மகாராஷ்டிரா மாநில பாஜக அமைச்சர் நிதேஷ் ராணேவுக்கு, அரசு ஊழியர் ஒருவர் மீது சேற்றை ஊற்றி அவமானப்படுத்திய வழக்கில் ஒரு மாதம் சிறை தண்டனை விதிக்கப்பட்டுள்ளது.
கடந்த 2019 ஜூலை மாதம், மும்பை-கோவா நெடுஞ்சாலை விரிவாக்கப் பணிகளை ஆய்வு செய்யச் சென்றபோது, தேசிய நெடுஞ்சாலை ஆணையத்தின் பொறியாளர் பிரகாஷ் ஷெடேகர் மீது நிதேஷ் ராணே மற்றும் அவரது ஆதரவாளர்கள் சேற்றை ஊற்றி, அவரை சகதியில் நடக்க வைத்து பொதுவெளியில் அவமானப்படுத்தினர். சாலைப் பணிகள் தரமற்ற முறையில் இருந்ததாகக் கூறி ஏற்பட்ட ஆத்திரத்தில் இந்தச் செயலைச் செய்ததாக அவர்கள் தெரிவித்தனர்.
இந்தச் சம்பவம் பெரும் பரபரப்பை ஏற்படுத்தியது. அரசு ஊழியரை வேலை செய்ய விடாமல் தடுத்து, அவரை அவமானப்படுத்தியதாக குற்றச்சாட்டுகள் எழுந்தன. இதையடுத்து நிதேஷ் ராணே உள்ளிட்ட 30 பேருக்கு எதிராக வழக்குப் பதிவு செய்யப்பட்டது.
இதையும் படிங்க: மே 4..! தேர்தல் முடிவுகளை உற்றுநோக்கும் தமிழகம்..! வேட்பாளர்களை சந்திக்க விஜய் திட்டம்..!
நேற்று சிந்துதுர்க் நீதிமன்றம் இந்த வழக்கில் தீர்ப்பளித்தது. நீதிபதி வி.எஸ். தேஷ்முக், “மக்களின் குறைகளை முன்னிறுத்தி போராடுவது நல்ல நோக்கம்தான். ஆனால் ஒரு அரசு ஊழியரை பொதுவெளியில் அவமானப்படுத்த யாருக்கும் உரிமை இல்லை. சட்டத்தை யாரும் கையில் எடுக்கக் கூடாது” என்று கூறி, நிதேஷ் ராணேவுக்கு ஒரு மாதம் சிறை தண்டனையும், ரூ.1 லட்சம் அபராதமும் விதித்தார்.
தீர்ப்பு அளிக்கப்பட்ட உடனேயே நிதேஷ் ராணே தரப்பில் மேல்முறையீடு செய்ய அவகாசம் கோரப்பட்டது. நீதிமன்றம் அதை ஏற்றுக்கொண்டு, தண்டனையை தற்காலிகமாக நிறுத்தி வைத்தது.
குறிப்பிடத்தக்க வகையில், இந்தச் சம்பவம் நடைபெற்றபோது நிதேஷ் ராணே காங்கிரஸ் கட்சியில் இருந்தார். பின்னர் அவர் பாஜகவில் இணைந்து தற்போது அமைச்சராக பதவி வகித்து வருகிறார்.
இந்தத் தீர்ப்பு மகாராஷ்டிரா அரசியல் வட்டாரத்தில் பெரும் பேச்சாகியுள்ளது. அரசு அதிகாரிகளை அவமானப்படுத்தும் செயலுக்கு எதிராக நீதிமன்றம் கடுமையான நிலைப்பாட்டை எடுத்துள்ளது.
இதையும் படிங்க: சிக்கிம் மக்களின் தேசபக்தி!! நாட்டு மக்களின் இதயங்களை வென்றுள்ளது! ஆர்க்கிட் மலர்களின் தோட்டம் என மோடி பெருமிதம்!