தமிழ்நாட்டில் பெண்கள் மற்றும் குழந்தைகளின் பாதுகாப்பை உறுதி செய்யும் நோக்கில் செயல்பட்டு வரும் தமிழ்நாடு காவல்துறையின் 'சிங்கப்பெண்' சிறப்பு அதிரடிப்படை, கடந்த ஒரே வாரத்தில் பெறப்பட்ட 255 புகார்களுக்கு உடனடி நடவடிக்கை மேற்கொண்டு 22 குற்ற வழக்குகளைப் பதிவு செய்துள்ளது.

தமிழ்நாடு காவல்துறையின் கீழ் இயங்கும் இச்சிறப்பு அதிரடிப்படையினர் மாநிலம் முழுவதும் உள்ள பள்ளிகள், கல்லூரிகள், பொதுமக்கள் கூடும் இடங்கள் மற்றும் புலம்பெயர்ந்த தொழிலாளர்கள் வசிக்கும் பகுதிகளில் தீவிரக் கண்காணிப்பு மற்றும் விழிப்புணர்வுப் பணிகளை மேற்கொண்டு வருகின்றனர். தினந்தோறும் நடத்தப்படும் விழிப்புணர்வு முகாம்கள் மூலம் மாணவ, மாணவிகள் மத்தியில் தைரியம் ஏற்பட்டு, அவர்கள் தாங்கள் சந்தித்த பழைய பாலியல் தொல்லைகள் மற்றும் அச்சுறுத்தல்கள் குறித்தும் தானாகவே முன்வந்து புகார் அளித்து வருகின்றனர்.

கடந்த ஒரு வார காலத்தில் பெறப்பட்ட புகார்கள் மீது எடுக்கப்பட்ட விரிவான நடவடிக்கைகள் குறித்து வெளியிடப்பட்டுள்ள தகவலில், காணாமல் போனதாகத் தேடப்பட்டு வந்த 2 பெண்கள் மற்றும் 4 குழந்தைகள் பாதுகாப்பாக மீட்கப்பட்டு அவர்களது குடும்பத்தினரிடம் ஒப்படைக்கப்பட்டுள்ளனர். மேலும், பொதுமக்களிடையே விழிப்புணர்வை ஏற்படுத்தும் நோக்கில் 3,537 விழிப்புணர்வு நிகழ்ச்சிகள் வெற்றிகரமாக நடத்தப்பட்டுள்ளன.

இதையும் படிங்க: "சுட்டெரிக்கும் வெயில்" - திருச்சியில் 104°F வெப்பம் பதிவு; 8 இடங்களில் 100°F-ஐத் தாண்டியது!

குற்றங்களைத் தடுக்கும் முன்னெச்சரிக்கை நடவடிக்கையாக, மாநிலம் முழுவதும் அடையாளம் காணப்பட்ட 12,115 பதற்றமான மற்றும் குற்றம் நடைபெற வாய்ப்புள்ள பகுதிகளில் அதிரடிப்படையினர் தீவிர ரோந்துப் பணிகளை மேற்கொண்டனர். அதேபோல், உரிய நேரத்தில் தலையிட்டு 2 குழந்தைத் திருமணங்களைத் தடுத்து நிறுத்தியதுடன், அறிவுசார் குறைபாடுடைய 11 நபர்களை மீட்டு உரிய மறுவாழ்வு மையங்களில் சேர்த்துள்ளனர். மேலும், கல்வியை பாதியிலேயே கைவிட்ட 40 பள்ளி இடைநிற்றல் குழந்தைகளைக் கண்டறிந்து அவர்களை மீண்டும் பள்ளிகளில் கல்வி பயிலச் சேர்த்துள்ளதாகக் காவல்துறை தரப்பில் தெரிவிக்கப்பட்டுள்ளது.

இதையும் படிங்க: "புதிய மன்றங்கள் தொடங்க உத்தரவு" - தனுஷ் ரசிகர் மன்றத்தில் தீவிரமாகும் உறுப்பினர் சேர்க்கை!