சென்னை, டிசம்பர் 11: தமிழக பாஜக முன்னாள் தலைவர் கே. அண்ணாமலை, தி.மு.க., அரசையும் முதல்வர் மு.க. ஸ்டாலினையும் கடுமையாக விமர்சித்துள்ளார். “ஊர் ஊராக உங்கள் தந்தைக்கு சிலை வைப்பது முக்கியமா? அல்லது அரசுப் பள்ளிகளுக்கு கட்டடங்கள் கட்டிக் கொடுப்பது முக்கியமா?” என்று நேரடியாகக் கேள்வி எழுப்பியுள்ளார்.

திருவள்ளூர் மாவட்டத்தில் உள்ள பாலவாக்கம் அரசு உயர்நிலைப் பள்ளியிலும், ஊத்துக்கோட்டை அரசு பெண்கள் மேல்நிலைப் பள்ளியிலும் சேர்ந்து 1,000-க்கும் மேற்பட்ட மாணவ-மாணவிகள் பயின்று வருகின்றனர். ஆனால், இந்தப் பள்ளிகளில் போதிய வகுப்பறைகள் இல்லாததால், மாணவர்கள் மைதானத்தில் தரையில் அமர்ந்து பாடம் நடத்தப்படுவதாக அண்ணாமலை சுட்டிக்காட்டியுள்ளார்.

“பெற்றோர்களின் கடின உழைப்பில் மாணவர்கள் படித்து சாதனை படைக்கிறார்கள். ஆனால், தி.மு.க., அரசு அந்தச் சாதனைகளில் தங்கள் ஸ்டிக்கரை ஒட்டிக் கொண்டு ஏமாற்றுகிறது. உண்மையில் அரசுப் பள்ளிகளுக்கு அடிப்படை வசதிகள் கூட செய்து தரவில்லை” என்று அண்ணாமலை குற்றம் சாட்டியுள்ளார்.

இதையும் படிங்க: இதுலாம் முதல்வர் பண்ணுற காரியமா? இவ்ளோ தப்பு பண்ணிட்டு சுப்ரீம் கோர்ட் எதுக்கு போறீங்க! அண்ணாமலை விளாசல்!

குறிப்பாக, பள்ளிக் கல்வித் துறை அமைச்சர் அன்பில் மகேஷ் பொய்யாமொழியின் சொந்த மாவட்டமான திருவள்ளூரிலேயே இந்த நிலை இருப்பதை அவர் சுட்டிக்காட்டியுள்ளார். “ஆட்சிக்கு வந்த உடனே 10,000 பள்ளிகளுக்கு புதிய கட்டடம் கட்டித் தருவோம் என்று பொய் வாக்குறுதி கொடுத்த தி.மு.க., இப்போது ஆட்சி முடியப் போகும் தருணத்திலும் எந்த மாவட்டத்தில் எத்தனை பள்ளிகளுக்கு கட்டடம் கட்டினார்கள் என்று சொல்ல மறுக்கிறது” என்று அண்ணாமலை விமர்சித்தார்.

மேலும், “சட்டமன்ற உறுப்பினர்களுக்கு கடிதம் எழுதப் போகிறேன் என்று அமைச்சர் நாடகம் ஆடுகிறார். ‘Out of Contact’ முதல்வர் ஸ்டாலின், உண்மையாகவே மக்கள் பிரச்சனைகளைப் பார்க்க வேண்டும்” என்று அண்ணாமலை தெரிவித்தார்.

தமிழகம் முழுவதும் ஆயிரக்கணக்கான அரசுப் பள்ளிகள் கட்டட வசதியின்றி செயல்பட்டு வருவதாகவும், இதற்கு தி.மு.க., அரசு பொறுப்பேற்க வேண்டும் என்றும் அவர் வலியுறுத்தியுள்ளார். இந்த விமர்சனம் சமூக வலைதளங்களில் பெரும் பரபரப்பை ஏற்படுத்தியுள்ளது.

இதையும் படிங்க: உரைக்கவில்லையா ஸ்டாலின் உங்களுக்கு?! செம்மொழி பூங்கா திறப்பு விழா சர்ச்சை! அண்ணாமலை காட்டம்!