தமிழ்நாட்டின் அரசியல் களத்தில் 2026 சட்டமன்றத் தேர்தலுக்கு முன்னதாக முக்கியமான மாற்றங்கள் ஏற்பட்டு வருகின்றன. சமூக ஜனநாயகக் கட்சியான எஸ்.டி.பி.ஐ அதிமுக தலைமையிலான கூட்டணியிலிருந்து விலகி, திமுக தலைமையிலான கூட்டணியில் இணைந்திருப்பது முக்கிய திருப்பமாக பார்க்கப்படுகிறது. கடந்த 2024 நாடாளுமன்றத் தேர்தலின்போது எஸ்.டி.பி.ஐ கட்சி அதிமுக தலைமையிலான கூட்டணியில் இடம்பெற்றிருந்தது.

அப்போது அதிமுகவுடன் டி.எம்.டி.கே, புதிய தமிழகம் உள்ளிட்ட சில கட்சிகளுடன் இணைந்து தேர்தலை எதிர்கொண்டது. ஆனால், அதிமுக பாஜகவுடன் மீண்டும் கூட்டணி அமைக்கும் நகர்வுகள் தீவிரமடைந்ததும், எஸ்.டி.பி.ஐ கட்சி அதிருப்தி அடைந்தது. பாஜகவின் கொள்கைகள் மற்றும் அதன் அணுகுமுறையை ஏற்க முடியாது என்பதால், 2025 ஏப்ரல் மாதத்தில் அதிமுக கூட்டணியிலிருந்து வெளியேறியது. இதன்பிறகு எஸ்.டி.பி.ஐ கட்சி தனது அடுத்தகட்ட அரசியல் முடிவுகளை எடுக்கத் தொடங்கியது.

கட்சியின் மாநிலத் தலைவர் நெல்லை முபாரக் உள்ளிட்ட தலைவர்கள், தேர்தலில் தனித்து போட்டியிடுவதற்கான வாய்ப்புகளை ஆராய்ந்தாலும், கூட்டணி அமைப்பதே சாத்தியமானது என்பதை உணர்ந்தனர். இதனால் திமுகவுடன் பேச்சுவார்த்தைகள் தொடங்கின. திமுக கூட்டணியில் இணைவதற்கு முக்கிய நிபந்தனையாக, கட்சிக்கு உரிய பிரதிநிதித்துவம் வழங்க வேண்டும் என எஸ்.டி.பி.ஐ வலியுறுத்தியது. 2025 இறுதியிலிருந்து இந்தப் பேச்சுவார்த்தைகள் தீவிரமடைந்தன.

இதையும் படிங்க: திமுகவை முந்தும் எதிர்க்கட்சிகள்... அதிமுக - பாஜக தொகுதி பங்கீடு பேச்சுவார்த்தை..!!

இறுதியாக, எஸ்.டி.பி.ஐ கட்சி திமுக தலைமையிலான மதச்சார்பற்ற முற்போக்குக் கூட்டணியில் புதிய கூட்டணிக் கட்சியாக இணைந்தது. வரும் சட்டமன்ற தேர்தலில் திமுகவிற்கு கொங்கு இளைஞர் பேரவை தலைவர் தனியரசு ஆதரவு தெரிவித்திருப்பதும் குறிப்பிடத்தக்கது. ஏற்கனவே தமிமுன் அன்சாரியின் மனிதநேய ஜனநாயக கட்சியும் திமுக கூட்டணியில் இணைந்திருக்கும் நிலையில் தொகுதி பங்கீடு பேச்சு வார்த்தைகள் சூடு பிடித்துள்ளன. 

இதையும் படிங்க: திமுகவில் ஓபிஎஸ்... தவறான முடிவு... சட்டென அண்ணாமலை கொடுத்த ரியாக்ஷன்.!!