில் உலகப் புகழ்பெற்ற கந்த சஷ்டி திருவிழாவின் சிகர நிகழ்ச்சியான சூரசம்ஹாரம் இன்று (அக்டோபர் 27) மாலை கோவில் கடற்கரையில் வெகு விமரிசையாக நடைபெற உள்ளது. இந்த ஆன்மிக நிகழ்வைக் காண லட்சக்கணக்கான பக்தர்கள் தமிழ்நாடு மட்டுமின்றி பல்வேறு மாநிலங்களில் இருந்தும் திருச்செந்தூரில் குவிந்து வருகின்றனர்.

ஆறுபடை வீடுகளில் முதன்மையான இந்தக் கோவிலில், முருகப் பெருமானின் அருளைப் பெறுவதற்காக பக்தர்கள் பெரும் ஆர்வத்துடன் கூடியுள்ளனர். கந்த சஷ்டி திருவிழா ஆறு நாட்கள் நடைபெறும் ஒரு புனித விழாவாகும். இதன் முக்கிய நிகழ்ச்சியான சூரசம்ஹாரம், முருகப் பெருமான் சூரபத்மன் என்ற அரக்கனை அழித்து நன்மையின் வெற்றியைக் குறிக்கும் திருவிழாவாகும். இந்த நிகழ்ச்சி கடற்கரையில் பக்தர்களின் பரவச முழக்கங்களுக்கு மத்தியில் நடைபெறும்.

இதையும் படிங்க: குலசை தசரா திருவிழா கோலாகலம்.. நள்ளிரவில் மகிஷாசூரனை வதம் செய்த முத்தாரம்மன்..!!

முருகப் பெருமான் சூரபத்மனை வதம் செய்யும் காட்சி, பக்தர்களுக்கு ஆன்மிக உணர்வையும், பக்தி பரவசத்தையும் ஏற்படுத்துகிறது. இதற்காக கோவில் வளாகமும், கடற்கரைப் பகுதியும் பக்தர்களால் நிரம்பி வழிகிறது. திருவிழாவிற்கு வரும் பக்தர்களின் வசதிக்காக, மாவட்ட நிர்வாகம் மற்றும் கோவில் நிர்வாகம் சார்பில் பல்வேறு ஏற்பாடுகள் செய்யப்பட்டுள்ளன. பக்தர்களின் பாதுகாப்பிற்காக காவல்துறையினர் பலத்த பாதுகாப்பு அளிக்கின்றனர். மேலும், போக்குவரத்து மற்றும் தங்குமிட வசதிகளும் மேம்படுத்தப்பட்டுள்ளன.

கந்த சஷ்டி திருவிழாவை ஒட்டி, பக்தர்கள் சஷ்டி விரதம் இருந்து, முருகனை வழிபட்டு, தங்கள் வேண்டுதல்களை நிறைவேற்றிக் கொள்கின்றனர். இந்த ஆண்டு, சூரசம்ஹார நிகழ்ச்சி மாலை 4 மணியளவில் தொடங்க உள்ளதாக கோவில் நிர்வாகம் தெரிவித்துள்ளது. இதற்காக கோவில் நடை அதிகாலை 1மணிக்கு திறக்கப்பட்டது. 1.30 விஸ்வரூப தீபாராதனையும், 2 மணிக்கு உதய மார்த்தாண்ட அபிஷேகம் நடைபெற்றது.

இதனையடுத்து 2.00 மணிக்கு திருவாவடுதுறை ஆதீனம் சஷ்டி மண்டபத்தில் வைத்து சுவாமி ஜெயந்தி நாதருக்கு மாவு பொடி, மஞ்சள் பொடி, திரவிய பொடி உள்பட பல்வேறு அபிஷேக பொருட்களால் அபிஷேகம் நடைபெற்று அலங்கார தீபாராதனைக்கு பின்னர் 4.30மணிக்கு சுவாமி ஜெயந்தி நாதர் கடற்கரையில் எழுந்தருளுகிறார். அங்கு சுவாமி ஜெயந்திநாதர் தன்னிடம் போரிட வரும் யானை முகம் கொண்ட சூரனையும், அடுத்து சிங்கமுகனையும், மூன்றாவதாக தன் முகம் கொண்ட சூரனையும் தன் வேலால் வதம் செய்கிறார். இறுதியில் மரமாக மாறிய சூரனை சுவாமி ஜெயந்தி நாதர் சேவலாகவும், மயிலாகவும் மாற்றி தன்னோடு ஜக்கியமாக்கி கொள்ளும் நிகழ்ச்சி நடக்கிறது.

இதனிடையே கடலில் புனித நீராடும் பக்தர்கள் பாதுகாப்பிற்காக கடலில் தடுப்புகள் அமைத்து 8 பைபர் படகுடன் கடலோர பாதுகாப்பு குழும போலிசார், மற்றும் நீச்சல் வீரர்கள் உட்பட 80 பாதுகாப்பு பணியில் ஈடுபட்டுள்ளனர். கந்த சஷ்டியின் 7-ம் திருநாளான நாளை அதிகாலை 3 மணிக்கு நடை திறக்கப்பட்டு, 3.30 மணிக்கு விஸ்வரூப தீபாராதனையும், 4 மணிக்கு உதய மார்த்தாண்ட அபிஷேகமும் நடைபெற உள்ளது. மாலை 6 மணியளவில் அம்பாளுக்கு, சுவாமி காட்சி கொடுக்கிறார். அதன்பிறகு மாலை மாற்றும் நிகழ்ச்சி நடக்கிறது. இரவில் சுவாமிக்கும், தெய்வானை அம்பாளுக்கு திருக்கல்யாணம் நடைபெற உள்ளது.

இந்தத் திருவிழா, தமிழர்களின் பண்பாட்டு மற்றும் ஆன்மிக மரபுகளை பறைசாற்றுவதாக அமைகிறது. முருகப் பெருமானின் அருளால், பக்தர்கள் மன அமைதியும், வாழ்வில் நலமும் பெறுவர் என்பது நம்பிக்கை.

இதையும் படிங்க: இன்றைய ராசிபலன் (27-10-2025)..!! இந்த ராசிக்காரர்களுக்கு இன்று பணம் கொட்டப்போகுது..!!