போக்சோ வழக்குகளில் கைது செய்யப்பட்டு சென்னை புழல் சிறையில் அடைக்கப்பட்டுள்ள 'கிரானைட்' வீரமணியிடம், சிறுமிகளுடன் அவர் இருக்கும் வீடியோக்களை வெளியிட்டுவிடுவதாக மிரட்டி, ரயில்வே தொழிற்சங்க நிர்வாகியின் மகனும் ரியல் எஸ்டேட் தொழிலதிபருமான பிரகாஷ் பல கோடி ரூபாய் பெற்றதாக சிறப்பு புலனாய்வுக் குழு போலீசாரின் விசாரணையில் தெரியவந்துள்ளதாக தகவல் வெளியாகியுள்ளது.

85 வயதான வீரமணி மற்றும் அவரது தோழி சாந்தி (61) உள்ளிட்ட எட்டு பேரிடம் சிறப்பு புலனாய்வுக் குழு போலீசார் விசாரணை நடத்தி வருகின்றனர். இந்த விசாரணையின்போது வீரமணி, சாந்தி மற்றும் அவரது கணவர் மகேந்திர சிம்ஹன் ஆகியோரிடம் நடத்தப்பட்ட விசாரணையில், பிரகாஷ் என்பவர் மூலம் போலீஸ் அதிகாரிகளுக்கு பல கோடி ரூபாய் பணமும், கிலோ கணக்கில் தங்கமும் வழங்கப்பட்டதாகக் கூறப்படும் தகவல்கள் வெளிவந்துள்ளதாகத் தெரிகிறது.

தொடர்ந்து நடத்தப்பட்ட விசாரணையில், வீரமணியின் மகள் அர்ச்சனாவின் நெருங்கிய நட்பு வட்டத்தில் இருந்த பிரகாஷ், வீரமணி சிறுமிகளுடன் இருக்கும் வீடியோக்களை போலீசாரிடம் ஒப்படைத்துவிடுவதாக மிரட்டி அவரிடம் இருந்து கோடிக்கணக்கில் பணம் பெற்றதாக விசாரணையில் தெரியவந்துள்ளதாகக் கூறப்படுகிறது. இந்தப் பணப் பரிமாற்றம் தொடர்பாகவும் போலீசார் விசாரித்து வருகின்றனர்.

இதையும் படிங்க: சட்ட நடவடிக்கையில் இருந்து தப்பிக்க இடைத்தரகர்களுக்கு ரூ.100 கோடி!! கொட்டிக் கொடுத்த வீரமணி!

வீரமணி தனது இரண்டு சொத்துகளை விற்று அதன் மூலம் கிடைத்த பணத்தையும் பிரகாஷிடம் கொடுத்ததாகக் கூறப்படுகிறது. இதுபோக, அவரது வங்கிக் கணக்கில் இருந்த ரூ.20 கோடியை சிறப்பு புலனாய்வுக் குழு போலீசார் முடக்கியுள்ளனர். இந்தப் பணத்தின் பின்னணி மற்றும் அதன் பரிமாற்றங்கள் குறித்தும் விசாரணை நடைபெற்று வருகிறது.

வீரமணி உள்ளிட்டோர் தொடர்புடைய வழக்கில் பிரகாஷும் முக்கிய நபராகச் சேர்க்கப்பட்டுள்ளதாகத் தகவல் வெளியாகியுள்ளது. அவரிடம் விசாரணை நடத்தினால், போலீஸ் அதிகாரிகள் யார் யாருக்கு எவ்வளவு பணம் வழங்கப்பட்டது, எத்தனை கிலோ தங்கம் கைமாறியது என்பன உள்ளிட்ட விவரங்கள் தெரியவரும் என விசாரணைக் குழுவினர் கருதுகின்றனர்.

இதையடுத்து பிரகாஷை போலீசார் தீவிரமாகத் தேடி வருகின்றனர். அவர் பிரிட்டன் தலைநகர் லண்டனுக்குத் தப்பிச் சென்றுவிட்டதாக போலீஸ் தரப்பில் கூறப்படுகிறது. மேலும், பிரகாஷ் ஹவாலா பணப் பரிமாற்றத்திலும் ஈடுபட்டிருக்கலாம் என்ற கோணத்தில் விசாரணை நடைபெற்று வருவதாக போலீசார் தெரிவித்துள்ளனர்.

வீரமணி வழக்கில் பணம் மற்றும் தங்கம் கைமாறியதாகக் கூறப்படும் விவகாரம், போலீஸ் அதிகாரிகளுக்கு தொடர்பு இருப்பதாக எழுந்துள்ள சந்தேகம், முக்கிய நபராகக் குறிப்பிடப்படும் பிரகாஷ் வெளிநாட்டுக்குச் சென்றுள்ளதாக வெளியாகியுள்ள தகவல் எனப் பல்வேறு கோணங்களில் சிறப்பு புலனாய்வுக் குழுவின் விசாரணை தொடர்ந்து நடைபெற்று வருகிறது. விசாரணையின் முடிவிலேயே இந்தப் பணப் பரிமாற்றங்கள் தொடர்பான முழு விவரங்களும் தெரியவரும்.

இதையும் படிங்க: சாந்தியின் சதி வலை?! குற்றத்தை மூடி மறைக்க செய்த கேடி வேலைகள்! வீரமணி அதிர்ச்சி வாக்குமூலம்!