நடந்து முடிந்த சட்டமன்ற இடைத்தேர்தலில் ஆளும் கட்சியினர் மக்களுக்குப் பணத்தை அள்ளிக் கொடுத்துள்ளனர் என்றும், ஆளும் கட்சிக்கே காசு கொடுத்து ஓட்டு வாங்கும் அவல நிலை ஏற்பட்டுள்ளது என்றும் முன்னாள் மத்திய அமைச்சரும் பாஜக மூத்த தலைவருமான பொன். ராதாகிருஷ்ணன் மிகக் காரசாரமாகக் குற்றம்சாட்டியுள்ளார்.

பாரதப் பிரதமர் நரேந்திர மோடியின் 76-வது பிறந்தநாள் விழா மற்றும் மக்களால் தேர்ந்தெடுக்கப்பட்ட அரசுப் பதவிகளில் அவர் 25 ஆண்டுகால மக்கள் சேவையை நிறைவு செய்துள்ள வரலாற்று மைல்கல்லைப் போற்றும் வகையில், தேனியில் உள்ள தனியார் திருமண மண்டபத்தில் பாஜக சார்பில் மாபெரும் நலத்திட்ட உதவிகள் வழங்கும் விழா இன்று (08-10-2026) நடைபெற்றது.

இந்நிகழ்ச்சியில் முன்னாள் மத்திய அமைச்சர் பொன். ராதாகிருஷ்ணன், பாஜக மாநிலப் பொதுச்செயலாளர் ராம. சீனிவாசன் மற்றும் மாநில, மாவட்ட நிர்வாகிகள் பலர் கலந்துகொண்டு, ஏழை எளிய பெண்களுக்குத் தையல் இயந்திரங்கள், அரிசி மற்றும் அத்தியாவசியப் பொருட்கள் உள்ளிட்ட பல்வேறு நலத்திட்ட உதவிகளை வழங்கினர்.

இதையும் படிங்க: "விழித்துக் கொண்டால் பிழைத்து கொள்வார்" ... சி.எம். விஜய்யை எச்சரித்த பொன்.ராதாகிருஷ்ணன்...!

தொடர்ந்து மேடையில் சிறப்புரையாற்றிய முன்னாள் மத்திய அமைச்சர் பொன். ராதாகிருஷ்ணன், ஒரு மனிதன் பிறந்த நாளிலிருந்து ஒரு நாள் கூட ஓய்வெடுக்காமல், ஓய்வில்லாத் தொழிலாளியாகவும் மக்கள் பணியாளராகவும் பிரதமர் நரேந்திர மோடி இரவு பகலாக உழைத்துக் கொண்டிருக்கிறார். பிரதமர் மோடியைப் பொறுத்தவரை நமது குடும்பத்தில் ஒருவர்; அவருக்கு என்று தனியாக எந்தக் குடும்பமும் கிடையாது; நாட்டின் 140 கோடி மக்களுமே அவரது குடும்பம். 

ஒரு சாதாரண ஏழைக் குடும்பத்தில் பிறந்து தேசத்தின் தலைமைப் பொறுப்பிற்கு உயர்ந்தவர் அவர். கொடிய கொரோனா பெருந்தொற்று காலகட்டத்தில் ஒட்டுமொத்த இந்திய மக்களுக்கும் இலவச தடுப்பூசி மற்றும் உணவு தானியங்களை வழங்கி, மீண்டும் நமக்கு மறுவாழ்வு கொடுத்த மாற்றுத் தாய், தந்தையாக நரேந்திர மோடி திகழ்ந்தார் என்று புகழாரம் சூட்டினார்.

தமிழகத்தில் சமீபத்தில் நடந்து முடிந்த சட்டமன்ற இடைத்தேர்தல் களம் குறித்துப் பேசிய அவர், நடந்து முடிந்த இடைத்தேர்தலில் ஆளும் கட்சியினர் வாக்காளர்களுக்குப் பணத்தை அள்ளிக் கொடுத்துள்ளனர்; ஆளும் கட்சி என்ற அதிகார பலம் இருந்தும் கூட காசு கொடுத்து ஓட்டு வாங்கும் தேவை அவர்களுக்கு வந்துள்ளது. ஆனால், பாஜக ஒருபோதும் ஒற்றைக் காசு கூட கொடுத்து வாக்குகளை வாங்காது; நேர்மையான அரசியலை முன்னெடுக்கும் பிரதமர் நரேந்திர மோடியின் வழிகாட்டுதலே இதற்குக் காரணம்
 என்று திட்டவட்டமாகத் தெரிவித்தார்.

இதையும் படிங்க: பெரம்பூர் எம்எல்ஏ அலுவலகத்துக்கு முதல்வர் விஜய் சர்ப்ரைஸ் விசிட்! சொந்த தொகுதியில் மக்களுடன் சந்திப்பு!