சென்னை கோயம்பேடு நியூ காலனி பகுதியில் 4-ம் வகுப்பு படித்து வந்த 9 வயது சிறுவன் உயிரிழந்த சம்பவம் அதிர்ச்சியை ஏற்படுத்தியுள்ளது. சிறுவனை அவரது தாயுடன் வசித்து வந்த தமிழ்ச்செல்வன் என்பவர் கொலை செய்ததாக போலீசார் சந்தேகித்து, அவரை தீவிரமாக தேடி வருகின்றனர்.

நியூ காலனி 8-வது தெருவைச் சேர்ந்த பூவரசி, கணவரை பிரிந்து தனது மகன் தருணுடன் வசித்து வந்தார். இந்த நிலையில் கோவிலம்பாக்கத்தைச் சேர்ந்த பெயிண்டர் தமிழ்ச்செல்வனுடன் அவருக்கு பழக்கம் ஏற்பட்டதாக கூறப்படுகிறது. நாளடைவில் இருவரும் நெருக்கமாகி, கடந்த சில மாதங்களாக ஒரே வீட்டில் வசித்து வந்ததாக போலீசார் தெரிவித்துள்ளனர்.

இருவருக்கும் இடையே அடிக்கடி குடும்ப பிரச்சினை தொடர்பாக தகராறு ஏற்பட்டதாக கூறப்படுகிறது. சம்பவத்தன்று இரவு பூவரசியும் தமிழ்ச்செல்வனும் கோயம்பேடு பஸ் நிலையத்தில் இருந்தபோது மீண்டும் வாக்குவாதம் ஏற்பட்டதாக தெரிகிறது. பின்னர் தமிழ்ச்செல்வன் மட்டும் வீட்டுக்கு சென்றுள்ளார்.

இதையும் படிங்க: வீட்டு உரிமையாளர்களுக்கு ஷாக்? தமிழகத்தில் சொத்து வரி 100% வரை உயர்த்த திட்டம்!

அதன்பிறகு பூவரசியை செல்போனில் தொடர்பு கொண்ட தமிழ்ச்செல்வன், அவரது மகன் தருணை கொல்லப் போவதாக மிரட்டியதாக போலீசார் கூறுகின்றனர். சிறிது நேரத்தில் மீண்டும் போன் செய்து, சிறுவனை கொன்றுவிட்டதாக தெரிவித்ததாகவும் கூறப்படுகிறது.

இதைக் கேட்டு அதிர்ச்சியடைந்த பூவரசி உடனடியாக வீட்டுக்கு சென்றுள்ளார். அங்கு தருண் உயிரிழந்த நிலையில் கிடந்ததை பார்த்து கதறி அழுததாக போலீஸ் விசாரணையில் தெரியவந்துள்ளது. தகவல் அறிந்த கோயம்பேடு போலீசார் சம்பவ இடத்துக்கு சென்று சிறுவனின் உடலை மீட்டு கீழ்ப்பாக்கம் அரசு மருத்துவமனைக்கு பிரேத பரிசோதனைக்காக அனுப்பினர்.

முதற்கட்ட விசாரணையில், பூவரசியுடன் ஏற்பட்ட தகராறின் தொடர்ச்சியாக தமிழ்ச்செல்வன் ஆத்திரத்தில் சிறுவனை கொலை செய்திருக்கலாம் என போலீசார் சந்தேகிக்கின்றனர். சம்பவத்துக்கு முன்பு தமிழ்ச்செல்வன் மதுபோதையில் இருந்ததாகவும் கூறப்படுகிறது.

மேலும், பூவரசியின் செல்போனுக்கு வேறு சிலரிடமிருந்து வந்த அழைப்புகள் தொடர்பாக தமிழ்ச்செல்வன் சந்தேகம் கொண்டதாகவும், இதனால் இருவருக்கும் அடிக்கடி பிரச்சினை ஏற்பட்டதாகவும் விசாரணையில் தெரியவந்துள்ளது.

சம்பவத்துக்குப் பிறகு தமிழ்ச்செல்வன் தலைமறைவாகியுள்ள நிலையில், அவரை பிடிக்க போலீசார் தனிப்படை அமைத்து தேடி வருகின்றனர். சிறுவனின் மரணம் தொடர்பாக தொடர்ந்து விசாரணை நடைபெற்று வருகிறது.

இதையும் படிங்க: 717 டாஸ்மாக் கடைகள் மூடியும் குறையாத மது விற்பனை! தமிழகத்தில் தினமும் 1 கோடி மது பாட்டில்கள் சேல்ஸ்?