சென்னை மாவட்டத்தில் உள்ள ரேஷன் கார்டுதாரர்களுக்கு முக்கிய அறிவிப்பு வெளியாகியுள்ளது. குடும்ப அட்டை தொடர்பான இ-கே.ஒய்.சி. (e-KYC) பதிவை முழுமையாக நிறைவு செய்யும் நோக்கில், சென்னை மாவட்டத்தில் செயல்பட்டு வரும் அனைத்து நியாயவிலைக் கடைகளிலும் இன்று (ஞாயிற்றுக்கிழமை) சிறப்பு முகாம் நடத்தப்படுவதாக கூட்டுறவு சங்கங்களின் கூடுதல் பதிவாளர் (சென்னை மண்டலம்) அறிவித்துள்ளார். இதனால் குடும்ப அட்டைதாரர்கள் தவறாமல் இந்த வாய்ப்பைப் பயன்படுத்திக் கொள்ளுமாறு கேட்டுக்கொள்ளப்பட்டுள்ளது.

அரசின் பொது விநியோகத் திட்ட சேவைகள் தடையின்றி கிடைப்பதை உறுதி செய்யும் வகையில், குடும்ப அட்டையில் இடம்பெற்றுள்ள ஒவ்வொரு உறுப்பினரின் கைவிரல் ரேகையும் மின்னணு முறையில் பதிவு செய்யப்பட வேண்டும் என்று அதிகாரிகள் தெரிவித்துள்ளனர்.

இதுவரை e-KYC பதிவு செய்யாதவர்கள் இன்று நடைபெறும் சிறப்பு முகாமில் நேரில் கலந்து கொண்டு கட்டாயம் கைவிரல் ரேகையை பதிவு செய்ய வேண்டும் என அறிவுறுத்தப்பட்டுள்ளது.

இதையும் படிங்க: 'வீ தி லீடர்ஸ்' அடுத்த அதிரடி! புதிய அமைப்புடன் களமிறங்கும் அண்ணாமலை!! புதிய திட்டம் என்ன?

குறிப்பாக, வேலை, கல்வி அல்லது பிற காரணங்களால் தங்களது சொந்த வசிப்பிடத்தை விட்டு சென்னை அல்லது பிற பகுதிகளில் தற்காலிகமாக தங்கி இருப்பவர்களுக்கும் முக்கிய சலுகை வழங்கப்பட்டுள்ளது.

அவர்கள் குடும்ப அட்டை பதிவு செய்யப்பட்ட கடைக்குச் செல்ல வேண்டிய அவசியமின்றி, தற்போது தாங்கள் வசிக்கும் இடத்திற்கு அருகிலுள்ள எந்த ரேஷன் கடையிலும் சென்று கைவிரல் ரேகை பதிவை மேற்கொள்ளலாம் என்று அதிகாரிகள் தெரிவித்துள்ளனர்.

இந்த சிறப்பு முகாம் மூலம் இன்னும் பதிவு செய்யாத அனைத்து குடும்ப உறுப்பினர்களின் விவரங்களும் ஒரே நாளில் புதுப்பிக்கப்பட உள்ளதால், பொதுமக்கள் இந்த வாய்ப்பை தவறவிட வேண்டாம் என வலியுறுத்தப்பட்டுள்ளது. அரசு வழங்கும் அத்தியாவசிய பொருட்கள் மற்றும் பொது விநியோக சேவைகள் தொடர்பாக எதிர்காலத்தில் எந்த சிரமமும் ஏற்படாமல் இருக்க, குடும்ப அட்டையில் இடம்பெற்றுள்ள அனைவரின் e-KYC பதிவும் முழுமையாக நிறைவடைந்திருப்பது அவசியம் என்றும் தெரிவிக்கப்பட்டுள்ளது.

எனவே, குடும்ப அட்டையில் பெயர் இடம்பெற்றுள்ள ஒவ்வொரு உறுப்பினரும் இன்று நடைபெறும் சிறப்பு முகாமில் நேரில் சென்று கைவிரல் ரேகையை பதிவு செய்து e-KYC நடைமுறையை நிறைவு செய்யுமாறு அதிகாரிகள் மீண்டும் கேட்டுக்கொண்டுள்ளனர். பொதுமக்கள் அரசின் இந்த சிறப்பு முயற்சியை பயன்படுத்தி தங்களது குடும்ப அட்டை விவரங்களை முழுமையாக புதுப்பித்துக் கொள்ள வேண்டும் என்றும் அறிவுறுத்தப்பட்டுள்ளது.

இதையும் படிங்க: கஞ்சா விற்பனையில் மோதல்?! சென்னை ரவுடி வீட்டில் பெட்ரோல் குண்டு வீசிய 4 பேர் கைது! பகீர் பின்னணி!