கண்டிகை: செங்கல்பட்டு மாவட்டம் கண்டிகையில் உள்ள அரசு பள்ளியில் மாணவி ஒருவர் தொடர்பாக பாலியல் குற்றச்சாட்டு பரவியதை தொடர்ந்து, பள்ளியில் படிக்கும் மற்ற மாணவ-மாணவிகளின் பெற்றோர் மற்றும் உறவினர்கள் 500-க்கும் மேற்பட்டோர் பள்ளி முன்பு சாலையில் அமர்ந்து திடீர் மறியலில் ஈடுபட்டனர். இதனால் வண்டலூர்-கேளம்பாக்கம் சாலையில் கடும் போக்குவரத்து நெரிசல் ஏற்பட்டது.

கேளம்பாக்கம்-வண்டலூர் சாலையில் கண்டிகை பகுதியில் அரசு பள்ளி செயல்பட்டு வருகிறது. இங்கு 10-ம் வகுப்பு படிக்கும் மாணவி ஒருவர் பள்ளி கழிப்பறைக்கு சென்றபோது மர்ம நபரால் பாலியல் தொல்லைக்கு ஆளானதாக தகவல் பரவியது. மாணவி மயக்கமடைந்ததாகவும், பின்னர் சக மாணவிகள் அவரை மீட்டு ஆசிரியர்களிடம் தெரிவித்ததாகவும் கூறப்பட்டது.

இதையடுத்து பள்ளி நிர்வாகம் மாணவியை அருகில் உள்ள தனியார் மருத்துவமனையில் சிகிச்சைக்காக அனுமதித்தது. தகவல் அறிந்த தாழம்பூர் போலீசார் சம்பவம் குறித்து விசாரணையை தொடங்கினர். கேளம்பாக்கம் அனைத்து மகளிர் போலீசாரும், மாவட்ட குழந்தைகள் நலத்துறை அதிகாரிகளும் விசாரணையில் ஈடுபட்டனர்.

இதையும் படிங்க: வண்டலூர் பள்ளியில் மாணவிக்கு பாலியல் கொடுமை? ‘மூடி மறைக்க முயற்சி’ – கனிமொழி எம்.பி குற்றச்சாட்டு!

மாணவிக்கு நடத்தப்பட்ட மருத்துவ பரிசோதனையின் அடிப்படையில், பாலியல் வன்கொடுமை நடந்ததற்கான ஆதாரம் இல்லை என விசாரணை தரப்பில் தெரிவிக்கப்பட்டதாக கூறப்படுகிறது.

தொடர்ந்து மாணவியிடம் போலீசார் விசாரணை நடத்தியபோது, தேர்வு தொடர்பான அச்சம் காரணமாகவே இவ்வாறு கூறியதாக தெரியவந்ததாக போலீஸ் தரப்பில் தெரிவிக்கப்பட்டுள்ளது. இதையடுத்து மாணவிக்கு அறிவுரை வழங்கப்பட்டதாக கூறப்படுகிறது.

இதற்கிடையே பள்ளியில் மாணவி பாலியல் வன்கொடுமைக்கு ஆளானதாக தகவல் பரவியதால், மற்ற மாணவர்களின் பெற்றோர் மற்றும் உறவினர்கள் அதிர்ச்சி அடைந்தனர். பள்ளி மாணவர்களின் பாதுகாப்பு குறித்து விளக்கம் அளிக்க வேண்டும் என வலியுறுத்தி 500-க்கும் மேற்பட்டோர் பள்ளி முன்பு திரண்டனர். சிலர் பதாகைகளை ஏந்தியபடி சாலையில் அமர்ந்து மறியலில் ஈடுபட்டனர்.

இதனால் வண்டலூர்-கேளம்பாக்கம் சாலையில் இருபுறமும் வாகனங்கள் நீண்ட வரிசையில் நின்றன. வண்டலூர் முதல் கண்டிகை வரையிலும், கண்டிகை முதல் கேளம்பாக்கம் வரையிலும் போக்குவரத்து பாதிக்கப்பட்டது.

தகவல் அறிந்த தாழம்பூர் போலீசார் சம்பவ இடத்துக்கு சென்று போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர். பள்ளி வளாகத்தில் மாணவர்களின் பாதுகாப்பு மற்றும் சம்பவம் தொடர்பான உண்மை நிலவரம் குறித்து அதிகாரிகள் தொடர்ந்து விசாரணை மேற்கொண்டு வருகின்றனர்.

இதையும் படிங்க: மதுராந்தகம் இடைத்தேர்தல்: இன்று தொடங்கும் வேட்புமனு தாக்கல்! 9 பறக்கும் படைகள் தயார்! தேர்தல் நடத்தும் அலுவலர் நியமனம்!