வரும் டிசம்பர் 3ஆம் தேதி நடைபெற இருக்கும் கார்த்திகை தீபத்தை முன்னிட்டு திருவண்ணாமலை அருணாச்சலேஸ்வரர் கோவிலுக்கு லட்சக்கணக்கான மக்கள் திரள்வார்கள் என்று எதிர்பார்க்கப்படுகிறது. நவம்பர் 24ஆம் தேதி தொடங்கிய கார்த்திகை தீபத் திருவிழா, டிசம்பர் 3ஆம் தேதி வரை நடக்கவுள்ளது. கார்த்திகை தீபத் திருநாள் மாலையன்று 2,668 அடி உயரம் கொண்ட அண்ணாமலையின் உச்சத்தில் மகா தீபம் ஏற்றப்படும்.

இந்நிலையில் கார்த்திகை மகா தீப விழாவின்போது, பக்தர்கள் அருணாச்சல மலையின் உச்சிக்கு ஏறுவதற்கு தடை விதிக்கப்பட்டுள்ளது. இந்த ஆண்டு டிசம்பர் 3ஆம் தேதி நடைபெறவுள்ள மகா தீப விழாவில், பக்தர்களின் பாதுகாப்பை கருத்தில் கொண்டு இந்த நடவடிக்கை எடுக்கப்பட்டுள்ளதாக மாவட்ட நிர்வாகமும், வனத்துறையும் அறிவித்துள்ளன.

இது இரண்டாவது ஆண்டாக இத்தகைய தடை அமல்படுத்தப்படுகிறது. கடந்த 2024ஆம் ஆண்டு பெங்கால் சூறாவளியால் ஏற்பட்ட கனமழையின் போது, அருணாச்சல மலையின் கிழக்குப் பகுதியில் பெரும் நிலச்சரிவு ஏற்பட்டது. இதில் ஏழு பேர் உயிரிழந்தனர், அதில் ஐந்து குழந்தைகள் அடங்குவர்.

இதையும் படிங்க: தி.மலை கோயிலில் கார்த்திகை தீபத் திருவிழா..!! கொடியேற்றத்துடன் கோலாகல தொடக்கம்..!!

இந்த சம்பவத்தைத் தொடர்ந்து, தமிழ்நாடு அரசு ஒரு எட்டு உறுப்பினர்கள் கொண்ட நிபுணர் குழுவை அமைத்தது. இந்தக் குழு, அண்ணா பல்கலைக்கழகத்தின் மண் இயக்கவியல் மற்றும் அடித்தள பொறியியல் மையத்தின் தலைவர் தலைமையில் செயல்பட்டது. குழு மலையை ஏறி ஆய்வு செய்து, மண் மற்றும் பாறைகளின் உறுதித்தன்மையை சோதித்தது. மேலும், ஐஐடி-மெட்ராஸ் (IIT-M)யைச் சேர்ந்த குழு, நிலச்சரிவு ஏற்பட்ட இடத்தை ஆய்வு செய்தது.

அவர்கள் அறிக்கையில், தொடர்ச்சியான மழை காரணமாக மண் தளர்வடைந்துள்ளதாகவும், பாறைகள் உறுதியிழந்துள்ளதாகவும் குறிப்பிட்டுள்ளனர். இதனால், பெரிய அளவிலான கூட்டம் மலையேறினால் மேலும் நிலச்சரிவு ஏற்படும் அபாயம் உள்ளதாக எச்சரித்துள்ளனர். இந்த அறிக்கையின் அடிப்படையில், பக்தர்களை அனுமதிக்கக் கூடாது என மாவட்ட நிர்வாகம் முடிவு செய்துள்ளது. மலை ஏறும் பாதை தற்போது உறுதியற்ற நிலையில் உள்ளது. கடந்த ஆண்டு நிலச்சரிவு ஏற்பட்ட பகுதிகளில் தளர்வான பாறைகள் இன்னும் இருப்பதால், மழைக்காலத்தில் ஆபத்து அதிகரிக்கும் என நிபுணர்கள் தெரிவித்துள்ளனர்.

அதேபோல் மாவட்ட நிர்வாகத்தின் நடவடிக்கைக்கு திருவண்ணாமலை கோயிலுக்கு வரும் பக்தர்கள் முழு ஒத்துழைப்பை கொடுக்க வேண்டும் என்றும் கேட்டுக் கொள்ளப்பட்டுள்ளது. மலையேறும் பாதையில் போதுமான முன்னெச்சரிக்கை நடவடிக்கைகள் மேற்கொண்டு கண்காணிப்பதற்காக காவல் துறை, வனத்திறை மற்றும் வருவாய்த் துறைக்கும் அறிவுறுத்தப்பட்டுள்ளதாக மாவட்ட நிர்வாகம் தரப்பில் தெரிவிக்கப்பட்டுள்ளது.

பக்தர்கள் கோவில் வளாகத்தில் இருந்து தீபத்தை காணலாம் என அறிவுறுத்தப்பட்டுள்ளனர். இந்த முன்னெச்சரிக்கை நடவடிக்கை, உயிர்ச்சேதத்தை தடுக்கும் என்பதால், பக்தர்கள் புரிந்துகொள்ள வேண்டும் என மாவட்ட நிர்வாகம் வலியுறுத்தியுள்ளது. இந்த விழா, திருவண்ணாமலையின் மிகப்பெரிய சமய நிகழ்வாகும். லட்சக்கணக்கான பக்தர்கள் கூடும் இந்நிகழ்வில், பாதுகாப்பு அம்சங்கள் வலுப்படுத்தப்பட்டுள்ளன. மேலும் ஆய்வுகள் நடைபெறும் என அதிகாரிகள் தெரிவித்தனர்.

இதையும் படிங்க: தி.மலை கோயிலில் கார்த்திகை தீபத் திருவிழா..!! கொடியேற்றத்துடன் கோலாகல தொடக்கம்..!!