தமிழகச் சட்டமன்றத் தேர்தல் நாளை (ஏப்ரல் 23) ஒரே கட்டமாக நடைபெறவுள்ள நிலையில், தமிழக வெற்றிக் கழகத் (தவெக) தலைவர் விஜய், தமிழகத் தலைமைத் தேர்தல் அதிகாரி அர்ச்சனா பட்நாயக்கிற்கு முக்கியமான கடிதம் ஒன்றை எழுதியுள்ளார். தேர்தல் நாளில் பிரதான சாலைகள் மற்றும் முக்கிய வழித்தடங்களில் காவல் ரோந்துப் பணிகளைத் தீவிரப்படுத்த வேண்டும் என அவர் அதில் வலியுறுத்தியுள்ளார்.
தேர்தல் நாளில் எவ்வித அசம்பாவிதங்களும் இன்றி, அமைதியான முறையில் வாக்குப்பதிவு நடைபெறுவதை உறுதி செய்ய வேண்டும் என விஜய் கோரியுள்ளார். வாக்குச்சாவடிகளுக்குச் செல்லும் பிரதான சாலைகள் மற்றும் கிராமப்புற இணைப்புச் சாலைகளில் போலீஸ் ரோந்துப் பணிகளை அதிகரிக்க வேண்டும். காவல்துறையினரின் தொடர் நடமாட்டம் இருந்தால் மட்டுமே, பொதுமக்கள் எவ்வித அச்சமுமின்றித் தங்களது ஜனநாயகக் கடமையை ஆற்ற முன்வருவார்கள் என அவர் சுட்டிக்காட்டியுள்ளார்.
இதற்கு முன்னதாகத் தனது தேர்தல் பிரச்சாரத்தின் போது ஏற்பட்ட பாதுகாப்பு குளறுபடிகள் குறித்துத் தவெக தரப்பில் தேர்தல் ஆணையத்திடம் முறையிடப்பட்டது. பெரம்பூர் முதல் கொளத்தூர் வரை நடைபெற்ற பிரச்சாரத்தின் போது, காவல்துறையினர் போதிய பாதுகாப்பு மற்றும் போக்குவரத்து மேலாண்மை செய்யவில்லை எனத் தவெக பொதுச்செயலாளர் சி.டி.ஆர். நிர்மல் குமார் ஏற்கனவே புகார் அளித்திருந்தார். பிரச்சாரக் கூட்டங்களில் ஏற்பட்ட பாதுகாப்புச் சிக்கல்களைக் கருத்தில் கொண்டு, நாளை தேர்தல் நாளிலும் அதே போன்ற நிலை ஏற்படக்கூடாது என்பதில் விஜய் உறுதியாக உள்ளார்.
இதையும் படிங்க: வாக்களிக்க சொந்த ஊர் செல்லும் மக்கள்! கிளாம்பாக்கத்தில் கட்டுக்கடங்காத கூட்டம்!
தனது அறிக்கையின் வாயிலாகத் தமிழக மக்களுக்கு விஜய் விடுத்துள்ள செய்தியில் கடந்த காலங்களில் எனக்குப் பெரும் ஆதரவு அளித்த தமிழ்நாட்டு மக்களுக்கு நன்றிக் கடனாகச் சேவை செய்யவே அரசியலுக்கு வந்துள்ளேன். எவ்விதப் பயமுறுத்தல்களுக்கும் அஞ்சாமல், நாளை அனைவரும் அதிகாலையிலேயே வாக்குச்சாவடிக்குச் சென்று தங்களது வாக்குகளைப் பதிவு செய்ய வேண்டும் என அவர் வேண்டுகோள் விடுத்துள்ளார்.
விஜய் உள்ளிட்ட அரசியல் கட்சித் தலைவர்களின் கோரிக்கையைத் தொடர்ந்து, தமிழகம் முழுவதும் சுமார் 1.5 லட்சம் காவலர்கள் மற்றும் 50-க்கும் மேற்பட்ட துணை ராணுவப் படை கம்பெனிகள் பாதுகாப்புப் பணியில் ஈடுபடுத்தப்பட்டுள்ளன. மேலும், பதற்றமான வாக்குச்சாவடிகளில் கூடுதல் கண்காணிப்புக் கேமராக்கள் பொருத்தப்பட்டுள்ளன.
நாளை காலை 7 மணிக்கு வாக்குப்பதிவு தொடங்கவுள்ள நிலையில், விஜய்யின் இந்தக் கடிதம் அரசியல் களத்தில் முக்கியத்துவம் வாய்ந்ததாகப் பார்க்கப்படுகிறது.
இதையும் படிங்க: சிங்கப்பூர் டூ திருச்சி!! ஜனநாயக கடமையாற்ற பறந்து வரும் தமிழர்கள்!! விமானம் ஹவுஸ்புல்!