சமீபத்தில், அதிமுக பொதுச் செயலாளர் எடப்பாடி கே. பழனிசாமி டெல்லியில் மத்திய உள்துறை அமைச்சர் அமித் ஷாவை சந்தித்தார். இந்த சந்திப்பின்போது தமிழக அரசியல் நிலவரம் குறித்து விரிவான விவாதம் நடைபெற்றதாக தகவல்கள் தெரிவிக்கின்றன. டெல்லி அரசியல் வட்டாரங்களில் இது தொடர்பான ஒரு முக்கிய செய்தி பரபரப்பாக பேசப்படுகிறது.

அதன்படி, தமிழகத்தில் 2026 சட்டமன்றத் தேர்தலுக்குப் பிறகு கூட்டணி ஆட்சி அமையும் என்று அமித் ஷா கூறியதாகவும், அதில் பாஜகவுக்கு மூன்று அமைச்சர் பதவிகள் ஒதுக்க வேண்டும் என்று வலியுறுத்தியதாகவும் கூறப்படுகிறது.

பாஜக விரும்பும் துறைகளாக அறநிலையத் துறை (இந்து சமய அறநிலையங்கள்), கல்வித் துறை, கலாசாரத் துறை ஆகியவற்றை இப்போதே குறிப்பிட்டுள்ளதாக தகவல்கள் வெளியாகியுள்ளன. இதற்கு பழனிசாமி எந்த பதிலும் அளிக்கவில்லை என்றும் கூறப்படுகிறது.

இதையும் படிங்க: டெல்லி புறப்பட்டார் எடப்பாடி! யாருக்கு எத்தனை தொகுதி? அமித்ஷாவுடன் அடுத்த மீட்டிங்!!

மறுபக்கம், ஆளும் திமுகவுடன் தொடரும் கூட்டணியில் காங்கிரஸ் கட்சியும் ஆட்சியில் பங்கு கோரியுள்ளது. காங்கிரஸ் தலைவர்கள் மத்தியில் பேசப்படும் தகவலின்படி, பொதுப்பணித் துறை மற்றும் நீர்வளத் துறை ஆகிய அமைச்சர் பதவிகளை கேட்டுள்ளனர். கட்சி நிதி பற்றாக்குறையில் இருப்பதால், பொதுப்பணித் துறை மூலம் அதிகளவில் நிதி கிடைக்கும் என்ற எதிர்பார்ப்பு உள்ளதாக தெரிகிறது.

மேலும், அடுத்த வாரம் ராகுல் காந்தி டெல்லியில் தமிழக காங்கிரஸ் தலைவர்களை சந்திக்க உள்ளார். அப்போது கூட்டணி தொடர்பான இறுதி முடிவுகள் எடுக்கப்படும் என்றும், ஆட்சியில் பங்கு பெறுவது குறித்தும் விவாதிக்கப்படும் என்றும் எதிர்பார்க்கப்படுகிறது.

தமிழகத்தில் 2026 சட்டமன்றத் தேர்தல் நெருங்கி வரும் நிலையில், அதிமுக-பாஜக கூட்டணி மற்றும் திமுக-காங்கிரஸ் கூட்டணி இடையேயான பேச்சுவார்த்தைகள் தீவிரமடைந்துள்ளன. அமைச்சர் பதவிகள், துறை பங்கீடு போன்ற விவகாரங்கள் முக்கிய பேசுபொருளாக உருவெடுத்துள்ளன. இந்த அரசியல் நகர்வுகள் தமிழக மக்களின் கவனத்தை ஈர்த்துள்ளன.
 

இதையும் படிங்க: விஜயை சந்தித்தது உண்மைதான்!! கூட்டணியை தலைமை முடிவு செய்யும்! நழுவும் பிரவீன் சக்கரவர்த்தி!!