சென்னை: தமிழகத்தின் தலைநகரான சென்னை இன்று தனது 387வது பிறந்தநாளை கொண்டாடுகிறது. இதையொட்டி அரசியல் கட்சி தலைவர்கள் உள்ளிட்ட பல்வேறு தரப்பினரும் சென்னைக்கு வாழ்த்து தெரிவித்து வருகின்றனர். சென்னை நாள் ஆண்டுதோறும் ஆகஸ்ட் 22ம் தேதி கொண்டாடப்பட்டு வரும் நிலையில், இந்த ஆண்டு கொண்டாட்டமும் கவனம் பெற்றுள்ளது.

இதையொட்டி தமிழக முதல்வர் விஜய் தனது எக்ஸ் சமூக வலைதளப் பக்கத்தில் சென்னைக்கு வாழ்த்து தெரிவித்துள்ளார். வரலாற்றை சுமந்தபடியே நவீன வளர்ச்சியுடன் வேகமாக முன்னேறி வரும் சென்னை, தமிழகத்தின் வெற்றித் தலைநகராக விளங்குவதாக அவர் குறிப்பிட்டுள்ளார்.

சென்னையின் வரலாற்று சிறப்பு, பண்பாட்டு அடையாளம் மற்றும் பல்வேறு துறைகளில் ஏற்பட்டுள்ள வளர்ச்சியையும் முதல்வர் விஜய் தனது வாழ்த்துச் செய்தியில் சுட்டிக்காட்டியுள்ளார். கல்வி, மருத்துவம், தொழில்நுட்பம் உள்ளிட்ட துறைகளில் சென்னை தொடர்ந்து முக்கியத்துவம் பெற்று வருவதாகவும் அவர் தெரிவித்துள்ளார்.

இதையும் படிங்க: ஸ்மைல் ப்ளீஸ் நண்பா!! போட்டோகிராஃபர்களை வீடியோ எடுத்து மகிழ்ந்த முதலமைச்சர் விஜய்! சட்டசபையில் சுவாரஸ்யம்!

பல மொழிகள், பல்வேறு இனங்கள் மற்றும் மாறுபட்ட பண்பாடுகளைச் சேர்ந்த மக்களை அரவணைத்து, அனைவருக்கும் வாய்ப்புகளை வழங்கும் நகரமாக சென்னை திகழ்வதாகவும் முதல்வர் குறிப்பிட்டுள்ளார்.

வேலைவாய்ப்பு மற்றும் தொழில் வாய்ப்புகளை தேடி தமிழகத்தின் பல்வேறு பகுதிகளில் இருந்தும், வெளிமாநிலங்களில் இருந்தும் மக்கள் தொடர்ந்து சென்னைக்கு வருவது, மாநகரத்தின் முக்கியத்துவத்தை மேலும் அதிகரித்துள்ளது.

சென்னையின் பாரம்பரிய அடையாளங்களையும் வரலாற்று பெருமையையும் பாதுகாப்பதுடன், நவீன உட்கட்டமைப்பு வசதிகளுடன் உலகத்தரம் வாய்ந்த பெருநகரமாக சென்னையை உருவாக்க வேண்டும் என்பதே அரசின் நோக்கம் என விஜய் தெரிவித்துள்ளார்.

அனைத்து மக்களுக்கும் சம வாய்ப்பு, பாதுகாப்பான சூழல் மற்றும் வளமான வாழ்க்கை கிடைக்க வேண்டும் என்றும் அவர் வலியுறுத்தியுள்ளார். “வளரட்டும் சென்னைப் பெருநகரம்; உயரட்டும் மக்களின் வாழ்க்கைத்தரம்” என்ற கருத்துடன் தனது சென்னை நாள் வாழ்த்தை முதல்வர் நிறைவு செய்துள்ளார்.

இந்நிலையில், சென்னையின் 387 ஆண்டுகால வரலாற்றை நினைவுகூரும் வகையில் சமூக வலைதளங்களிலும் சென்னை நாள் தொடர்பான பதிவுகள் அதிகளவில் பகிரப்பட்டு வருகின்றன. வரலாற்று நகரம் முதல் நவீன மாநகரம் வரையிலான சென்னையின் பயணம் மீண்டும் பேசுபொருளாகியுள்ளது.

இதையும் படிங்க: ஒண்டிவீரன் நினைவு நாள்! ஒரு கையை இழந்தும் போராடிய வீரன்! முதல்வர் விஜய் புகழாரம்!