பிரதமர் நரேந்திர மோடி நாளை சென்னை வருகை தர உள்ளதை முன்னிட்டு, நகரின் பல்வேறு பகுதிகளில் போக்குவரத்து மாற்றங்கள் செய்யப்பட உள்ளதாகக் காவல்துறை அறிவித்துள்ளது.

பிரதமர் சென்னையில் மெட்ரோ ரயில் திட்டம் உள்ளிட்ட பல்வேறு நிகழ்ச்சிகளில் பங்கேற்க உள்ளார். இதையொட்டி, நாளை காலை 8 மணி முதல் மாலை 4.30 மணி வரை வணிக வாகனங்கள் மற்றும் கனரக வாகனங்களுக்குப் போக்குவரத்து மாற்றங்கள் செய்யப்பட உள்ளன. எனவே, பொதுமக்கள் மாற்றுப் பாதைகளைப் பயன்படுத்தி ஒத்துழைப்பு அளிக்குமாறு சென்னை போக்குவரத்துக் காவல்துறை கேட்டுக்கொண்டுள்ளது.

எந்தெந்த பகுதிகளில் போக்குவரத்து மாற்றம்?

ஜிஎஸ்டி சாலை:
தாம்பரத்தில் இருந்து வரும் வாகனங்கள் திருநீர்மலை சந்திப்பில் குன்றத்தூர் சாலை நோக்கித் திருப்பிவிடப்பட வேண்டும். அதேபோல், பல்லாவரத்தில் இருந்து வரும் வாகனங்கள் விமான நிலையச் சந்திப்பு அருகே மாற்றுப் பாதையில் திருப்பிவிடப்படும் எனத் தெரிவிக்கப்பட்டுள்ளது.

இதையும் படிங்க: சென்னையில் விளையாட்டு வீரர்களுக்கு பாராட்டு விழா! முதல்வர் விஜய் தலைமையில் கோலாகல தொடக்கம்!

நூறடி சாலை மற்றும் அசோக் நகர்:
நூறடி சாலை வழியாக கத்திப்பாரா நோக்கி வரும் வாகனங்கள் மற்றும் கோயம்பேட்டில் இருந்து வரும் வாகனங்கள், அசோக் நகர் இரண்டாவது அவென்யூ வழியாக கோயம்பேடு நோக்கித் திருப்பிவிடப்படும் எனத் தெரிவிக்கப்பட்டுள்ளது. அசோக் பில்லர் பகுதியில் இருந்து வரும் வாகனங்களும் சந்திப்பில் மாற்றுப் பாதையில் திருப்பிவிடப்படும்.

மவுண்ட்–பூந்தமல்லி சாலை:
மவுண்ட்–பூந்தமல்லி சாலை வழியாக கத்திப்பாரா நோக்கி வரும் வாகனங்களுக்கும் போக்குவரத்து மாற்றங்கள் செய்யப்பட்டுள்ளன. போரூர் சந்திப்பில் இருந்து வரும் வாகனங்கள் மதுரவாயல் நோக்கித் திருப்பிவிடப்படும் என்றும், ராமாபுரம் சந்திப்பில் இருந்து வரும் வாகனங்கள் மாற்றுப் பாதையில் திருப்பிவிடப்படும் என்றும் தெரிவிக்கப்பட்டுள்ளது.

சர்தார் படேல் சாலை மற்றும் ஓஎம்ஆர்:
சர்தார் படேல் சாலை மற்றும் பழைய மகாபலிபுரம் சாலை (ஓஎம்ஆர்) வழியாக வரும் வாகனங்கள் காந்தி மண்டபம் சந்திப்பில் இருந்து சிபிடி நோக்கித் திருப்பிவிடப்பட வேண்டும் என அறிவுறுத்தப்பட்டுள்ளது. காந்தி மண்டபம் சாலை வழியாக வரும் வாகனங்களுக்கும் அந்தச் சந்திப்பில் போக்குவரத்து மாற்றம் செய்யப்படும்.

வேளச்சேரி பிரதான சாலை:
வேளச்சேரி பிரதான சாலையில் இருந்து சர்தார் படேல் சாலை நோக்கி வரும் வாகனங்கள் குருநானக் கல்லூரி சந்திப்பில் இருந்து வேளச்சேரி நோக்கித் திருப்பிவிடப்படும் எனத் தெரிவிக்கப்பட்டுள்ளது.

அண்ணா சாலை:
அண்ணா சாலையில் இருந்து வரும் வாகனங்களுக்கும் போக்குவரத்து மாற்றங்கள் செய்யப்பட்டுள்ளன. எம்.சி. ராஜா சாலைப் பகுதியில் இருந்து வரும் வாகனங்கள் அண்ணா சாலை திசையில் திருப்பிவிடப்பட வேண்டும் எனக் காவல்துறை தெரிவித்துள்ளது.

காவல்துறை வேண்டுகோள்:

பிரதமர் வருகையை முன்னிட்டு, குறிப்பிட்ட நேரத்தில் சென்னையின் பல்வேறு முக்கியச் சாலைகளில் போக்குவரத்து மாற்றங்கள் அமல்படுத்தப்பட உள்ளன. எனவே, பொதுமக்கள் தங்களது பயணத்தை முன்கூட்டியே திட்டமிட்டு, அறிவிக்கப்பட்ட மாற்றுப் பாதைகளைப் பயன்படுத்த வேண்டும் என சென்னை போக்குவரத்துக் காவல்துறை கேட்டுக்கொண்டுள்ளது.

இதையும் படிங்க: தீவுத்திடல் பட்டாசு கடைகள்... விரைவில் டெண்டர்..! தமிழக அரசு அறிவிப்பு..!!