தமிழக சட்டமன்றத் தேர்தல் ஏப்ரல் மாதத்தில் நடைபெறவுள்ள நிலையில், அரசியல் அரங்கில் புதியதாக அறிமுகமாகியுள்ள தமிழக வெற்றிக் கழகம் (தவெக) முதல் முறையாக தேர்தல் களத்தில் இறங்குகிறது. கட்சியின் தலைவர் நடிகர் விஜய் தலைமையில், தமிழகத்தின் 234 சட்டமன்றத் தொகுதிகளிலும் தனித்துப் போட்டியிடும் முடிவை அக்கட்சி எடுத்துள்ளது.
தேர்தல் ஆணையம் ஒதுக்கீடு செய்துள்ள விசில் சின்னத்தை தவெக வலுவான பிரசார ஆயுதமாக மாற்றத் திட்டமிட்டுள்ளது. இச்சின்னம் மக்களிடையே மகிழ்ச்சி, கொண்டாட்டம் மற்றும் பொதுமக்களின் உற்சாகத்துடன் தொடர்புடையதாக விஜய் தரப்பில் கருதப்படுகிறது. இதன்மூலம் வாக்காளர்களுடன் எளிதில் இணைந்து, கட்சியின் செய்தியை திறம்பட எடுத்துச் செல்ல முடியும் என எதிர்பார்க்கப்படுகிறது.
தவெக சார்பில் வேட்பாளர்களைத் தேர்வு செய்யும் பணிகள் தீவிரமாக நடைபெற்று வருகின்றன. விருப்ப மனு வாங்கும் பணி ஏற்கனவே தொடங்கிய நிலையில், விரைவில் வேட்பாளர்கள் பட்டியலை வெளியிட திட்டமிடப்பட்டுள்ளது. கட்சி வட்டாரங்களின்படி, அடுத்த இரண்டு வாரங்களுக்குள் முதல் கட்டமாக அல்லது முழுமையாக வேட்பாளர் பட்டியலை தலைவர் விஜய் அதிகாரப்பூர்வமாக அறிவிப்பார் என்று தகவல்கள் வெளியாகியுள்ளன.
இதையும் படிங்க: கைவிரித்த காங்கிரஸ்... தவெக தனித்து போட்டியா? ... செங்கோட்டையன் கொடுத்த அதிரடி விளக்கம்...!
வேட்பாளர் தேர்வில் பெண்களுக்கு முன்னுரிமை அளிக்கப்படும் என கட்சி தரப்பில் தெரிவிக்கப்பட்டுள்ளது. மேலும், மாவட்டச் செயலாளர்கள், தொழிலதிபர்கள், பிரபலங்கள் உள்ளிட்டோருக்கு முக்கிய தொகுதிகள் ஒதுக்கப்பட வாய்ப்புள்ளதாக தகவல்கள் கூறுகின்றன. இதன்மூலம் கட்சியின் அமைப்பு வலிமையை அதிகரிப்பதோடு, பல்வேறு தரப்பினரின் ஆதரவைப் பெறும் நோக்கமும் உள்ளது.
வேட்பாளர் பட்டியல் இறுதி செய்யப்பட்டவுடன், தவெக முழு வீச்சில் பிரசாரப் பணிகளைத் தொடங்க உள்ளது. பொதுக்கூட்டங்கள், நிர்வாகிகள் சந்திப்பு, தொகுதி வாரியான சிறப்பு நிகழ்ச்சிகள் உள்ளிட்ட பல்வேறு நடவடிக்கைகள் மேற்கொள்ளப்படும். தலைவர் விஜய் தானே பல தொகுதிகளில் வேட்பாளர்களுடன் நேரடியாக நேர்காணல் நடத்தி, அவர்களை அறிமுகப்படுத்துவார் என்றும் எதிர்பார்க்கப்படுகிறது.
தமிழக அரசியலில் புதிய அலை ஒன்றை உருவாக்கும் நோக்கில் தவெக செயல்பட்டு வருவதால், இத்தேர்தல் அக்கட்சிக்கு முதல் பெரிய சோதனையாக அமையவுள்ளது. விஜய் தலைமையிலான இக்கட்சி, இளைஞர்கள், பெண்கள், பொதுமக்கள் மத்தியில் பெரும் எதிர்பார்ப்பை ஏற்படுத்தியுள்ளது. தேர்தல் நெருங்கி வரும் நிலையில், தவெகவின் அடுத்தகட்ட அறிவிப்புகள் அரசியல் வட்டாரத்தில் ஆர்வத்தை ஏற்படுத்தியுள்ளன.
இதையும் படிங்க: அதிமுகவை வம்புக்கு இழுத்தால் விஜய் வாங்கிக் கட்டிக் கொள்வார்... ஜெயக்குமார் எச்சரிக்கை..!