பாக்தாத்: சுமார் இரண்டு தசாப்தங்களாக நீடித்த அமெரிக்காவின் ராணுவ இருப்பு ஈராக்கில் முடிவுக்கு வந்துள்ளது. அமெரிக்கப் படைகள் செப்டம்பர் 30-ம் தேதி ஈராக்கிலிருந்து முழுமையாக வெளியேறிய நிலையில், அந்நாட்டின் எதிர்கால பாதுகாப்பு மற்றும் ஈரானின் பிராந்திய செல்வாக்கு குறித்து புதிய விவாதங்கள் உருவாகியுள்ளன.

2003-ம் ஆண்டு சதாம் உசேன் தலைமையிலான அரசை அகற்றும் நோக்கில் அமெரிக்கா தலைமையிலான கூட்டுப்படை ஈராக் மீது படையெடுத்தது. பேரழிவு ஆயுதங்கள் இருப்பதாக அப்போது அமெரிக்கா உள்ளிட்ட நாடுகள் குற்றம்சாட்டின. பின்னர் சதாம் உசேன் கைது செய்யப்பட்டு, 2006-ம் ஆண்டு தூக்கிலிடப்பட்டார்.

2011-ம் ஆண்டு அமெரிக்கப் படைகளின் பெரும்பாலானோர் ஈராக்கிலிருந்து வெளியேறினர். ஆனால் 2014-ல் ஐ.எஸ். அமைப்புக்கு எதிரான நடவடிக்கைக்காக அமெரிக்கப் படைகள் மீண்டும் ஈராக்கில் களமிறங்கின. அதன்பிறகு அமெரிக்கா தலைமையிலான சர்வதேச கூட்டுப்படை, ஈராக் பாதுகாப்புப் படைகளுக்கு பயிற்சி, உளவுத்தகவல் மற்றும் கண்காணிப்பு உள்ளிட்ட ஆதரவுகளை வழங்கி வந்தது.

இதையும் படிங்க: ஈரான் உச்சத் தலைவர் மொஜ்தபா கமேனி என்ன ஆச்சு?... பேரதிர்ச்சியில் உறைந்த உலக நாடுகள்...!

அமெரிக்காவும் ஈராக் அரசும் 2024-ல் மேற்கொண்ட ஒப்பந்தத்தின் அடிப்படையில் கூட்டுப்படையின் ராணுவப் பணி படிப்படியாக முடிவுக்கு கொண்டு வரப்பட்டது. இறுதியாக ஈராக்கில் இருந்த அமெரிக்கப் படைகளும் செப்டம்பர் 30-ம் தேதி வெளியேறியுள்ளன.

இனி இரு நாடுகளுக்கும் இடையிலான பாதுகாப்பு ஒத்துழைப்பு ராணுவப் படைகள் மூலம் அல்லாமல் உளவுத்தகவல் மற்றும் இருதரப்பு பாதுகாப்பு ஒத்துழைப்பு அடிப்படையில் தொடரும் என தெரிவிக்கப்பட்டுள்ளது.

அமெரிக்கப் படைகள் வெளியேறியதை ஈரான் ஆதரவு பெற்ற ஆயுதக் குழுக்கள் வரவேற்றுள்ளன. இதை ஈராக்கின் இறையாண்மையை மீட்டெடுக்கும் நடவடிக்கையாக அந்தக் குழுக்கள் பார்க்கின்றன. மறுபுறம், ஈராக்கில் அமெரிக்காவின் ராணுவ இருப்பு முடிவுக்கு வந்ததால், ஈரானின் அரசியல் மற்றும் பாதுகாப்பு செல்வாக்கு மேலும் அதிகரிக்கக்கூடும் என்ற கருத்துகளும் முன்வைக்கப்படுகின்றன.

அதே நேரத்தில், ஈராக் பாதுகாப்பில் வெற்றிடம் உருவாகுமா என்ற கேள்வியும் எழுந்துள்ளது. குறிப்பாக ஐ.எஸ். அமைப்பின் செயல்பாடுகள் முற்றிலும் முடிவுக்கு வராத நிலையில், அமெரிக்கா வழங்கி வந்த உளவுத்தகவல், கண்காணிப்பு மற்றும் தளவாட ஆதரவு இல்லாமல் ஈராக் பாதுகாப்புப் படைகள் அந்த அச்சுறுத்தல்களை எவ்வாறு எதிர்கொள்ளும் என்பது முக்கியமானதாகியுள்ளது.

வடக்கு ஈராக்கில் உள்ள குர்திஷ் தன்னாட்சி பிராந்தியத்திலும் அமெரிக்கப் படைகள் வெளியேறுவது குறித்து கவலைகள் வெளிப்பட்டுள்ளன. குறிப்பாக வான் பாதுகாப்பு மற்றும் பிராந்திய ஆயுதக் குழுக்களின் நடவடிக்கைகள் தொடர்பாக அப்பகுதி தலைவர்கள் எச்சரிக்கை தெரிவித்துள்ளனர்.

இதனால், அமெரிக்கப் படைகளின் வெளியேற்றம் ஈராக்கின் ஒரு நீண்டகால அத்தியாயத்தை முடித்துள்ள நிலையில், அடுத்த கட்டத்தில் அந்நாட்டு அரசு உள்நாட்டு ஆயுதக் குழுக்கள், ஐ.எஸ். அச்சுறுத்தல் மற்றும் வெளிநாட்டு செல்வாக்கு ஆகியவற்றை எவ்வாறு சமாளிக்கிறது என்பது முக்கியத்துவம் பெறுகிறது.

இதையும் படிங்க: ஒழுங்காக நடந்து கொள்ளுங்கள்!! முழு நாட்டையும் தகர்ப்பேன்! ஈரானுக்கு டிரம்ப் விடுத்த எச்சரிக்கை!