தமிழக சட்டமன்றத் தேர்தலுக்கு இன்னும் சில வாரங்களே உள்ள நிலையில், தென் மண்டல அளவில் திமுகவின் பலத்தை நிரூபிக்கும் வகையில் விருதுநகரில் பிப்ரவரி 7-ஆம் தேதி பிரம்மாண்டமான இளைஞரணி நிர்வாகிகள் மாநாடு நடைபெறவுள்ளது. இந்தப் பொதுக்கூட்டத்தில் திமுக தலைவரும், தமிழக முதலமைச்சருமான மு.க. ஸ்டாலின் கலந்துகொண்டு சிறப்புரையாற்றுகிறார்.
இந்த மாநாட்டில் விருதுநகர், மதுரை, திருநெல்வேலி, கன்னியாகுமரி உள்ளிட்டத் தென் மாவட்டங்களைச் சேர்ந்த சுமார் 1 லட்சம் இளைஞரணி நிர்வாகிகள் பங்கேற்பார்கள் எனத் திமுக தலைமை அதிகாரப்பூர்வமாக அறிவித்துள்ளது. இதற்காகச் சுமார் 100 ஏக்கர் பரப்பளவில் பிரம்மாண்டப் பந்தல் மற்றும் மேடை அமைக்கும் பணிகள் இறுதி கட்டத்தை எட்டியுள்ளன.
இதையும் படிங்க: அல்வா கொடுத்த பாஜக; ஆட்டம் போடும் தவெக! அமைச்சர் தா.மோ.அன்பரசன் அனல் பறக்கும் பேச்சு!
இளைஞரணிச் செயலாளரும், துணை முதலமைச்சருமான உதயநிதி ஸ்டாலின் முன்னிலையில் நடைபெறும் இந்த மாநாடு, தேர்தலுக்கான இளைஞர்களின் பங்களிப்பை உறுதி செய்வதாக அமையும். குறிப்பாக, பூத் கமிட்டி பணிகளை வலுப்படுத்துவது குறித்து நிர்வாகிகளுக்கு ஆலோசனைகள் வழங்கப்பட உள்ளன.
தமிழகம் தலைகுனியாது என்ற முழக்கத்தோடு நடைபெறும் இந்த மாநாட்டில், மத்திய அரசின் புறக்கணிப்புகள் மற்றும் அதிமுக-பாஜக கூட்டணியின் அரசியல் வியூகங்களை முறியடிப்பது குறித்து முதலமைச்சர் மு.க. ஸ்டாலின் முக்கிய அறிவிப்புகளை வெளியிடுவார் என எதிர்பார்க்கப்படுகிறது.
மாநாட்டிற்கான பாதுகாப்பு மற்றும் அடிப்படை வசதிகளை அமைச்சர்கள் தங்கம் தென்னரசு மற்றும் சாத்தூர் ராமச்சந்திரன் ஆகியோர் நேரில் ஆய்வு செய்து வருகின்றனர். மாநாட்டிற்கு வரும் தொண்டர்களுக்குச் சிறப்பு உணவகம் மற்றும் வாகன நிறுத்த வசதிகளும் செய்யப்பட்டுள்ளன.
சமீபத்தில் மதுரையில் அதிமுக மாநாடு நடத்திய நிலையில், அதற்குப் பதிலடி கொடுக்கும் விதமாகவும், தென் தமிழகம் எப்போதும் திமுகவின் கோட்டை என்பதை நிரூபிக்கவும் இந்த மாநாட்டைத் திமுக மிகக் கவனமாகத் திட்டமிட்டுள்ளது. குறிப்பாக, இளைஞர்கள் மத்தியில் திராவிட மாடல் ஆட்சியின் சாதனைகளைக் கொண்டு சேர்ப்பதே இந்த மாநாட்டின் முதன்மை இலக்காகும்.
இதையும் படிங்க: திமுகவின் ‘பத்தாண்டு’ திட்டம்: 10,000 போலி வாக்காளர்கள் சேர்ப்பு! - முன்னாள் அமைச்சர் தங்கமணி புகார்!