மிசா கைதுக்கு ஆதாரம் தொடர்பான விவகாரத்தை மையமாக வைத்து திமுக மற்றும் தவெக இடையே சமூக வலைதளங்களில் வார்த்தைப் போர் தீவிரமடைந்துள்ள நிலையில், திமுகவை கடுமையாக விமர்சித்து தவெக ஐடி விங் சார்பில் எக்ஸ் தளத்தில் புதிய பதிவு வெளியிடப்பட்டுள்ளது. முன்னதாக மு.க.ஸ்டாலின் மிசா கால சிறைவாசம் குறித்து காணொளி வெளியிட்டிருந்த நிலையில், அதற்கு தவெக ஐடி விங் பதிலளித்துள்ளது.
அந்த பதிவில், மிசா கால சிறைவாசம் தொடர்பாக நீண்ட விளக்கம் அளித்தாலும், அதற்கான அதிகாரப்பூர்வ ‘detention copy’யை மட்டும் ஏன் வெளியிடவில்லை என்று தவெக ஐடி விங் கேள்வி எழுப்பியுள்ளது. மேலும், பல ஆண்டுகளாக உருவாக்கப்பட்டதாக தாங்கள் கருதும் அரசியல் பிம்பம் தற்போது கேள்விக்குள்ளாகியுள்ளதாகவும் விமர்சித்துள்ளது.
இதனுடன், திமுகவின் கட்சி நிதி, ஊழல் உள்ளிட்ட விவகாரங்களை முன்வைத்தும் தவெக ஐடி விங் பல்வேறு கேள்விகளை எழுப்பியுள்ளது. சட்டமன்றத்தில் இதுபோன்ற விவகாரங்கள் குறித்து திமுக உறுப்பினர்கள் பேசும்போது ஏன் பதற்றம் ஏற்படுகிறது என்றும் அந்த பதிவில் கேள்வி எழுப்பப்பட்டுள்ளது. திமுக ஆட்சியின் சில நடவடிக்கைகள் மற்றும் அரசியல் விமர்சனங்களை சுட்டிக்காட்டி, கடுமையான வார்த்தைகளில் அந்த பதிவு அமைந்துள்ளது.
இதையும் படிங்க: சினிமாவில் ஹீரோ... நிஜ வாழ்க்கையில் வில்லன்! விஜய்யை விளாசிய டிடிவி தினகரன்!!
மேலும், தவெக தலைவர் விஜய்யின் அரசியல் நடவடிக்கைகளை திமுக தரப்பினர் விமர்சித்து வருவதாகக் குறிப்பிட்டு, அவரது உடை, நடை உள்ளிட்ட பல்வேறு விஷயங்களை திமுக தரப்பினர் பின்பற்றுவதாக தவெக ஐடி விங் குற்றம்சாட்டியுள்ளது. குறிப்பாக ‘Copy-Paste’ என்ற வார்த்தையை பயன்படுத்தி திமுக மீது விமர்சனம் முன்வைக்கப்பட்டுள்ளது.
பெண்கள் தொடர்பான அரசியல் பேச்சுகள் குறித்தும் பதிவில் திமுகவை தவெக ஐடி விங் சாடியுள்ளது. பெரியார் பெயரை பயன்படுத்திக்கொண்டு பெண்களை இழிவுபடுத்தும் வகையில் பேசுவதாக தாங்கள் கருதும் சில பேச்சுகளை குறிப்பிட்டு கண்டனம் தெரிவித்துள்ளது.
தொடர்ந்து, மக்கள் மற்றும் குறிப்பாக பெண்கள், குழந்தைகள் அனைத்தையும் கவனித்து வருவதாகவும், எதிர்கால தேர்தல்களில் அதற்கேற்ற பதிலை மக்கள் வழங்குவார்கள் என்றும் அந்த பதிவில் கூறப்பட்டுள்ளது.
மிசா சிறைவாசம் தொடர்பாக ஸ்டாலின் வெளியிட்ட காணொளிக்கு தவெக ஐடி விங் ஏற்கனவே இதேபோல் ‘detention copy’ குறித்து கேள்வி எழுப்பியிருந்தது. இதற்கு பதிலடியாக திமுக ஐடி விங் தரப்பும் மிசா சிறைவாசம் தொடர்பான ஆவணங்களை வெளியிட்டு தவெகவை விமர்சித்திருந்தது. இதனால் இரு கட்சிகளின் தகவல் தொழில்நுட்ப அணிகளுக்கு இடையிலான சமூக வலைதள மோதல் தொடர்ந்து கவனம் பெற்றுள்ளது.
இதையும் படிங்க: ஆளுங்கட்சிக்கு ஓட்டு போட்டால்தான் தொகுதிக்கு நன்மையா? இடைத்தேர்தல் குறித்து சபாநாயகர் பரபரப்பு பேச்சு!