தமிழ்நாடு சட்டமன்றத் தேர்தல் தொகுதி பங்கீடு பேச்சுவார்த்தைகள் தீவிரமடைந்துள்ள நிலையில், திமுக கூட்டணியில் மதிமுகவுக்கு 4 தொகுதிகள் ஒதுக்கப்பட்டுள்ளன. இதில் 3 தொகுதிகளில் உதயசூரியன் சின்னத்திலும், ஒரு தொகுதியில் தனிச்சின்னத்திலும் போட்டியிட மதிமுக உடன்பாடு தெரிவித்துள்ளது. 234 தொகுதிகளில் இதுவரை 36 தொகுதிகளை கூட்டணி கட்சிகளுக்கு திமுக ஒதுக்கியுள்ளது.

டி.ஆர்.பாலு தலைமையிலான திமுக தொகுதிப் பங்கீடு குழு, கூட்டணி கட்சிகளுடன் தொடர்ந்து பேச்சுவார்த்தை நடத்தி வருகிறது. மதிமுகவுக்கு கடந்த 2021 தேர்தலை விட 2 தொகுதிகள் குறைவாக ஒதுக்கப்பட்டுள்ளன. 2021இல் 6 தொகுதிகளில் போட்டியிட்ட மதிமுக, சாத்தூர், மதுரை தெற்கு, வாசுதேவநல்லூர், அரியலூர் உள்ளிட்ட 4 தொகுதிகளில் வெற்றி பெற்றது. ஆனால் இம்முறை 4 தொகுதிகள் மட்டுமே ஒதுக்கப்பட்டுள்ளன.

இதுகுறித்து வைகோ தலைமையில் மதிமுக அவசர உயர்நிலைக் குழு கூட்டம் நடைபெற்றது. பின்னர் அண்ணா அறிவாலயத்திற்கு வைகோ சென்று, முதல்வர் மு.க.ஸ்டாலின் முன்னிலையில் தொகுதி பங்கீடு ஒப்பந்தத்தில் கையெழுத்திட்டார். ஆர்.எஸ்.பாரதி, அமைச்சர்கள் கே.என்.நேரு, எ.வ.வேலு, எம்.ஆர்.கே.பன்னீர்செல்வம் உள்ளிட்டோர், மதிமுக சார்பில் துரைவைகோ உள்ளிட்ட நிர்வாகிகளும் உடனிருந்தனர்.

இதையும் படிங்க: ஒன்றில் தனிச்சின்னம்!! மற்றதில் உதயசூரியன்! மதிமுக ஆலோசனை கூட்டத்தில் வைகோ முடிவு?!

ஒப்பந்தத்தில் கையெழுத்தான பின்னர் வைகோ பேசுகையில், “திமுகவுடன் ஏற்பட்ட உடன்பாட்டில் மகிழ்ச்சி. கூட்டணி வலுவாக இருக்கும்” என்று தெரிவித்தார். உதயசூரியன் சின்னத்தில் போட்டியிட நிபந்தனை விதிக்கப்பட்ட நிலையில், மதிமுக அதை ஏற்றுக்கொண்டுள்ளது.

திமுக கூட்டணியில் இதுவரை காங்கிரஸுக்கு 28 தொகுதிகளும், மனிதநேய மக்கள் கட்சி மற்றும் இந்திய யூனியன் முஸ்லிம் லீக்குக்கு தலா 2 தொகுதிகளும் ஒதுக்கப்பட்டுள்ளன. மொத்தம் 36 தொகுதிகள் கூட்டணி கட்சிகளுக்கு வழங்கப்பட்டுள்ளன. எஞ்சிய 198 தொகுதிகளை பங்கீடு செய்ய வேண்டியுள்ளது. தேமுதிக, விசிக, கம்யூனிஸ்ட் கட்சிகள், மக்கள் நீதி மய்யம், தவாக உள்ளிட்ட கட்சிகளுக்கு இன்னும் ஒதுக்கீடு நடைபெறவில்லை.

20 ஆண்டுகளுக்குப் பிறகு சட்டமன்றத்தில் இடம் பிடிக்க மதிமுகவுக்கு வாய்ப்பு கிடைத்துள்ள நிலையில், “இந்த 4 தொகுதிகளில் யார் வெற்றி பெற்று கட்சிக்கு அங்கீகாரம் பெற்றுத் தருவார்?” என்ற கேள்வி கட்சியினரிடையே எழுந்துள்ளது. தேர்தல் நெருங்கி வரும் நிலையில், மீதமுள்ள கட்சிகளுக்கான பங்கீடு பேச்சுவார்த்தைகள் தீவிரமாக நடைபெற்று வருகின்றன.

இதையும் படிங்க: ராஜ்யசபா எம்.பிக்கள் தேர்தல்! தமிழக வேட்பாளர்கள் 6 பேரும் போட்டியின்றி தேர்வு!!