மின் பயன்பாட்டை கணக்கிடுவதில் தாமதம் மற்றும் அதிக மின் கட்டணம் தொடர்பான புகார்கள் எழுந்துள்ள நிலையில், வீடுகள் மற்றும் கடைகளில் மின் மீட்டர் ரீடிங் எடுக்கும் பணியில் முதல் முறையாக தனியார் ஒப்பந்த நிறுவனங்களை ஈடுபடுத்த தமிழ்நாடு மின் வாரியம் முடிவு செய்துள்ளது.

தமிழகத்தில் வீடுகள் மற்றும் கடைகளை உள்ளடக்கிய தாழ்வழுத்த மின் இணைப்புகளில், இரண்டு மாதங்களுக்கு ஒருமுறை மின் வாரிய பணியாளர்கள் நேரில் சென்று மீட்டரில் பதிவாகியுள்ள மின் பயன்பாட்டை கணக்கெடுத்து வருகின்றனர். அதேநேரத்தில், உயரழுத்த பிரிவில் உள்ள தொழிற்சாலைகளுக்கு தானியங்கி முறையில் மாதந்தோறும் மின் பயன்பாடு கணக்கிடப்படுகிறது.

மின் வாரியத்தில் பணியாளர் பற்றாக்குறை காரணமாக சில பகுதிகளில் குறிப்பிட்ட காலத்திற்குள் மீட்டர் ரீடிங் எடுப்பதில் தாமதம் ஏற்படுவதாக கூறப்படுகிறது. மேலும், சில இடங்களில் பணியாளர்கள் நேரில் செல்லாமல் கணக்கீடு செய்வதாகவும், இதனால் எதிர்பாராத அளவில் அதிக மின் கட்டணம் வருவதாகவும் நுகர்வோர் புகார் தெரிவித்து வருகின்றனர்.

இதையும் படிங்க: தமிழகத்தில் தொடரும் கரண்ட் கட்! மின்வாரியத்தில் முதல்வர் விஜய் அதிரடி ஆய்வு! அதிகாரிகளுக்கான உத்தரவு என்ன?

இந்த நிலையில், மின் பயன்பாட்டை கணக்கிடும் பணியை தனியார் ஒப்பந்த நிறுவனங்கள் மூலம் மேற்கொள்ள மாவட்ட மேற்பார்வை பொறியாளர்களுக்கு மின் வாரியம் அறிவுறுத்தியுள்ளது. குறைந்த மதிப்பிலான ‘லிமிடெட் டெண்டர்’ முறையில் நிறுவனங்களை தேர்வு செய்து, ஆறு மாத காலத்திற்கு இந்தப் பணியை மேற்கொள்ள திட்டமிடப்பட்டுள்ளது.

தனியார் நிறுவனங்கள் மூலம் பணியமர்த்தப்படும் ஊழியர்களுக்கு தினசரி பணிக்கான இலக்கும் நிர்ணயிக்கப்பட்டுள்ளது. சென்னை மாநகராட்சியில் ஒரு ஊழியர் குறைந்தது 250 மின் இணைப்புகளிலும், பிற மாநகராட்சிகளில் 220 இணைப்புகளிலும் ரீடிங் எடுக்க வேண்டும். நகராட்சிகளில் 200, பேரூராட்சிகளில் 180, கிராமப்புறங்களில் 110, மலைப்பகுதிகளில் 80 இணைப்புகளில் தினமும் கணக்கெடுப்பு நடத்த வேண்டும் என தெரிவிக்கப்பட்டுள்ளது.

இந்த புதிய நடைமுறை அடுத்த மாதம் முதல் தொடங்க நடவடிக்கை எடுக்கப்பட்டுள்ளதாக கூறப்படுகிறது. பணிகள் முறையாக நடைபெறுகிறதா என்பதை தொடர்ந்து கண்காணிக்கவும் அதிகாரிகளுக்கு உத்தரவிடப்பட்டுள்ளது.

இதற்கிடையே, தற்போது ஒரு மின் இணைப்புக்கு ரூ.5 ஊதியத்தில் கணக்கெடுப்பு பணியில் ஈடுபட்டு வரும் ஓய்வுபெற்ற மின் வாரிய பணியாளர்களும் தொடர்ந்து இந்தப் பணியில் ஈடுபடலாம் என அதிகாரி ஒருவர் தெரிவித்துள்ளார்.

மீட்டர் ரீடிங் தாமதம், பணியாளர் பற்றாக்குறை மற்றும் அதிக மின் கட்டணம் தொடர்பான புகார்களுக்கு தீர்வு காணும் நோக்கில் இந்த நடவடிக்கை எடுக்கப்பட்டுள்ளதாக மின் வாரிய அதிகாரிகள் தரப்பில் தெரிவிக்கப்பட்டுள்ளது.

இதையும் படிங்க: தமிழகம் முழுவதும் மின்சாரம் குறித்து முக்கிய அறிவிப்பு! மின் வாரியம் சொன்ன தகவல் இதோ!