பஞ்சாப் மாநிலம் பக்வாராவில் உள்ள லவ்லி புரொபஷனல் பல்கலைக்கழகத்தில் மாணவர்கள் போராட்டம் வன்முறையாக மாறியதைத் தொடர்ந்து, பல்கலைக்கழகத்தில் 10 நாட்களுக்கு வகுப்புகள் ரத்து செய்யப்பட்டுள்ளன. செப்டம்பர் 28 முதல் வழக்கமான வகுப்புகள் நடைபெறாது என்றும், இடைக்காலத் தேர்வுகள் மறு அறிவிப்பு வரும் வரை ஒத்திவைக்கப்படுவதாகவும் பல்கலைக்கழகம் அறிவித்துள்ளது.
பல்கலைக்கழக வளாகத்தில் மாணவி ஒருவருக்கு வெளியாள் ஒருவர் பாலியல் வன்கொடுமை செய்ததாக சமூக வலைதளங்களில் தகவல் பரவியதைத் தொடர்ந்து மாணவர்கள் போராட்டத்தில் ஈடுபட்டனர். ஞாயிற்றுக்கிழமை போராட்டம் தீவிரமடைந்து, வளாகத்தில் இருந்த பொருட்கள் சேதப்படுத்தப்பட்டதுடன், சில வாகனங்கள் தீவைக்கப்பட்டன. ஜலந்தர்-பக்வாரா தேசிய நெடுஞ்சாலை 44-லும் மாணவர்கள் மறியல் செய்தனர்.
போராட்டக்காரர்கள் போலீசார் மீது கற்களை வீசியதாகவும், போலீஸ் வாகனங்கள் சேதப்படுத்தப்பட்டதாகவும் அதிகாரிகள் தெரிவித்துள்ளனர். இதையடுத்து போலீசார் தடியடி நடத்தி கூட்டத்தை கலைக்க முயன்றனர். இந்த மோதலில் பல போலீசார் காயமடைந்ததாக தகவல்கள் வெளியாகியுள்ளன. நிலைமையை கட்டுக்குள் கொண்டுவர 2,000-க்கும் மேற்பட்ட போலீசார் பாதுகாப்புப் பணியில் ஈடுபடுத்தப்பட்டனர்.
இதையும் படிங்க: கல்லூரி மாணவி பாலியல் வன்கொடுமை?! LPU பல்கலைக்கழகத்தில் நள்ளிரவில் வெடித்த போராட்டம்!
இதற்கிடையே, பாலியல் வன்கொடுமை தொடர்பாக போலீசார் அடையாளம் தெரியாத நபர் மீது வழக்குப் பதிவு செய்து, சிறப்பு புலனாய்வுக் குழுவை அமைத்துள்ளனர். தடயவியல் ஆதாரங்கள், சிசிடிவி காட்சிகள் மற்றும் தொலைபேசி தகவல்கள் உள்ளிட்டவற்றை ஆய்வு செய்து உண்மையை கண்டறிய நடவடிக்கை எடுக்கப்பட்டுள்ளதாக போலீசார் தெரிவித்துள்ளனர்.
ஆனால், பாலியல் வன்கொடுமை சம்பவம் நடந்ததாக கூறப்படும் தகவலை லவ்லி புரொபஷனல் பல்கலைக்கழக நிர்வாகம் மறுத்துள்ளது. சமூக வலைதளங்களில் பரவும் தகவல்கள் ஆதாரமற்றவை என்றும், பல்கலைக்கழகத்தின் நற்பெயருக்கு களங்கம் ஏற்படுத்தும் வகையில் வதந்திகள் பரப்பப்படுவதாகவும் நிர்வாகம் கூறியுள்ளது. எனவே, இந்த விவகாரத்தில் போலீஸ் விசாரணையின் முடிவே முக்கியமானதாக உள்ளது.
போராட்டத்தில் ஈடுபட்ட மாணவர்கள், தங்களது குறைகள் தீர்க்கப்பட வேண்டும் என்றும், போராட்டத்தில் பங்கேற்றதற்காக தங்களுக்கு எதிராக பழிவாங்கும் நடவடிக்கை எடுக்கக் கூடாது என்றும் கோரிக்கை விடுத்துள்ளனர். விடுதிகளில் பாதுகாப்பை அதிகரிக்க வேண்டும் உள்ளிட்ட பல்வேறு கோரிக்கைகளையும் அவர்கள் முன்வைத்துள்ளனர்.
வன்முறையைத் தொடர்ந்து மாணவர்கள் பலர் தங்களது சொந்த ஊர்களுக்குப் புறப்பட்டுச் செல்லத் தொடங்கியுள்ளனர். வளாகத்தில் பாதுகாப்பு பலப்படுத்தப்பட்டுள்ள நிலையில், தற்போது LPU விவகாரம் தொடர்பான போலீஸ் விசாரணை மற்றும் பல்கலைக்கழக நிர்வாகத்தின் அடுத்தகட்ட நடவடிக்கைகள் மீது கவனம் திரும்பியுள்ளது.
இதையும் படிங்க: கல்லூரி மாணவி பாலியல் வன்கொடுமை?! LPU பல்கலைக்கழகத்தில் நள்ளிரவில் வெடித்த போராட்டம்!