திருநெல்வேலி அருகே மதுபோதையில் குளத்தில் தவறி விழுந்து உயிரிழந்த நபரிடம் இருந்து 4 சவரன் தங்க நகையை பறித்ததாக கூறப்படும் அவரது நண்பர்கள் இருவரை போலீசார் கைது செய்துள்ளனர். உயிரிழந்தவரின் உடல் மீட்கப்பட்ட நிலையில், சிசிடிவி காட்சிகளை ஆய்வு செய்த போலீசார் நடத்திய விசாரணையில் இந்த அதிர்ச்சி சம்பவம் வெளிச்சத்துக்கு வந்துள்ளது.

விருதுநகர் மாவட்டம் கங்காகுளம் செங்கமலநாச்சியார்புரத்தை சேர்ந்தவர் ஆனந்த் (38). தனியார் நிறுவனத்தில் பணியாற்றி வந்தார். கடந்த ஆகஸ்ட் 28-ம் தேதி வேலை தொடர்பாக தூத்துக்குடி சென்ற ஆனந்த், அதன் பிறகு வீடு திரும்பவில்லை. இதனால் பதற்றமடைந்த அவரது குடும்பத்தினர் பல இடங்களில் தேடியுள்ளனர்.

இதற்கிடையில், ஆனந்தின் தந்தை முத்தையா அளித்த புகாரின் அடிப்படையில் தாழையூத்து போலீசார் விசாரணையை தொடங்கினர். தேடுதல் நடவடிக்கையின் போது கட்டுடையார்குடியிருப்பு பகுதியில் உள்ள குளத்தில் ஆனந்தின் உடல் மீட்கப்பட்டது. முதற்கட்டமாக அவர் குளத்தில் தவறி விழுந்து உயிரிழந்திருக்கலாம் என கருதப்பட்டது.

இதையும் படிங்க: திருநெல்வேலி அல்வா டா..!! 'Best Sweet Shop' - தேசிய அளவில் கிடைத்த விருது!!

ஆனால், போலீசார் அந்த பகுதியில் இருந்த சிசிடிவி கேமரா பதிவுகளை ஆய்வு செய்தபோது முக்கிய தகவல்கள் கிடைத்ததாக கூறப்படுகிறது. ஆனந்துடன் பணிபுரிந்த தச்சநல்லூரை சேர்ந்த மகேஷ் (43), மாரியப்பன் (37) ஆகிய இருவரும் அவரை இருசக்கர வாகனத்தில் அழைத்துச் சென்ற காட்சிகள் பதிவாகியிருந்தன.

இதையடுத்து இருவரிடமும் போலீசார் விசாரணை நடத்தினர். சம்பவத்தன்று மூவரும் ஒன்றாக மதுஅருந்தியபோது தகராறு ஏற்பட்டதாக விசாரணையில் தெரியவந்ததாக போலீசார் தெரிவித்தனர். பின்னர் ஆனந்தை பஸ்சில் ஊருக்கு அனுப்பி வைப்பதாக கூறி, அவரை இருசக்கர வாகனத்தில் அழைத்துச் சென்றுள்ளனர்.

கட்டுடையார்குடியிருப்பு பகுதியில் சென்றபோது, ஆனந்தின் கழுத்தில் இருந்த 4 சவரன் தங்க நகையை இருவரும் பறித்துக்கொண்டு அங்கிருந்து சென்றதாக போலீசார் தெரிவித்தனர். மதுபோதையில் இருந்த ஆனந்த் தடுமாறி குளத்தில் விழுந்து உயிரிழந்ததாகவும் விசாரணையில் தெரியவந்துள்ளது.

இதையடுத்து மகேஷ் மற்றும் மாரியப்பனை தாழையூத்து போலீசார் கைது செய்து, தொடர்ந்து விசாரணை நடத்தி வருகின்றனர். நண்பர்களுடன் சென்றவர் சடலமாக மீட்கப்பட்ட சம்பவம் தற்போது திருநெல்வேலி பகுதியில் அதிர்ச்சியை ஏற்படுத்தியுள்ளது.

இதையும் படிங்க: திருநெல்வேலி அல்வா டா..!! 'Best Sweet Shop' - தேசிய அளவில் கிடைத்த விருது!!